រាជធានីភ្នំពេញ ៖ មេល្បែងស៊ីសង២នាក់ ក្នុងនោះម្នាក់ធ្លាប់ជាប់ពន្ធនាគាររឿងបើកល្បែងស៊ីសង ត្រូវបានកម្លាំងសមត្ថកិច្ចផ្នែកព្រហ្មទណ្ឌ នៃអធិការដ្ឋាននគរបាលខណ្ឌច្បារអំពៅ ធ្វើការបង្ក្រាបនៅចំណុចរោងកម្មករសំណង់ ស្នាក់នៅបុរីប៉េងហួត ក្នុងភូមិបឹងឈូក សង្កាត់និរោធ ខណ្ឌច្បារអំពៅ កាលពីវេលាម៉ោង៩យប់ ថ្ងៃទី២១ ខែមករា ឆ្នាំ២០១៨ ក្រោយពួកគេបើកលេងល្បែង ស្ទួចខ្លងប្រេងកូឡា។ ជនសង្ស័យទាំង២នាក់មានឈ្មោះ ទី១.យឹម ច្រឹប ភេទស្រី អាយុ៤៩ឆ្នាំ ស្នាក់នៅផ្ទះលេខ១១៧ ផ្លូវលេខ៨០ ភូមិ២៣ សង្កាត់ស្រះចក ខណ្ឌដូនពេញ។
ស្ត្រីរូបនេះធ្លាប់ត្រូវបាន នគរបាលខណ្ឌច្បារអំពៅចាប់ឃាត់ខ្លួនចាត់ការតាមនីតិវិធីច្បាប់ម្តងរួចមកហើយ ពាក់ព័ន្ធនឹងបទល្មើស ដដែលខាងលើនេះ។ ដោយឡែកជនសង្ស័យទី២.ឈ្មោះ ពេជ្រ ស្រីខួច ភេទស្រី អាយុ២០ឆ្នាំ ជាតិខ្មែរ ស្នាក់នៅផ្ទះជួល ផ្លូវបេតុង សង្កាត់ឫស្សីកែវ ខណ្ឌឫស្សីកែវ។ លោកវរសេនីយ៍ត្រី ម៉ៅ សឿត អធិការរង នគរបាលខណ្ឌច្បារអំពៅ ទទួលផែនព្រហ្មទណ្ឌ បានឲ្យដឹងថា ក្រោយទទួលបាន ព័ត៌មាន នៃការលួច លាក់បើកល្បែងស៊ីសងខាងលើរួចមក លោកបានដឹកនាំកម្លាំងចុះបង្ក្រាបដល់ទីតាំងនោះ ជាក់ស្តែង តែម្តង។
ក្នុងការបង្ក្រាប សមត្ថកិច្ចដកហូតបាន ធុងសម្រាប់ស្ទូចខ្លងប្រេងកូឡា១, គ្រាប់ខ្លងប្រេងកូឡា ១២គ្រាប់, ក្រណាត់កៅស៊ូក្រាល ចាក់លេខ១ផ្ទាំង, លុយ១៦,៥០០រៀល, ខ្សែដៃប្លាទីន១ខ្សែ, ចិញ្ជៀនប្លាទីនដាំត្បូងពណ៌ស១វង់, ចិញ្ជៀនកាឡៃ២វង់,ខ្សែជើងប្លាទីន១ខ្សែ និងកាបូបពណ៌ក្រហម១។ ចំណែកអ្នកលេងល្បែងបានរត់គេចខ្លួនបាត់អស់នៅពេលសមត្ថកិច្ចចុះទៅដល់។ បច្ចុប្បន្នជនសង្ស័យ ទាំង២នាក់ ត្រូវឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ រង់ចាំកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ