ប្រទេសអាហ្វហ្គានីស្ថាន ៖ ការវាយប្រហារប្រឆាំងសណ្ឋាគារទំនើប INTERCONTINENTAL ក្រុងកាប៊ុលបានបញ្ចប់នាថ្ងៃទី២១ មករា ក្រោយការតស៊ូទប់ទល់ច្រើនម៉ោងរបស់ពួកអ្នកវាយប្រហារ ។
យោងតាមតុល្យការថ្មីរបស់ក្រសួងសុខាភិបាលនាថ្ងៃទី២២ មករា ថា សាកសពមនុស្សយ៉ាងតិច២២នាក់ត្រូវបានយកចេញពីសណ្ឋាគារធំមួយនៃក្រុងកាប៊ុល ដែលរងការវាយប្រហារកាលពីចុងសប្តាហ៍ដោយពួកតាលីបង់ ក្នុងនោះសាកសពមួយចំនួនត្រូវភ្លើងឆេះរោលពិបាកកំណត់អត្តសញ្ញាណ ។
លោក WAHID MAJROH អ្នកនាំពាក្យក្រសួងសុខាភិបាលអាហ្វហ្គានីស្ថានគូសបញ្ជាក់ប្រាប់ AFP ថា សាកសពមនុស្ស២២នាក់ត្រូវបាននាំមកកាន់មន្ទីរពេទ្យនានា ពិសេសដើម្បីកំណត់អត្តសញ្ញាណ ។ សាកសពមួយចំនួនត្រូវភ្លើងឆេះខ្លោច ដែលគេត្រូវធ្វើតេស្ត NDA ដើម្បីឱ្យស្គាល់ ។ តុល្យការផ្លូវការមុននេះរបស់ក្រសួងមហាផ្ទៃរៀបរាប់ពីមនុស្សស្លាប់១៨នាក់ ក្នុងនោះ១៤នាក់ជាជនបរទេស ហើយមនុស្ស១០នាក់រងរបួស ក្នុងនោះមានទាហាន៦នាក់ ។
អ្នកទទួលខុសត្រូវម្នាក់នៃផ្នែកស៊ើបការណ៍អាហ្វហ្គានីស្ថានអះអាងប្រាប់ AFP ថា សាកសពជនវាយប្រហារ៦នាក់ដែលស្លាប់ពេលមានការវាយប្រហាររបស់កងកម្លាំងពិសេសត្រូវបានរក្សាទុកដាច់ដោយឡែកពីគ្នា ពីសាកសពបណ្តាជនរងគ្រោះ ។
យោងតាមបណ្តាសារព័ត៌មានក្នុងស្រុកថា ចំនួនអ្នកស្លាប់មានច្រើនសិបនាក់ ។
ទូរទស្សន៍ TOLO NEWS ដកស្រង់ប្រភពគួរឱ្យជឿជាក់នានាថា អ្នកស្លាប់មានសរុប៤៣នាក់ ។ អ្នករបួសភាគច្រើនបញ្ជូនទៅមន្ទីរពេទ្យយោធាក្រុងកាប៊ុល ។
អ្នកនាំពាក្យរងក្រសួងមហាផ្ទៃ លោក NASRAT RAHIMI រាយការណ៍នាថ្ងៃទី២២ មករា ថា កងកុំម៉ង់ដូមួយបានប្រើកាំភ្លើងខ្លី កាំភ្លើង AK ព្រមទាំងគ្រាប់បែកដៃ ហើយម្នាក់មានភ្ជាប់គ្រឿងផ្ទុះ ។ ជនរងគ្រោះភាគច្រើនស្លាប់ដោយគ្រាប់កាំភ្លើង ហើយខ្លះទៀតស្លាប់ដោយភ្លើងឆេះនៅជាន់ទី៤ ដែលដុតដោយក្រុមកុំម៉ង់ដូមានគ្នា៦នាក់ ក្រោយចាប់ផ្តើមការវាយប្រហារ ។ អ្នកបម្រើភោជនីយដ្ឋានម្នាក់រងរបួស រៀបរាប់ប្រាប់ទូរទស្សន៍ TOLO NEWS ថា បុរស២នាក់ស្លៀកពាក់ស៊ីវិលបានចូញមកកុំម៉ង់អាហារពេលល្ងាច មុនពេលបាញ់ប្រហារដោយកាំភ្លើង AK ហើយសម្លាប់ភ្ញៀវជាច្រើននាក់ ។ ពួកតាលីបង់ប្រកាសទទួលខុសត្រូវលើការវាយប្រហារនេះតាមរយៈសេចក្តីប្រកាសមួយ ដោយអះអាងថា បានសម្លាប់ជនបរទេសច្រើនសិបនាក់ ៕
ចែករំលែកព័តមាននេះ