រាជធានីភ្នំពេញ ៖ ក្រោយពេលនគរបាលធ្វើកោសល្យវិច្ច័យរួចរាល់សពបុរសម្នាក់ដែលបានស្លាប់ដោយគ្រាប់កាំភ្លើងក្នុងពេលដែលនគរបាលផ្នែកអន្តរាគមន៍ខណ្ឌពោធិ៍សែនជ័យបាញ់បង្ក្រាបសង្វៀនជល់មាន់ និងអាប៉ោងហើយផ្លាតត្រូវនោះ ត្រូវបានក្រុមគ្រួសារនាំយកទៅធ្វើបុណ្យតាមប្រពៃណី ស្ថិតនៅក្នុងភូមិសែនអោក ឃុំគុស ស្រុកត្រាំកក់ ខេត្តតាកែវ ដែលជនរងគ្រោះ គឺជាគ្រួសារទ័លក្រមួយរស់នៅក្នុងផ្ទះតៀមតូចមួយ ។
លោក ឃួង ស្រេង អភិបាលរាជធានីភ្នំពេញបានឧបត្ថម្ភនូវថវិកាចំនួន៥០០០ដុល្លារ នាយឧត្តមសេនីយ៍ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញក៏បានឧបត្ថម្ភថវិកាចំនួន៣ពាន់ដុល្លារព្រមទាំងចូលរួមក្នុងពិធីបុណ្យសពចំនួន២លានរៀល ។ ដោយថវិការទាំងនោះត្រូវបានលោក ឃឹម ស៊ុនសូដា អភិបាលរងខណ្ឌពោធិ៍សែនជ័យ និងលោកវរសេនីយ៍ឯក យឹម សារ៉ាន់ អធិការនគរបាលខណ្ឌនាំយកទៅប្រគល់ជូនក្រុមគ្រួសារសពដោយផ្ទាល់ដល់ផ្ទះ និងបានផ្តាំផ្ញើការចូលរួមរំលែកទុក្ខរបស់លោកអភិបាលរាជធានីភ្នំពេញ និងស្នងការនគរបាលរាជធានីភ្នំពេញ ចំពោះកំហុសឆ្គងដែលកើតឡើងដោយអចេតនាមួយនេះ ។
លោកអភិបាលខណ្ឌពោធិ៍សែនជ័យលោក ហែម ដារិទ្ធ ក៏បានចូលរួមបុណ្យសពចំនួន១០០ដុល្លា លោក ឃឹម ស៊ុនសូដា ដែលជាអភិបាលរងខណ្ឌចំនួន១០០ដុល្លារ លោក យឹម សារ៉ាន់ អធិការនគរបាលខណ្ឌចំនួន៥០០ដុល្លារ ព្រមទាំងមន្ត្រីនគរបាលផ្សេងទៀតក៏បានចូលបុណ្យនេះផងដែរ ។
លោកយឹម សារ៉ាន់ អធិការនគរបាលខណ្ឌពោធិ៍សែនជ័យបានប្រាប់តាមទូរស័ព្ទថា លោក និងលោកឃឹម ស៊ុនសូដា បានដឹកនាំកម្លាំងទៅជួបជាមួយក្រុមគ្រួសារសពដល់ផ្ទះ ដោយនាំយកថវិការខាងលើទៅឧបត្ថម្ភដោយផ្ទាល់ដៃ ។ នៅក្នុងពេលនោះស្ត្រីជាប្រពន្ធជនរងគ្រោះបានសម្រេចចិត្តថា មិនប្ដឹងផ្ដល់ទេ នាងបានចាត់ទុកថា វាជាកំហុសអចេតនា ។ លោកអធិការបានបន្តថា ប៉ុន្តែទន្ទឹម និងនេះដែរនាងបានសំណូមពរមកវិញផងដែរ គឺសុំឲ្យលោកជួយឧបត្ថម្ភដល់នាងនៅពេលខាងមុខប្រសិនបើនាងជួបការខ្វះខាតនាងនឹងឡើងទៅភ្នំពេញសុំឲ្យជួយ ព្រោះអត់ពីប្ដីនាងមានបន្ទុកទទួលរ៉ាប់រងក្នុងការចិញ្ចឹមកូន២នាក់ ក្នុងនោះម្នាក់មានអាយុប្រហែល៥ឆ្នាំ និងម្នាក់ទៀតមានអាយុប្រហែល៣ឆ្នាំ ។
ចំណែកមន្ត្រីនគរបាល២រូប ដែលសង្ស័យថា ជាអ្នកបាញ់ផ្លាតត្រូវជនរងគ្រោះដោយអចេតនានោះ ត្រូវបានឃាត់ខ្លួននាំទៅកាន់ស្នងការដ្ឋាននគរបាលរាជធានីភ្នំពេញ ដើម្បីសាកសួរ ។ មិនតែប៉ុណ្ណោះស្ត្រីជាប្រពន្ធបានសម្រេចចិត្តថា មិនប្ដឹងផ្ដល់នោះឡើយ នាងបានចាត់ទុកថា វាជាកំហុសអចេតនា ហើយនគរបាលបង្ក្រាបវង់ល្បែងក៏ដើម្បីរក្សាសន្តិសុខជូនប្រជាពលរដ្ឋ ប្រសិនបើនាងប្ដឹងក៏ប្ដីរបស់នាងមិនរស់ឡើងវិញដែរ ។
ដោយឡែកមន្ត្រីនគរបាលដែលចុះទៅបង្ក្រាបបទល្មើស ហើយមានបញ្ហាដោយអចេតនានេះ មិនទាន់ដឹងថា មានចំណាត់ការបែបណានៅឡើយទេ ព្រោះកំពុងស្ថិតនៅក្នុងការសាកសួរនៅឡើយ ។ គួរបញ្ជាក់ផងដែរថា កាលពីវេលាម៉ោង១១នាទីព្រឹកថ្ងៃ២១ ខែមករានេះ នៅចំណុចខាងក្រោយផ្សារកាណាស៊ីធី ស្ថិតនៅក្នុងភូមិចោមចៅ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ កម្លាំងនគរបាលផ្នែកអន្តរាគមន៍ខណ្ឌពោធិ៍សែនជ័យបានចុះបង្ក្រាបសង្វៀនជល់មាន់ និងវង់អាប៉ោងមួយ ។
ខណៈនោះរអិលដួលបណ្ដាលឲ្យជ្រុះកាំភ្លើងខ្លី១ដើម ឃើញបែបនេះអ្នកលេងល្បែងបានរត់ទៅរើសកាំភ្លើងនោះ ហើយដោយសារតែខ្លាចជននេះរើសកាំភ្លើងតដៃទើបនគរបាលបានសម្រេចចិត្តបាញ់ឡើងលើ ជាការគម្រាម តែជាអកុសលបានធ្វើឲ្យគ្រាប់កាំភ្លើងហោះទៅត្រូវបុរសម្នាក់ដែលកំពុងឈរនៅលើជាន់ទី៣ ផ្ទះជួលបណ្ដាលឲ្យស្លាប់ភ្លាមៗតែម្ដង ។ បុរសដែលស្លាប់នោះឈ្មោះសៀក រ៉ន អាយុ៣៣ឆ្នាំ មុខរបរកម្មកររោងចក្រ មានស្រុកកំណើតនៅក្នុងឃុំដុង ស្រុកបរសេដ្ឋ ខេត្តកំពង់ស្ពឺ ។ ដែលត្រូវគ្រាប់កាំភ្លើង២គ្រាប់ចំបំពង់.កជនរងគ្រោះ ហើយមានប្រពន្ធឈ្មោះនុប ផាន្នី អាយុ២៧ឆ្នាំ មុខរបរកម្មការិនីរោងចក្រកាត់ដេរ មានទីលំនៅក្នុងភូមិសែនឱក ឃុំគុស ស្រុកត្រាំកក់ ខេត្តតាកែវ តែពេលកើតហេតុស្ថិតនៅបន្ទប់ជួល ៕
ចែករំលែកព័តមាននេះ