ខេត្តពោធិ៍សាត់ ៖ យ៉ាងហោចណាស់មនុស្សម្នាក់បានស្លាប់នៅនឹងកន្លែងកើតហេតុ និង៣នាក់ទៀតរងរបួសធ្ងន់ និងស្រាល ដោយគ្រោះថ្នាក់ចរាចររថយន្ដចុះចំណោតហ្វ្រាំងមិនស៊ីក្រឡាប់៤-៥ត្រលប់ ។
គ្រោះថ្នាក់ចរាចរនេះបានកើតឡើងលើកំណាត់ផ្លូវជាតិលេខ៥៥ ត្រង់ចំណុចភ្នំចិនយំ ស្ថិតក្នុងភូមិស្ទឹងថ្មី ឃុំប្រមោយ ស្រុកវាលវែង កាលពីវេលាម៉ោង០២និង១៤នាទីរំលងអធ្រាត្រ ឈានចូលថ្ងៃទី២២ ខែមករា ឆ្នាំ២០១៨ ។
នគរបាលប៉ុស្តិ៍រដ្ឋបាលប្រមោយ បានឲ្យដឹងថា នៅវេលាយប់នោះ មានរថយន្ដមួយគ្រឿងម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ចាម ៣A-០០៩៧ ដឹកអំពៅធ្វើដំណើរពីលិចទៅកើត គឺពីស្រុកវាលវែង សំដៅទៅទីរួមខេត្តពោធិ៍សាត់ ។
ទៅដល់កន្លែងកើតហេតុ ត្រង់ចំណុចភ្នំចិនយំ ផ្លូវកោង រថយន្ដបានចុះចំណោតជាន់ហ្វ្រាំងមិនស៊ីក្រឡាប់៤-៥ត្រលប់ធ្លាក់ពីលើផ្លូវកម្ពស់ប្រមាណជាង១០ម៉ែត្រ បណ្ដាលឲ្យសង្កត់អ្នកជិះក្នុងរថយន្ដស្លាប់ម្នាក់ របួសធ្ងន់ស្រាលចំនួន៣នាក់ យ៉ាងអាណោចអាធ័ម ។
សមត្ថកិច្ចឲ្យដឹងថា ជនរងគ្រោះទី១.ឈ្មោះ ផល ភេទប្រុស អាយុ២៣ឆ្នាំ ជាអ្នកបើកបរ (ស្លាប់), ទី២.ឈ្មោះ ជួន ជឿន ភេទប្រុស អាយុ៥៥ឆ្នាំ, ទី៣.ឈ្មោះ ជឿន វិសិដ្ឋ ភេទប្រុស អាយុ២៨ឆ្នាំនិងទី៤.ឈ្មោះ អាត់ ពៅ ភេទស្រី អាយុ៥២ឆ្នាំ អ្នកទាំង៣រងរបួសធ្ងន់ស្រាល ។ ជនរងគ្រោះទាំងអស់ជាគ្រួសារតែមួយ រស់នៅភូមិទេពអរជូន ឃុំកោះខែល ស្រុកស្អាង ខេត្តកណ្ដាល ។
បច្ចុប្បន្ន ជនរងគ្រោះទាំង៣នាក់ដែលរងរបួសធ្ងន់ និងស្រាល កំពុងសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់ ឬឯសាកសពសមត្ថកិច្ចបានស្រាវជ្រាវរកក្រុមគ្រួសារដើម្បីប្រគល់ជូនយកទៅធ្វើបុណ្យតាមប្រពៃណី ៕
ចែករំលែកព័តមាននេះ