ខេត្តស្ទឹងត្រែង ៖ កាក់សំណល់រាយប៉ាយលើចញ្ចើមផ្លូវហៀហូរមកលើផ្លូវទីសាធារណៈ ក្នុងក្រុងស្ទឹងត្រែង ជាក្តីកង្វល់មួយ នៃការជះក្លិនស្អុយដល់អ្នកដំណើរ និងអ្នករស់នៅក្បែរនោះ ហើយអ្វីដែលសំខាន់ គឺបរិស្ថាន និងសុខភាពប្រជាពលរដ្ឋ ។
មន្ត្រីរាជការជុំវិញខេត្តនគរបាលអាវុធហត្ថខេត្តបានធ្វើយុទ្ធនាការប្រមូលសំរាមតាមទីសាធារណៈ និងជុំវិញផ្សារខេត្តស្ទឹងត្រែង ដើម្បីជាការបំផុសដល់ប្រជាពលរដ្ឋឱ្យចេះទុកដាក់សំរាមយ៉ាងណានោះ ការបំផុសបំផុលមិនទាន់មានប្រសិទ្ធភាព ក្នុងការទុកដាក់កាកសំណល់ឱ្យត្រឹមត្រូវ ដូចអ្វីដែលអាជ្ញាធរខេត្តចង់បាននោះឡើយ ។
អភិបាលក្រុងស្ទឹងត្រែងធ្លាប់មានប្រសាសន៍ប្រកាសណែនាំ និងអំពាវនាវដល់ប្រជាពលរដ្ឋនៅជុំវិញផ្សារស្ទឹងត្រែង ជួយធ្វើយ៉ាងណាឱ្យចេះប្រមូលសំរាមទុកដាក់ឱ្យបានត្រឹមត្រូវកុំឲ្យរាយប៉ាយពាសវាលពាសកាល តែជនមួយក្តាប់តូចនូវ តែបង្កលក្ខណៈបោះចោលសំរាមគ្មានសណ្តាប់ធ្នាប់តាមទីសាធារណៈ ធ្វើឱ្យខូចបរិស្ថាន ប៉ះពាល់ដល់សុខភាពថែមទៀតផង ។
មតិខ្លះលើកឡើងថា ៖ សាលាក្រុងគួរតែមានវិធានការរឹតបន្តឹងបន្ថែមទៀត លើការចោលកាក សំណល់យ៉ាងអាណាធិបតេយ្យដោយមានអ្នកឃ្លាំមើល ធ្វើការផាកពិន័យធ្ងន់ធ្ងរទៅលើជនចោលសំរាមគ្មានសណ្តាប់ធ្នាប់ គឺពិន័យយ៉ាងតិចពី២០ម៉ឺនរៀល ទៅ៤០ម៉ឺនក្នុងការចោលសំរាមនៅទីសាធារណៈម្តងៗ ដើម្បីឲ្យរាងចាល កុំចេះតែចោលសំរាមប៉ាតណាប៉ាតណីធ្វើឱ្យខូចបរិស្ថានក្រុងអស់ ។
លោក លី មីណា អភិបាលរងក្រុងបានឱ្យដឹងនាព្រឹកថ្ងៃទី២២ ខែមករា ឆ្នាំ២០១៨ នេះថា៖ គាត់ទទួល ស្គាល់លើបញ្ហាសំរាមនេះមានភាពអាណាធិបតេយ្យមែន នេះដោយសាលាក្រុងខ្វះ លទ្ធភាពជួលកម្មករ បន្ថែមទៀត ដែលរាល់ថ្ងៃមានតែកម្មករ១២នាក់ប៉ុណ្ណោះក្នុងការប្រមូលសំរាម ទី២ប្រជាពលរដ្ឋ មិនចូលរួម ក្នុងវិចខ្ចប់សំរាម ចេះតែយកមកចោលតាមទីសាធារណៈ ដែលពួកគាត់ គេចវេះ ពីការបង់លុយ លើសំរាមដែលមានឡានសំរាមជាអ្នកប្រមូលតាមផ្ទះ។
លោកបន្តថា ការធ្វើយុទ្ធនាការប្រមូលកាកសំណល់ជុំវិញក្រុងស្ទឹងត្រែងនេះ គឺជារៀងរាល់១ខែម្តង ឬ៣ខែម្តង ដើម្បីជាការដាស់តឿនក្រើនរំលឹកដល់ពលរដ្ឋឲ្យចេះជួយសំអាតបរិស្ថាន ចេះទុកដាក់សំរាមឱ្យបានត្រឹមត្រូវ ។
លោកអភិបាលរងក្រុងបន្តថា ចំពោះការផាកពិន័យ គឺយើងមានអនុក្រិត្យលេខ១១៣ ស្តីពីការគ្រប់គ្រងសំរាម ដែលការពិន័យនេះ មិនមែនពិន័យត្រឹមតែ២០ម៉ឺន ទៅ៤០ម៉ឺនរៀលនោះទេ គឺពិន័យជាប្រាក់រហូតដល់៤លានរៀន ឯណោះ និងបញ្ជូនសំណុំរឿងទៅតុលាការថែមទៀត តែមិនទាន់អាចអនុវត្តបាននៅឡើយ ៕
ចែករំលែកព័តមាននេះ