រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការចុះបង្ក្រាបពីកម្លាំងកងរាជអាវុធហត្ថខេត្តស្វាយរៀង សហការជាមួយអាវុធហត្ថរាជធានី ក្នុងករណីគ្រឿងញៀនមួយដ៏ធំបានជាបន្តបន្ទាប់គ្នា ប្រតិបត្តិការនេះ ធ្វើឡើងកាលពីព្រឹកថ្ងៃទី២២ មករា ក្នុងនោះ ឃាត់ខ្លួនជនសង្ស័យបានជាច្រើននាក់ និងដកហូតវត្ថុតាងថ្នាំញៀនជាច្រើនគីឡូ ព្រមទាំងមានកាំភ្លើងខ្លីផងដែរ ។
ទោះបីជាយ៉ាងណា ជនសង្ស័យខាងលើមិនទាន់ត្រូវបានស្គាល់អត្តសញ្ញាណនោះឡើយ ប៉ុន្តែគ្រាន់តែដឹងថា ការបង្ក្រាបនេះដំបូងឡើយបានផ្តើមចេញពីកម្លាំងកងរាជអាវុធហត្ថខេត្តស្វាយរៀង ទើបបែកធ្លាយមកដល់រាជធានីភ្នំពេញ ១-នៅក្នុងខណ្ឌមានជ័យ និង២-ខណ្ឌជ្រោយចង្វារ និងមានកន្លែងផ្សេងៗទៀត ។ ប្រភពបន្តទៀតថា ដោយឡែកនៅក្នុងខណ្ឌមានជ័យវិញ កម្លាំងឃាត់ជនសង្ស័យបានម្នាក់ក្នុងបន្ទប់ជួលភូមិព្រៃគង់២ សង្កាត់ចាក់អង្រែលើ ខណ្ឌមានជ័យ ដកហូតថ្នាំញៀនបានជិត៧គីឡូក្រាម ។
រីឯ នៅខណ្ឌជ្រោយចង្វារវិញ កម្លាំងឃាត់ខ្លួនជនសង្ស័យបាន៧នាក់ សុទ្ធតែជនជាតិវៀតណាម ស្ថិតនៅក្នុងខុនដូមួយកន្លែងជាន់ទី១៤ និងដកហូតវត្ថុតាងមានរុក្ខជាតិក្រៀម២កញ្ចប់, ម្សៅក្រាមពណ៌សថ្លា ចំនួន ៦កញ្ចប់ធំ ទម្ងន់ ៤៩,១ ក្រាម, ថ្នាំគ្រាប់ពណ៌ទឹកក្រូច មានទម្ងន់ ១៨៩,៦ ក្រាម, ខ្សែកលោហធាតុពណ៌ខៀវ ១ខ្សែ, អាវុធ ១ដើម ម៉ាក P២៣០ គ្រាប់ ៧ បង់១, ពិលឡាស៊ែ ១, ទូរស័ព្ទ ២គ្រឿង, ម៉ូតូ ១គ្រឿង, រថយន្ត ១គ្រឿង, ប្រាក់ ៨៥០០ដុល្លារ និង ៤៥០ ០០០រៀល និងលុយដុងមួយចំនួន ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ