រាជធានីភ្នំពេញ ៖ ជនជាតិចិនម្នាក់បើករថយន្តបុកម៉ូតូ បណ្ដាលឲ្យស្លាប់ម្នាក់ពេលបញ្ជូនទៅមន្ទីរពេទ្យបានពាក់កណ្ដាលផ្លូវ និងម្នាក់ទៀតរងរបួសធ្ងន់ កាលវេលាម៉ោង១០និង៥០នាទីយប់ ថ្ងៃទី២១ ខែមករា ឆ្នាំ២០១៨ តាមបណ្ដោយផ្លូវជាតិលេខ៤ នៅមុខខ្លោងទ្វារវត្តអរុណវតី ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កម៉ាកលុចស៊ីស៤៧០ ពណ៌ខ្មៅ ពាក់ស្លាកលេខ ភ្នំពេញ ២N-៨៨៧៧ បើកបរដោយជនជាតិចិន បើកក្នុងទិសដៅពីលិចទៅកើត ។ ម៉ូតូរងគ្រោះម៉ាកឌ្រីមសង់ ស៊េរី២០១៦ ពណ៌ទឹកមាស ពាក់ស្លាកលេខ ភ្នំពេញ ១FT-០៧០៤ ជិះគ្នា២នាក់បើកក្នុងទិសដៅពីកើតទៅលិច ។
ជនរងគ្រោះស្លាប់ឈ្មោះ បូ ពិសាល ភេទប្រុស អាយុ៣៤ឆ្នាំ មុខបរជាងដែក ស្នាក់នៅម្តុំផ្សាត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិពងពស់ ឃុំរោងដំរី ស្រុកបាភ្នំ ខេត្តព្រៃវែង និងម្នាក់ទៀតរបួសធ្ងន់ មិនបានស្គាល់ឈ្មោះនៅឡើយ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បាននិយាយថា នៅមុនពេលកើតហេតុ គេឃើញជនរងគ្រោះជិះម៉ូតូម៉ាកឌ្រីមសង់ ស៊េរី២០១៦ ពណ៌ខ្មៅ បើកក្នុងទិសដៅពីលិចទៅកើតដោយជិះគ្នា២នាក់ក្នុងល្បឿនមធ្យម ដោយផ្លូវជាតិខាងលើមានសភាពខូចខាតមានជង្ហុកធំៗ ហើយដោយភ្លើងម៉ូតូចុះឡើងៗ បន្ទាប់មកជនរងគ្រោះខាងលើបើកមកដល់ចំណុចកើតហេតុ ស្រាប់តែមានរថយន្តម៉ាកលុចស៊ីស៤៧០ខាងលើ បើកដោយបុរសជនជាតិចិនម្នាក់ បើកចៀសពីជង្ហុក ហើយរេចង្កូតមកផ្នែកខាងឆ្វេង ហើយបុកម៉ូតូជនរងគ្រោះចំថ្ពល់រថយន្តផ្នែកខាងឆ្វេងពេញទំហឹង និងបណ្ដាលឲ្យបុកអូស ប្រមាណជាង១០ម៉ែត្រ បណ្តាលឲ្យម៉ូតូជនរងគ្រោះរួញមួយកំណាត់មុខ ចំណែកឯជនរងគ្រោះម្នាក់របួសធ្ងន់ដកដង្ហើមចង្រិត និងម្នាក់ទៀតរបួសធ្ងន់ ត្រូវបានរថយន្តសង្គ្រោះឯកជនដឹកយកទៅសង្គ្រោះ តែអកុសលបើបានពាក់កណ្ដាលផ្លូវអ្នករងរបួសដកដង្ហើមចង្រិតបានដាច់ខ្យល់ស្លាប់បាត់ ហើយជនរងគ្រោះរបួសធ្ងន់ត្រូវបានរថយន្តដឹកយកទៅសង្គ្រោះមន្ទីពេទ្យឯកជនមួយទៀត តែជនរងគ្រោះរបួសធ្ងន់ពេក មន្ទីរពេទ្យឯកជននោះបានដឹកយកទៅសង្គ្រោះបន្តនៅមន្ទីពេទ្យព្រះកុសុមៈ ។
ប្រភពព័ត៌មានបានបន្តទៀតថា ខណៈពេលបុកភ្លាមៗ រថយន្តជនជាតិចិនខាងលើមិនព្រមឈប់ បានបើករត់ចេញពីកន្លែងកើតហេតុ ដោយបើកចូលក្នុងបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ ដោយរត់ចូលឃ្លាំងមួយកន្លែងគេចខ្លួនបាត់ ទុករថយន្តនៅតាមផ្លូវ ហើយត្រូវបានប្រជាពលរដ្ឋរាយការណ៍ប្រាប់សមត្ថកិច្ចភ្លាមៗផងដែរ ។
ក្រោយពេលកើតហេតុ ជំនាញចរាចរខណ្ឌពោធិ៍សែនជ័យ បានប្រគល់ឲ្យជំនាញចរាចរណ៍ធានីភ្នំពេញ ដើម្បីធ្វើការវាស់វែង និងយកម៉ូតូព្រមទាំងស្ទូចរថយន្តបង្កខាងលើ យកទៅទុកផ្នែកចរាចរណ៍ផ្លូវគោករាជធានីភ្នំពេញ រង់ចាំម្ចាស់ចេញមុខដោះស្រាយថ្ងៃក្រោយ ៕
ចែករំលែកព័តមាននេះ