ខេត្តកណ្តាល ៖ សេចក្តីរាយការណ៍បន្ថែម ជុំវិញករណីចាក់សម្លាប់អ្នកកាសែតម្នាក់ នៅបន្ទប់លេខ១១ ក្នុងផ្ទះសំណាក់យីហោ «សំណាងណាស់» ក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល ត្រូវប្រភពឱ្យដឹង គិតត្រឹមម៉ោង១២ថ្ងៃត្រង់ទី២២ មករា ដដែលនេះថា ជនរងគ្រោះដែលស្លាប់ គឺមានប្រពន្ធ២នាក់ ។ ជនរងគ្រោះមានមុខរបរចំនួន៣ ក្នុងនោះ ១-ជាភ្នាក់ងារសារព័ត៌មានសម្លេងប្រជាជន ២-បើកហាងម៉ាស្សា និងកោសជប់ និងទី៣-ជាមន្ត្រីយោធា នៅអង្គភាពកងពលតូចទ័ពពិសេសឆត្រយោង៩១១ផងដែរ ។ ហើយគេកំពុងមានការសង្ស័យថា មុនសម្លាប់ជនរងគ្រោះ ឃាតករបានដាក់ថ្នាំងងុយដេកនៅក្នុងអ្វីមួយឱ្យជនរងគ្រោះផឹករហូតដល់គាត់ដេកលក់មិនដឹងខ្លួន ក៏ចាក់សម្លាប់តែម្ដង ។
ទោះបីជាយ៉ាងណា នៅមិនទាន់ដឹងនៅឡើយថា ស្ត្រីដែលគាត់ដឹកចូលផ្ទះសំណាក់ គឺជាប្រពន្ធចុង ឬក៏ជាស្រីស្នេហ៍ផ្សេងទៀតឡើយ ។ ប្រភពបានបន្តថា មិនតែប៉ុណ្ណោះ នៅនឹងកន្លែងកើតហេតុ មានបន្សល់ទុកកាំបិតចុងស្រួចប្រឡាក់ឈាម១ និងសម្ភារមួយចំនួនទៀត ហើយសង្ស័យថា ករណីនេះ ជាអំពើប្លន់សម្លាប់យកទ្រព្យសម្បត្តិផងដែរ ។
បើតាមការឲ្យដឹងពីក្រុមគ្រួសារជនរងគ្រោះវិញថា ទ្រព្យសម្បត្តិដែលបានបាត់ មានម៉ូតូ១គ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ , ខ្សែ.កប្លាទីន១ខ្សែ ទម្ងន់២តម្លឹង, ចិញ្ចៀនត្រាមាស១តម្លឹង និងលុយចំនួន១,២០០ដុល្លារ ព្រមទាំងសម្ភារៈមួយចំនួនទៀត សរុបជាទឹកប្រាក់ប្រហែលជាង៧ពាន់ដុល្លារ។
ដោយឡែក យុវជនម្នាក់ដែលត្រូវជាកូនបានឲ្យដឹងថា ឪពុករបស់ខ្លួនមានប្រពន្ធចុងម្នាក់ទៀត និងតែងតែបានទៅស្នាក់នៅជាមួយប្រពន្ធចុងនោះច្រើន ជាងស្នាក់នៅផ្ទះចាស់ ដោយយូរមកផ្ទះម្ដងទេ ។ ប៉ុន្តែថ្វី
ដ្បិតតែគាត់មិនសូវនៅរួមរស់ជាមួយក្រុមគ្រួសារពិតមែន តែនៅតែមានការទំនាក់ទំនងគ្នាជាប់មិនដាច់គាត់តែងខលរកកូនៗ និងប្រពន្ធដើមរហូត ។ មិនតែប៉ុណ្ណោះ ឪពុកខ្លួនហ៊ានខ្លាំងណាស់ អត់ចេះខ្លាចនរណាទេទៅណាមកណាតែងតែទៅម្នាក់ឯងប៉ុណ្ណោះ ទើបមានគ្រោះថ្នាក់បែបនេះ។
ប្រភពដដែលបន្តឲ្យដឹងទៀតថា ជាក់ស្ដែង កាលពីវេលាម៉ោង១១ និង៣០នាទីថ្ងៃត្រង់ថ្ងៃទី២១ មករា ដែលជាថ្ងៃកើតហេតុខាងលើ គាត់បានខលមកខ្លួនម្ដង ហើយក្រោយមកស្រាប់តែខលលែងចូលរហូតតែម្ដង ។ ពេលនោះបានធ្វើឲ្យពួកគេមានការព្រួយបារម្ភយ៉ាងខ្លាំង លុះដល់វេលាយប់ស្រាប់តែទទួលដំណឹងថាឪពុកត្រូវគេចាក់សម្លាប់បាត់ទៅហើយដែលជាដំណឹងមួយក្ដុកក្ដួលខ្លាំងណាស់។
ក្រុមគ្រួសារសពបានស្ដីបន្ទោសដល់ម្ចាស់ផ្ទះសំណាក់ ដែលមានការធ្វែសប្រហែសដោយនៅពេលជនរងគ្រោះចូលទៅដេកមានគ្នា២នាក់ ។ លុះពេលចេញមកវិញតែម្នាក់ បែរជាម្ចាស់ផ្ទះសំណាក់នេះ មិនមានការសង្ស័យហើយឃាត់សួរនាំសិនទេ មិនតែប៉ុណ្ណោះបណ្ដោយឱ្យឃាតករយកម៉ូតូជនរងគ្រោះជិះគេចខ្លួនបាត់ទៀត ។
ចែករំលែកព័តមាននេះ