រាជធានីភ្នំពេញ ៖ នាវេលាម៉ោង១១និង០០នាទីព្រឹកថ្ងៃទី២១ ខែមករា ឆ្នាំ២០១៨ នេះ ម្ចាស់ផ្ទះ២ខ្នងក្នុងចំណោមលំនៅឋាន៤ខ្នង ដែលត្រូវបានអគ្គីភ័យឆាបឆេះបំផ្លាញអស់ស្ទើរទាំងស្រុង នាវេលាទាបភ្លឺថ្ងៃខែឆ្នាំដដែល បានមកដាក់ពាក្យបណ្តឹងនៅប៉ុស្តិ៍រដ្ឋបាលនគរបាលព្រែកប្រា ដើម្បីសុំឲ្យសមត្ថកិច្ចអន្តរាគមន៍ ក្រោយម្ចាស់ផ្ទះរូបនោះអះអាងថា មានសាក្សីឃើញអ្នកប្រព្រឹត្តិលួចដុតបំផ្លាញលំនៅឋានខ្លួនរហូតឆេះអស់ហ្មត់ និងរាលដាលដល់លំនៅឋានពលរដ្ឋក្បែរខាងអស់២ខ្នងបន្ថែមទៀត ។
ស្ត្រីជាម្ចាស់ផ្ទះមានឈ្មោះ ឡុង ស្រីពៅ អាយុ៣០ឆ្នាំ មុខរបរជាអ្នកលក់ដូរស៊ុប មានទីលំនៅក្រុមទី៥ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ (ចំណុចកើតហេតុ) ។ ចំពោះមុខសមត្ថកិច្ច ស្ត្រីខាងលើបានអះអាងថា មូលហេតុដែលខ្លួនសម្រេចមកដាក់ពាក្យបណ្តឹងនៅប៉ុស្តិ៍រដ្ឋបាលខាងលើ គឺដោយសារមានសាក្សីនៅក្បែរនោះ ឃើញមនុស្សប្រុស២នាក់ជិះម៉ូតូមិនចាំម៉ាកមួយគ្រឿងចាកចេញពីកន្លែងកើតហេតុយ៉ាងលឿនបំផុត លុះមួយសន្ទុះក្រោយមកក៏ស្រាប់តែមានជាអណ្តាតភ្លើងឆាបឆេះឡើងយ៉ាងសន្ធោសន្ធៅតែម្តង ។
ប៉ុន្តែសាក្សីដែលបានឃើញនោះ ពុំបានចាំមុខជនទាំង២នាក់នោះពិតប្រាកដនោះទេ គ្រាន់តែត្រឹមបានឃើញជិះចាកចេញទៅហើយ ក៏មានរឿងហេតុកើតឡើងតេម្តងទៅ ។ លោក ឡូ ភារម្យ នាយប៉ុស្តិ៍រដ្ឋបាលនគរបាលព្រែកប្រា បានសម្រេចទទួលពាក្យបណ្តឹងរបស់ស្ត្រីជាម្ចាស់ផ្ទះបណ្តោះអាសន្នសិន រង់ចាំសាកសក្សីដែលបានឃើញហេតុការណ៍ចូលមកបំភ្លឺតាមក្រោយបន្ថែមទៀត ស្តីពីអ្វីដែលរូបគេបានឃើញ ។
លោកបន្ថែមថា តាមការអង្កេតឃើញជាក់ស្តែង សាក្សីដែលបានឃើញហេតុការណ៍ គឺគ្រាន់តែបានឃើញមនុស្សជិះឆ្លងកាត់ផ្ទះរបស់ខ្លួន (ដែលមានទីតាំងក្បែរកន្លែងកើតហេតុ) ជិះទៅក្នុងល្បឿនលឿនប៉ុន្តែ ដោយមិនបានឃើញថា អ្នកទាំង២នាក់ដែលជិះទៅលឿននោះ ជាអ្នកដែលបានលួចដុត ដូចការសង្ស័យរបស់ម្ចាស់ផ្ទះនោះឡើយ ហើយក៏មិនបានឃើញថា ជនទាំង២ជិះចេញពីណាទៅណាឲ្យប្រាកដនោះដែរ ។
ដោយឡែកមន្ត្រីការិយាល័យពន្លត់ និងបង្ការគ្រោះមហន្តរាយអគ្គីភ័យ នៃស្នងការដ្ឋាននគរបាលរាជធានីភ្នំពេញ ក៏ពុំទាន់បញ្ជាក់បានថា ករណីខាងលើនេះ ផ្តើមចេញពីមូលហេតុអ្វីឲ្យប្រាកដនោះដែរ រង់ចាំកម្លាំងជំនាញធ្វើកោសល្យវិច្ច័យបន្តសិន ។
គួររំឭកថា លំនៅឋានចំនួន៤ខ្នងផ្ទះ ត្រូវបានគ្រោះមហន្តរាយអគ្គីភ័យលេបត្របាក់បំផ្លាញអស់ស្ទើរហ្មត់ទាំងស្រុង កាលពីវេលាម៉ោង០៣និង០០នាទីទាបភ្លឺ ថ្ងៃទី២១ ខែមករា ឆ្នាំ២០១៧ នៅតាមបណ្ដោយផ្លូវលេខ៣៦៩ (ផ្លូវព្រែកប្រា) ក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ ។
តាមសម្តីរៀបរាប់របស់ម្ចាស់ផ្ទះលក់ស៊ុបដែលឆាបឆេះដំបូងគេ បានបញ្ជាក់ថា មុនកើតហេតុ គាត់បានឮសូរសំឡេងផ្ទុះនៅខាងក្រោមផ្ទះ លុះឮដូចនេះហើយ គាត់ក៏បានសំដៅទៅបើកភ្លើងអំពូល ដើម្បីចុះទៅមើល ស្រាប់តែភ្លើងត្រូវបានដាច់ហើយក៏ធុំក្លិនឈ្ងៀម ។ ភ្លាមនោះគាត់បានយកភ្លើងទូរស័ព្ទបញ្ចាំងមើល ក៏ឃើញមានភ្លើងឆេះ ទើបស្រែកផ្អើលឆោឡោឲ្យបងប្អូននៅក្នុងផ្ទះស្រវេស្រវារត់ចេញមកខាងក្រៅ ស្រែកហៅឲ្យគេឯងជួយ បង្កឲ្យមានការភ្ញាក់ផ្អើលឡើងតែម្តង ៕
ចែករំលែកព័តមាននេះ