រាជធានីភ្នំពេញ ៖ នគរបាលអន្តរាគមន៍ខណ្ឌពោធិ៍សែនជ័យ បានធ្វើប្រតិបត្តិការគួរឱ្យភ្ញាក់ផ្អើលមួយក្នុងការបង្ក្រាបសង្វៀនបញ្ជល់មាន់មួយកន្លែង រហូតមានការផ្ទុះអាវុធជាច្រើនគ្រាប់ បណ្តាលឱ្យត្រូវបុរសម្នាក់ចំនួន២គ្រាប់ចំបំពង់.កដួលស្លាប់នៅលើជាន់ទី៣នៃផ្ទះជួលមួយកន្លែង ។
អ្វីដែលគួរឱ្យសង្វេគក្នុងចិត្តនោះគឺស្ត្រីជាប្រពន្ធបានស្រែកយំបោកប្រាណស្តាយជីវិតប្តី មិនគួរស្លាប់បែបនេះទេ និងប្រកាសថា គាត់មិនសុខចិត្តទេ ដោយសំណូមពរឲ្យនគរបាលមានការទទួលខុសត្រូវចំពោះការស្លាប់របស់ប្ដីគាត់ ព្រោះនៅសុខៗមកបាញ់សម្លាប់ប្ដីគាត់បែបនេះ ។ ហេតុការណ៍នោះបានកើតឡើងកាលពីវេលាម៉ោង១១នាទីព្រឹកថ្ងៃ២១ មករា នៅចំណុចខាងក្រោយផ្សារកាណាស៊ីធី ស្ថិតនៅក្នុងភូមិចោមចៅសង្កាត់ចោមចៅ២ ខណ្ឌពោធិ៍សែនជ័យ ។ បុរសដែលត្រូវគ្រាប់ស្លាប់ឈ្មោះ សៀក រ៉ន អាយុ៣៣ឆ្នាំ មុខរបរកម្មកររោងចក្រមានស្រុកកំណើតនៅឃុំដូង ស្រុកបរសេដ្ឋ ខេត្តកំពង់ស្ពឺ ត្រូវគ្រាប់កាំភ្លើង២គ្រាប់ចំបំពង់ក ។ ជនរងគ្រោះមានប្រពន្ធឈ្មោះ នុប ផាន្នី អាយុ២៧ឆ្នាំ ជាកម្មការិនីរោងចក្រកាត់ដេរ មានទីលំនៅក្នុងភូមិសែនឱក ឃុំគុស ស្រុកត្រាំកក់ ខេត្តតាកែវ ។ ទាំង២នាក់ប្ដីប្រពន្ធមានកូនប្រុសម្នាក់ និងកូនស្រីម្នាក់នៅក្នុងបន្ទុកគ្រួសារ ហើយសព្វថ្ងៃស្នាក់នៅបន្ទប់ផ្ទះជួលកើតហេតុខាងលើ ។
ប្រជាពលរដ្ឋបាននិយាយថា នៅមុនពេលកើតហេតុក្រោយពីត្រឡប់មកពីទិញម្ហូបវិញបុរសរងគ្រោះបានឡើងទៅឈរនៅមុខបន្ទប់ផ្ទះជួល ។ ខណៈនោះស្រាប់តែកម្លាំងនគរបាលដែលលើកទ័ពចុះទៅបង្ក្រាបសង្វៀនបញ្ជល់មាន់និងអាប៉ោងនៅក្បែរនោះ ហើយមានការផ្ទុះអាវុធជាច្រើនគ្រាប់ដើម្បីចាប់អ្នកលេងល្បែង បណ្ដាលឲ្យទៅត្រូវជនរងគ្រោះដែលមិនមែនជាអ្នកលេងល្បែងចំបំពង់ក២គ្រាប់ស្លាប់ភ្លាមៗនៅនឹងកន្លែង ។ ប៉ុន្តែក្រោយពេលកើតហេតុនគរបាលបានស្រែកតាមវិទ្យុទាក់ទង ហៅរថយន្តសង្គ្រោះឲ្យទៅដឹកជនរងគ្រោះទៅមន្ទីរពេទ្យ ដោយនិយាយថា ពេលឮស្នូរគ្រាប់កាំភ្លើង ធ្វើឲ្យជនរងគ្រោះស្លុតពេកខ្យល់គទៅវិញ ។
ប្រភពដដែលបានបន្តទៀតថា ពេលនោះរថយន្តពេទ្យបានដឹកជនរងគ្រោះទៅកាន់មន្ទីរពេទ្យព្រះកុសុមៈ ប៉ុន្តែពេលទៅដល់គ្រូពេទ្យបានប្រាប់ថាស្លាប់ហើយ ទើបដឹកត្រឡប់ទៅកាន់ឈាបនដ្ឋានវត្តពោធិ៍ចិនតុង ដើម្បីឲ្យនគរបាលដោះស្រាយនិងធ្វើកោសល្យវិច័យ ។អ្នកនៅភូមិកើតហេតុនិយាយថា បើប៉ូលិសបាញ់មេឃបង្អើល គឺគ្មានទុក្ខសោកបែបនេះទេ ប៉ុន្តែបាញ់បង្អើលទាបពេកទើបទៅត្រូវមនុស្ស ។
ចែករំលែកព័តមាននេះ