រាជធានីភ្នំពេញ ៖ យោងតាមរបាយការណ៍អគ្គនាយកដ្ឋានអត្តសញ្ញាណកម្មក្នុងសន្និបាតត្រួតពិនិត្យលទ្ធផលការងារអត្តសញ្ញាណកម្មរយៈពេល៣ឆ្នាំ គឺ២០១៤-២០១៧ នៅក្រសួងមហាផ្ទៃនាព្រឹកថ្ងៃទី២២ ខែមករា ឆ្នាំ២០១៨ បានឲ្យដឹងថា ជាលទ្ធផលជាក់ស្តែងចាប់ពីឆ្នាំ២០១៤-២០១៧ ។
ការងារសញ្ជាតិសម្រេចបានដោយទទួលបានព្រះរាជក្រឹត្យផ្តល់សញ្ជាតិតូបនីយកម្មចំនួន១.១០៨ច្បាប់ ក្នុងនោះមាន ៖ តាមរយៈវិនិយោគទុនចំនួន១.០៥០ច្បាប់ស្មើនឹង១.០៦៨រូប, ស្នាក់នៅ០៧ឆ្នាំចំនួន៥៤ករណីស្មើនឹង៦៤រូប, ស្នាដៃពិសេសចំនួន៤ករណីស្មើនឹង៤រូប, ទទួលបានព្រះរាជក្រឹត្យលើការទាមទារសញ្ជាតិ និងលះបង់សញ្ជាតិបានចំនួន១០០ច្បាប់ស្មើនឹង១០១នាក់ ក្នុងនោះមានតាមរយៈអាពាហ៍ពិពាហ៍ចំនួន៣១ច្បាប់ស្មើនឹង៣១រូប, លះបង់សញ្ជាតិចំនួន៦៩ច្បាប់ស្មើនឹង៧០រូប, បានជូនជនបរទេសដែលបានទទួលព្រះរាជក្រឹត្យចូលសញ្ជាតិខ្មែរទៅធ្វើសម្បថចំពោះមុខតុលាការកំពូលចំនួន៧លើកស្មើនឹង៣៥១រូប ។
ក្នុងការចុះបញ្ជីអត្តសញ្ញាប័ណ្ណសញ្ជាតិខ្មែរតាមប្រព័ន្ធនេះ នាពេលកន្លងមក ប្រព័ន្ធបានរកឃើញទិន្ន័យស្ទួនប្រមាណជាង៤០ម៉ឺននាក់មានន័យថា យើងអាចទប់ស្កាត់បាននូវការប៉ុនប៉ងធ្វើអត្តសញ្ញាណប័ណ្ណសញ្ជាតិខ្មែរដោយកែប្រែទិន្នន័យបុគ្គលខុសពីអត្តសញ្ញាណប័ណ្ណដើម។
ជាលទ្ធផលចាប់ពីឆ្នាំ២០១៤-២០១៧ ការងារអត្តសញ្ញាណប័ណ្ណសញ្ជាតិខ្មែរសម្រេចបាន ៖ អត្តសញ្ញាណប័ណ្ណសញ្ជាតិខ្មែរចំនួប៩.៧៥១.៩៣៤សន្លឹក ត្រូវបោះពុម្ព និងបានផ្តល់ជូនប្រជាពលរដ្ឋប្រើប្រាស់។ ក្រសួងមហាផ្ទៃបានបញ្ជូនទិន្នន័យអត្តសញ្ញាណប័ណ្ណសញ្ជាតិខ្មែរចំនួប៦លើកស្មើនឹង៩.៧១៨.៩៣០នាក់ជូនគណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់ធ្វើជាមូលដ្ឋានក្នុងការផ្ទៀងផ្ទាត់រៀបចំទិន្នន័យក្នុងបញ្ជីបោះជាតិថ្មី៕
ចែករំលែកព័តមាននេះ