ខេត្តកំពង់ចាម ៖ ដំណាំថ្នាំជក់ ជារបរតជំនាន់របស់ប្រជាពលរដ្ឋនៅស្រុកកំពង់សៀម តាំងពីបុរាណកាលមក ។ រហូតដល់បច្ចុប្បន្ន អ្នកស្រុកនេះនៅតែបន្ដដាំដុះប្រភេទថ្នាំកាតាបនិងថ្នាំខ្លាំងដដែល តែមិនសូវសម្បូរដូចមុនទេ ព្រោះតែទីផ្សារលក់បានថោក ។
លោក វ័រ សារុំ អាយុ៧១ឆ្នាំ រស់នៅភូមិទី៣ ឃុំកោះសំរោង ស្រុកកំពង់សៀម មានប្រសាសន៍នៅរសៀលថ្ងៃទី១០ មករា ថា លោកមានស្រុកកំណើតនៅភូមិនេះតែម្តង ដោយឪពុកម្តាយរបស់លោកបានប្រកបរបរដាំថ្នាំជក់រាល់ឆ្នាំ ក្រោយរដូវទឹកទន្លេមេគង្គបានស្រកទៅវិញ ចំណែកលោកផ្ទាល់បានរៀនដាំដុះ ហើយនៅតែបន្តរបរនេះដដែល ។
លោកបន្តថា រាល់ថ្ងៃ លោកបានដាំថ្នាំជក់ចំនួន៣កន្លែងស្មើជាង១ម៉ឺនដើម ដោយប្រើរយៈពេល៣ខែវានឹងហុចផល ។ លោកបាននាំកូនចៅទៅកាច់ដើម្បីហាលឲ្យស្ងួតល្អ និងហាន់ទុកលក់ ។
លោកថា ៖« កាលពីឆ្នាំ២០១៧កន្លងទៅខ្ញុំធ្វើបានជាង២០០គីឡូក្រាមជាប្រភេទថ្នាំខ្លាំង ហើយមានគេមកទិញដោយក្នុង១គីឡូក្រាមតម្លៃជាង១ម៉ឺនរៀល គ្រាន់ដោះស្រាយជីវភាពស្ទើរបានគ្រប់គ្រាន់ ។ ដោយឡែក ដីចម្ការនៅភូមិទី១និងទី២ ត្រូវបានបាក់ចូលទៅក្នុងទន្លេមេគង្គអស់ ហើយអ្នកនៅទីនោះក៏មិនបានបង្កបង្កើនផលដាំដុះដំណាំបន្តទៀតដែរ ។ រីឯក្មេងៗសព្វថ្ងៃនេះ ច្រើនតែនាំគ្នាចេញទៅរកស៊ីនៅស្រុកឆ្ងាយៗដើម្បីរកប្រាក់មកផ្តត់ផ្គង់ជីវភាព សូម្បីតែកូនប្រុសស្រីរបស់ខ្ញុំ រួមទាំងចៅតូចម្នាក់បានទៅស៊ីឈ្មួលគេនៅប្រទេសថៃបាត់ទៅហើយ លុះពេលមានរដូវបុណ្យទានម្តងៗ ទើបត្រឡប់មកផ្ទះវិញ » ។
លោកបានត្អូញត្អែរថា កម្លាំងរបស់លោកបានចុះខ្សោយបន្ដិចម្ដងៗ មិនដូចកាលពីមុនទៀតទេ គឺវាចេះតែថមថយពីមួយឆ្នាំទៅមួយឆ្នាំ ។ សម្រាប់ទីផ្សារនៅឆ្នាំ២០១៨នេះ លោកមានក្តីរំពឹងថា តម្លៃថ្នាំខ្លាំងមិនធ្លាក់ចុះទេ គឺប្រហាក់ប្រហែលនឹងឆ្នាំទៅដែរ ។
លោក សន សុខ មេឃុំកោះសំរោង មានប្រសាសន៍ថា ប្រជាពលរដ្ឋនៅឃុំរបស់លោកបានបន្តប្រពៃណីដាំថ្នាំជក់តាំងពីដូនតាមកដល់សព្វថ្ងៃនេះ ។ បច្ចុប្បន្ន ក្នុងប្រទេសកម្ពុជាបានរៀបចំទិវាលុបបំបាត់ថ្នាំជក់ ហើយអាជ្ញាធរកំពុងតែមានផែនការឲ្យពលរដ្ឋដាំដំណាំឆ្លាស់ក្នុងនោះមានដូចជា ពោត និងត្រសក់វិញ ព្រោះមានគម្រោងគាំទ្រពី ADB ហើយពេលបានផល នឹងជួយរកទីផ្សារឲ្យថែមទៀត ។ ផែនការនេះនឹងធ្វើឡើងដើម្បីជួយដល់អ្នកស្រុកកុំឲ្យមានចំណាកស្រុក ។
លោក គឹម សាវឿន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តវិញ មានប្រសាសន៍ដែរថា សម្រាប់ដំណាំថ្នាំជក់នៅក្នុងឆ្នាំ២០១៨នេះ នៅតាមបណ្តាស្រុកមួយចំនួននៅតាមដងទន្លេមេគង្គ គឺដាំបានប្រមាណ១.៩០០ហិកតាក្នុងចំណោមផ្ទៃដីជាង៣.៤០០ហិកតា ស្មើនឹង៥៨%នៃផែនការ បើប្រៀបធៀបទៅនឹងឆ្នាំ២០១៧ មានចំនួនប្រហាក់ប្រហែលគ្នា។ ចំពោះតម្លៃទីផ្សារវិញ គឺមានប្រជាកសិករមួយចំនួនបានធ្វើការជាមួយក្រុមហ៊ុន BAT អាស្រ័យទៅតាមពេលវេលា និងគុណភាពសន្លឹកថ្នាំជក់ ។
ផលប៉ះពាល់សុខភាពដោយសារថ្នាំជក់ បានបណ្ដាលឲ្យមនុស្សស្លាប់មុនអាយុរហូតដល់១៥ឆ្នាំ ហើយមនុស្សប្រមាណ៧,២លាននាក់បានស្លាប់ជារៀងរាល់ឆ្នាំនៅក្នុងប្រទេសកំពុងអភិវឌ្ឍន៍ ។ នេះបើតាមលោកសាស្ត្រាចារ្យ អឹុង ភិរុណ រដ្ឋលេខាធិការក្រសួងសុខាភិបាលបានថ្លែងកាលពីពេលថ្មីៗនេះ ។
លោកសាស្ត្រាចារ្យបន្ដថា ការប្រើប្រាស់ថ្នាំជក់ បានកើនឡើងនូវថ្លៃចំណាយប្រចាំគ្រួសារ ថ្លៃព្យាបាលជំងឺដែលបណ្ដាលមកពីការប្រើប្រាស់ថ្នាំជក់ ខណៈផលិតផលថ្នាំជក់កាន់តែមានតម្លៃសមរម្យ, ការផ្សព្វផ្សាយក៏កាន់តែទាក់ទាញតាមរយៈនារីផ្សព្វផ្សាយជាដើម ។
លោកថ្លែងថា ៖« ដើម្បីកាត់បន្ថយការអត្រាឈឺ និងស្លាប់ដោយសារការប្រើប្រាស់ថ្នាំជក់នៅកម្ពុជាឲ្យកាន់តែមានប្រសិទ្ធភាព និងធានាឲ្យបាននូវនិរន្ដរភាពការងារត្រួតពិនិត្យផលិតផលថ្នាំជក់ គឺទាមទារឲ្យមានការគាំទ្រការប្ដេជ្ញាចិត្តខ្ពស់ពីភាគីពាក់ព័ន្ធរួមមាន អ្នកបង្កើតគោលនយោបាយសុខភាពសាធារណៈ និងគណៈកម្មការត្រួតពិនិត្យផលិតផលថ្នាំជក់ថ្នាក់ជាតិនិងថ្នាក់ក្រោមជាតិ ព្រមទាំងអង្គការដៃគូនានា ក្នុងការបង្កើត និងអនុវត្តច្បាប់ និងលិខិតបទដ្ឋាគតិយុត្តនានាទាក់ទងនឹងការត្រួតពិនិត្យផលិតផលថ្នាំជក់»។
កាលពីឆ្នាំ២០១៦ រាជរដ្ឋាភិបាលបានប្រកាសឲ្យប្រើប្រាស់អនុក្រឹត្យស្ដីពីវិធានការហាម ការជក់ ឬការបង្ហុយផ្សែងផលិតផលថ្នាំជក់នៅកន្លែងធ្វើការ ឬទីសាធារណៈ ដោយមានទាំងការផាកពិន័យដល់បុគ្គលដែលប្រព្រឹត្តល្មើស ប៉ុន្តែការអនុវត្តនេះ ពុំទាន់ទទួលបានជោគជ័យនៅឡើយ ។
យោងតាមរបាយការណ៍របស់អង្គការសុខភាពពិភពលោក (WHO) បានបង្ហាញថា នៅលើពិភពលោក មានមនុស្សស្លាប់ប្រមាណ៧,២លាននាក់ជារៀងរាល់ឆ្នាំ ក្នុងនោះកម្ពុជាមានមនុស្ស១ម៉ឺននាក់បានស្លាប់ជារៀងរាល់ឆ្នាំ ដោយសារការប្រើប្រាស់ថ្នាំជក់ ៕
ចែករំលែកព័តមាននេះ