រាជធានីភ្នំពេញ ៖ មន្ត្រីក្រសួងពាណិជ្ជកម្ម បានឱ្យដឹងថា បច្ចុប្បន្ន ទំនិញកម្ពុជាភាគច្រើននាំចូលទៅចិនអត់បង់ពន្ធ តែនៅជាប់បញ្ហាអនាម័យនិងភូតគាមអនាម័យ ខណៈដែលភាគីចិនតម្រូវឱ្យមានទាំងអនាម័យ និងស្តង់ដាអន្តរជាតិ។ ដើម្បីឆ្លើយតបនឹងបញ្ហានេះ ក៏ដូចជាលើកកម្ពស់ផលិតផលក្នុងស្រុក ក្រសួងគ្រោងនឹងបង្កើតក្រុមការងារត្រួតពិនិត្យមួយក្នុងពេលឆាប់ៗខាងមុខ ដើម្បីធ្វើការជាមួយភាគីចិន ។
មន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍កាលពីថ្ងៃទី១៨ មករា កន្លងមកថា សព្វថ្ងៃនេះ ទំនិញកម្ពុជាភាគច្រើននាំចេញទៅចិនអត់តម្រូវឲ្យបង់ពន្ធទេ ប៉ុន្តែជាប់បញ្ហាអនាម័យ និងភូតគាមអនាម័យទៅលើផលិតផលមួយចំនួន ព្រោះចិនត្រូវការឱ្យទំនិញបរទេសនាំចូលជាទំនិញដែលគោរពតាមស្តង់ដាអន្តរជាតិ ។
លោកបន្ដថា បន្ទាប់ពីរដ្ឋមន្ត្រីក្រសួងពាណិជ្ជកម្ម ចុះហត្ថលេខាលើអនុស្សរណៈយោគយល់គ្នាសម្រាប់កិច្ចសហប្រតិបត្តិការលើកកម្ពស់គុណភាពផលិតផលជាមួយភាគីចិនហើយនោះ ក្រសួងគ្រោងបង្កើតក្រុមការងារត្រួតពិនិត្យគុណភាពផលិត ដែលមានមន្ត្រីមកពីអន្តរក្រសួងពាក់ព័ន្ធចូលរួមធ្វើការងារជាមួយភាគីចិន ដើម្បីត្រួតពិនិត្យទំនិញចេញ-ចូល និងចែករំលែកបទពិសោធន៍ត្រួតពិនិត្យផលិតផលទៅវិញទៅមក ឱ្យស្របទៅតាមខ្លឹមសារនៃអនុស្សរណៈយោគយល់គ្នារវាងប្រទេសទាំងពីរកម្ពុជា-ចិន ។
លោក ស៊ាង ថៃ សង្កត់ធ្ងន់ថា ៖« យើងមិនត្រឹមតែពិនិត្យលើអនាម័យ និងភូតគាមអនាម័យទេ ត្រូវពិនិត្យទាំងស្តង់ដាផលិតផលថា តើផលិតផលទាំងនោះគោរពតាមស្តង់ដាអន្តរជាតិឬទេ ។ក្រៅពីនេះ ប្រទេសនីមួយៗគេក៏ធ្វើដូចយើងដែរ គឺស្វែងរកក្រុមហ៊ុនណាដែលផលិតនូវផលិតផលក្លែងក្លាយ ត្រូវកត់ត្រានៅក្នុងបញ្ជីដើម្បីផ្តល់ព័ត៌មានឱ្យគ្នាទៅវិញទៅមក » ។
លោកបន្តថា ៖« ពេលយើងបង្កើតក្រុមការងារបាន ហើយនឹងធ្វើការទំនាក់ទំនងជាមួយចិន ដើម្បីផ្លាស់ប្តូរព័ត៌មាន, ទស្សនកិច្ចសិក្សា, ប្តូរបទពិសោធន៍ ដើម្បីឱ្យទំនិញយើងមានលំហូរកាន់តែល្អនាពេលអនាគត » ។
អនុស្សរណៈយោគយល់គ្នាសម្រាប់កិច្ចសហប្រតិបត្តិការលើកកម្ពស់គុណភាពផលិតផលជាមួយភាគីចិន បានចូលជាធរមានចាប់ពីថ្ងៃចុះហត្ថលេខា កាលពីថ្ងៃទី១១ មករា កន្លងមក។ អនុស្សរណៈនេះមានសុពលភាពរយៈពេល៣ឆ្នាំ ហើយក្រោយរយៈពេល៣ឆ្នាំ បើគ្មានភាគីណាចង់លុបទេ វានឹងបន្ត៣ឆ្នាំបន្ថែមទៀត ។ នេះបើតាមលោក ស៊ាង ថៃ។
លោកស្រី កែវ មុំ ប្រធានសមាគមសហគ្រិនស្ត្រីកម្ពុជា បានមានប្រសាសន៍ថា ចំពោះចំណីអាហារចាំបាច់ត្រូវមានស្តង់ដា និងមានការបញ្ជាក់គុណភាព សុវត្ថិភាពចំណីអាហារ អនាម័យ និងភូតគាមអនាម័យនេះ ។ ភូតគាមអនាម័យ ពិតជារបាំងមួយហៅថា របាំងដ៏រឹងមាំខ្លាំងដែលពិបាកនឹងងាយឆ្លងផុតចំពោះឧស្សាហកម្ម ខ្នាតតូច និងមធ្យមនៅប្រទេសកម្ពុជា ។
លោកស្រីបន្តថា ៖« រឿងអនាម័យ និងភូតគាមអនាម័យ ប្រទេសគេអនុញ្ញាតឱ្យនាំចូល គេឆែកមើលគ្រប់ជំហាន ត្រួតពិនិត្យម្តងហើយម្តងទៀត ។ មុននឹងយើងនាំចូល គេមកយកផលិតផលយើងត្រួតពិនិត្យគុណភាព ទម្រាំស្នើសុំនាំចូលទៅបាន ត្រូវចំណាយពេលជាង១ឆ្នាំ។ នៅពេលទៅដល់ប្រទេសគេហើយ គេមិនទាន់ឱ្យចូលទៀត ត្រូវបើកកុងតឺន័រយកផលិតផលយើងទៅត្រួតពិនិត្យគុណភាពថា ពិតមានស្តង់ដា អនាម័យហើយបានគេឱ្យយើងចូល » ។
លោកបណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម បានមានប្រសាសន៍ថា ការយល់ដឹងជាសាធារណៈពាក់ព័ន្ធអនាម័យ និងភូតគាមអនាម័យនេះ មិនថានៅកម្ពុជាទេ នៅប្រទេសផ្សេងទៀតក៏ដូចគ្នា គឺនៅមានកម្រិតនៅឡើយ ។
សម្រាប់សហគ្រាសធុនតូច និងមធ្យមកម្ពុជា ដែលចង់ដឹងពីបញ្ហាអនាម័យ និងភូតគាមអនាម័យនេះ អាចទាក់ទងមកខាងអគ្គនាយកដ្ឋានកសិកម្ម ដើម្បីពិភាក្សាធ្វើយ៉ាងម៉េចឱ្យទទួលបានជោគជ័យ ដោយអាចអនុលោមភាពទៅតាមលក្ខខណ្ឌតម្រូវអនាម័យ និងភូតគាមអនាម័យ ៕
ចែករំលែកព័តមាននេះ