ខេត្តកំពង់ធំ ៖ ហេតុការណ៍ភ្ញាក់ផ្អើលមួយបានកើតឡើងកាលពីវេលាម៉ោង០៧និង២០នាទីយប់ ថ្ងៃទី២០ ខែមករា ឆ្នាំ២០១៨ ស្ថិតក្នុងផ្ទះរបស់ស្ត្រីរងគ្រោះ នៅក្នុងភូមិស្រយ៉ូវត្បូង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។
សពស្ត្រីរងគ្រោះឈ្មោះ ជុក សុភី អាយុ៣៤ឆ្នាំ មុខរបរមេផ្ទះ រស់នៅភូមិ-សង្កាត់កើតហេតុខាងលើ បានធ្វើអត្តឃាតចង.កសម្លាប់ខ្លួននៅលើផ្ទះ ។
តាមប្រភពព័ត៌មានពី លោកអនុសេនីយ៍ត្រី ស៊ឹម ពិសិទ្ធ នាយរងប៉ុស្តិ៍ស្រយ៉ូវ បានឲ្យដឹងថា ករណីស្ត្រីឈ្មោះ ជុក សុភី ចង.កសម្លាប់ខ្លួនខាងលើនេះ ស្ត្រីរងគ្រោះមានកូនចំនួនបីនាក់សុទ្ធតែស្រីៗ បើតាមការចុះសួរនាំរបស់សមត្ថកិច្ចយើង ដោយមូលហេតុតូចចិត្តខឹងនឹងប្តីឈ្មោះ ឃិន សារី អាយុ៤៤ឆ្នាំ បានខូចទូរស័ព្ធរបស់ខ្លួន ហើយក៏បានយកទូរស័ព្ទរបស់ប្រពន្ធមកប្រើ ក៏បណ្ដាលឲ្យមានការឈ្លោះប្រកែកគ្នាបន្តិចបន្តួច ហើយប្តីរបស់នាងក៏ឲ្យទូរស័ព្ទនោះមកនាងវិញ រួចចុះពីលើផ្ទះដើរទៅបាត់បានមួយសន្ទុះ ក៏ត្រលប់មកផ្ទះវិញ ស្រាប់តែឃើញប្រពន្ធបានយកស្បង់លោកទៅចង.កសម្លាប់ខ្លួននឹងធ្នឹមផ្ទះស្លាប់យ៉ាងអាណោចអាធ័ម ខណៈនាងបានមុជទឹក និងស្លៀករ៉ូបយ៉ាងស្អាតបាតទៀតមុននឹងចង.កសម្លាប់ខ្លួន ។
ក្រោយពីកើតហេតុ សមត្ថកិច្ចបានធ្វើពិនិត្យថា ពិតជាស្លាប់ដោយសារចង.កសម្លាប់ខ្លួនពិតមែន ហើយមានធុំក្លិនស្រាផង ប្រហែលជានាងផឹកស្រានៅមុនពេលចង.កសម្លាប់ខ្លួន រួចក៏ប្រគល់សាកសពឲ្យសាច់ញាតិបងប្អូនចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ