ខេត្តប៉ៃលិន ៖ រថយន្តដឹកផ្លែស្វាយជាង២០តោន ១គ្រឿង បានទទួលរងការខូចខាតស្ទើរតែទាំងស្រុង ដោយដេកផ្ងារជើងចាក់ផ្លែស្វាយ លើចិញ្ចើមផ្លូវ មុខផ្ទះប្រជាពលរដ្ឋ ខណៈបើកបរក្នុងល្បឿនលឿន លុះដាច់ហ្វ្រាំងផ្លូវចុះចំណោតផងជាន់មិនស៊ី ក៏បើកបំបុករង្វង់មូលត្បូងទទឹម តែម្តង ។ ហេតុការណ៍បានកើតឡើងកាលពីវេលាម៉ោង២និង៣០នាទីរសៀល ថ្ងៃទី២១ ខែមករា ស្ថិតនៅបណ្តោយផ្លូវជាតិលេខ៥៧ ក្នុងភូមិអូរតាប្រាង សង្កាត់ប៉ៃលិន ក្រុងប៉ៃលិន ។
អ្នកបើកបររថយន្តខាងលើអត់ស្គាល់អត្តសញ្ញាណ បន្ទាប់ពីកើតហេតុបានរត់គេចខ្លួន ដោយបើករថយន្តដឹកផ្លែស្វាយជាង២០តោន ពាក់ស្លាកលេខកំពង់ចាម ៣A-៣៥០០ រស់នៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ។
ប្រភពព័ត៌មានបានឱ្យដឹងថា មុនពេលកើតហេតុ រថយន្តខាងលើ បើកក្នុងទិសដៅពីកើតទៅលិច ដោយល្បឿនយ៉ាងលឿនបម្រុងនឹងដឹកផ្លែស្វាយទៅលក់ដូរនៅប្រទេសថៃ ស្រាប់តែដល់ភូមិដីក្រហម អ្នកបើករថយន្តជាន់ហ្វ្រាំងអត់ស៊ី ហើយរថយន្តដល់ផ្លូវចុះចំណោតផង ភូមិអូរតាប្រាង ស្រាប់តែឃើញមានម៉ូតូ និងរថយន្តកំពុងនៅក្បែររង្វង់មូលត្បូងទទឹម ទើបខំប្រឹងបួងចង្កូតបំបុករង្វង់មូលតែម្តង ដើម្បីជៀសវាងបុកម៉ូតូ និងរថយន្ត ទើបបណ្តាលឱ្យរថយន្តរងការខូចខាតទាំងស្រុងបែកស៊ីតែនម៉ាស៊ូត ហូរពេញផ្លូវបាក់ដែកភ្លៅកង់ខ្ទេចខ្ទី ។
ប្រភពបន្តទៀតថា អ្នកបើកបររថយន្តរងរបួសស្រាល ហើយក៏រត់គេចខ្លួនបាត់ស្រមោល រីឯផ្លែស្វាយត្រូវបានថៅកែយករថយន្ត១គ្រឿងទៀតមកផ្ទេរបន្ត ដើម្បីយកទៅលក់នៅប្រទេសថៃ ។ ចំណែករថយន្តត្រូវបានគេស្ទូចយកទៅជួសជុលនៅក្នុងក្រុងប៉ៃលិន ៕
ចែករំលែកព័តមាននេះ