ទីភ្នាក់ងារព័ត៌មានរុស្ស៊ី SPUTNIK បានចេញផ្សាយនាពេលថ្មីៗនេះនូវអត្ថបទមួយ ដើម្បីជាការយល់ដឹងពីបណ្តាយន្តហោះដែលមានអានុភាពខ្លាំង និងមានប្រសិទ្ធភាពខ្ពស់ក្នុងការវាយប្រហារមកលើដី ។
បណ្តាយន្តហោះវាយប្រហារមកលើដី ជួយគាំទ្រដល់ប្រតិបត្តិការនានារបស់កងទ័ពជើងគោក មានលក្ខណសម្បត្តិ៣យ៉ាងគឺ ល្បឿនមិនសូវលឿន មានប្លាំងដាស(BLINDAGE)រឹងមាំ និងមានសព្វាវុធខ្លាំង ។ បទពិសោធន៍នៃបណ្តាជម្លោះនាពាក់កណ្តាលទី២នៃសតវត្សរ៍ទី២០ និងបណ្តាសង្គ្រាមដំបូងៗនាដើមសតវត្សទី២១ បង្ហាញថា យន្តហោះសាមញ្ញទាំងនេះហោះយឺតៗ ហើយមានសណ្ឋានមិនសូវស្អាត តែអាចបំពេញបេសកកម្មប្រយុទ្ធនៅកន្លែងដែលបណ្តាយន្តហោះទំនើបៗ និងលឿនៗប្រើពុំមានប្រសិទ្ធភាព ។
SPUTNIK បានបង្ហាញយន្តហោះវាយប្រហារមកលើដីខ្លាំងៗបំផុតដែលកំពុងប្រើប្រាស់ដោយកងទ័ពប្រទេសផ្សេងៗដូចខាងក្រោម ៖
យន្តហោះ A-10 THUNDERBOLT II
បើប្រៀបធៀបទៅនឹងយន្តហោះប្រដេញធុន F-15 និង F-16 យន្តហោះវាយប្រហារមកលើដីអាមេរិកធុន A-10 មើលទៅហាក់ហោះយឺតៗ និងពុំមានប្រសិទ្ធភាព ។ ប៉ុន្តែក្នុងប្រតិបត្តិការព្យុះវាលខ្សាច់របស់អាេមរិកនៅអុីរ៉ាក់បង្ហាញផ្ទុយពីនេះ ។ យោងតាមពួកទាហានអាមេរិកថា យន្តហោះធុនA-10 ចំនួន១៥០គ្រឿង អាចកម្ទេចរថក្រោះអ៊ីរ៉ាក់ដល់ទៅជាង៣.០០០គ្រឿង រយៈពេលតែ៧ខែនៃយុទ្ធនាការនេះ ។
យន្តហោះប្រភេទនេះតែ៧គ្រឿងប៉ុណ្ណោះ ត្រូវកងកម្លាំងការពារអាកាសអុីរ៉ាក់បាញ់ធ្លាក់ ។
យន្តហោះA-10 បំពាក់ដោយកាណុងមានអានុភាពខ្លាំងធុនGAU-8 ដែលអាចបាញ់គ្រាប់ទំហំ៣០មីល្លីម៉ែត្រទៅលើគូសត្រូវដល់ទៅ៧០គ្រាប់ក្នុង១វិនាទី ។ ម្យ៉ាងវិញទៀត យន្តហោះប្រភេទនេះ អាចបំពាក់មីស៊ីលបញ្ជា ឬមិនបញ្ជាគ្រាប់បែក ព្រមទាំងប្រព័ន្ធកាំភ្លើងធំផងដែរ ។
យន្តហោះធុន SU-25 របស់រុស្ស៊ី
យន្តហោះវាយប្រហារមកលើដីរបស់រុស្ស៊ីធុនSU-25 ចេញហោះហើរលើកដំបូងនៅថ្ងៃ
ទី២២ ខែកុម្ភៈ ឆ្នាំ១៩៧៥ ហើយចាប់តាំងពីពេលនោះមក បន្តបំពាក់ឱ្យកងទ័ពរបស់
ប្រទេសជាង២០ ។ យន្តហោះប្រភេទនេះមានលំនឹងល្អ ហើយមានអានុភាពខ្លាំង ។
យន្តហោះSU-25 មានគ្រឿងសព្វាវុធខ្លាំងគឺកាណុងបាញ់ពីលើអាកាស គ្រាប់បែកទម្លាក់ពីលើ បណ្តាមីស៊ីលបញ្ជានិងមិនបញ្ជាអាកាស-ដី ព្រមទាំងមីស៊ីលអាកាស-អាកាស ។ សរុបទៅ យន្តហោះប្រភេទនេះអាចបំពាក់អាវុធ៣២ប្រភេទ ដោយពុំរាប់បញ្ចូលកាណុងកាំភ្លើងធំរបស់វាទំហំ៣០មីល្លីម៉ែត្រGCH-30-2 ។
យន្តហោះSU-25 ក៏កំណត់ដែរពីកម្រិតខ្ពស់នៃកិច្ចការពារ ។ កាប៊ីនអ្នកបើកបរការពារដោយប្លាំងដាស(BLINDAGE ) ធ្វើពី TITANE កម្រាស់ពី១០ទៅ២៤មីល្លីម៉ែត្រ ។
យន្តហោះប្រភេទនេះបង្ហាញពីអានុភាព និងប្រសិទ្ធភាពរបស់វានៅអាហ្វហ្គានីស្ថាន ។ ល្បឿនរបស់វាយឺត អាចវាយប្រហារលើបណ្តាគោលដៅក្នុងតំបន់ភ្នំ ។ ក្នុងរយៈពេល១០ឆ្នាំ យន្តហោះធុន SU-25 តែ២៣គ្រឿងប៉ុណ្ណោះត្រូវបាញ់ធ្លាក់ ។ សង្គ្រាមនៅអាហ្វហ្គានីស្ថាន បានផ្តល់រហស្សនាមដល់យន្តហោះនេះថា «រថក្រោះហោះ» ។
យន្តហោះ EMB-314 SUPER TUCANO
បើប្រៀបធៀបទៅនឹងយន្តហោះ SU-25 និងA-10 ដែលបំពាក់អាវុធយ៉ាងច្រើននោះ យន្តហោះធុនស្រាលវាយប្រហារមកលើដីរបស់ប្រេស៊ីលប្រភេទSUPER TUCANO មើលទៅហាក់ដូចជាយន្តហោះសម្រាប់ហ្វឹកហ្វឺនខាងកីឡា ។ ប៉ុន្តែក្រោយមក វាត្រូវបានធ្វើឱ្យទំនើប កាប៊ីនអ្នកបើកបរការពារដោយប្លាំងដាស KEVLAR ហើយបំពាក់ដោយកាំភ្លើងយន្តធុនធ្ងន់១២,៧មីល្លីម៉ែត្រ២ដើម ។
យន្តហោះប្រភេទនេះ អាចទម្លាក់គ្រាប់មីស៊ីល និងគ្រាប់បែកមិនបញ្ជា ដែលបង្ហាញពីប្រសិទ្ធភាពពិសេសក្នុងការតស៊ូប្រឆាំងពួកឧទ្ទាម។ រដ្ឋាភិបាលកូឡុំប៊ីបានប្រើប្រាស់យន្តហោះទាំងនេះ ដើម្បីប្រឆាំងពួកអ្នករត់ពន្ធគ្រឿងញៀន ។
យន្តហោះធុន ALPHA JET
យន្តហោះវាយប្រហារមកលើដី ALPHA JET ផលិតដោយក្រុមហ៊ុនយន្តហោះអាល្លឺម៉ង់ DORNIER និងក្រុមហ៊ុនយន្តហោះបារាំង DASSAULT-BREGUET ចាប់តាំងពីឆ្នាំ១៩៧៧មក និងបានប្រើប្រាស់នៅក្នុងកងទ័ពរបស់ប្រទេសចំនួន១៤ ។ យន្តហោះប្រភេទនេះសម្រាប់វាយប្រហារគោលដៅលើដីអចល័ត ឬចល័ត ជាពិសេសលើទីលានប្រយុទ្ធ និងទីតាំងការពារយុទ្ធសាស្ត្រ ។
ALPHA JET អាចផ្ទុកអាវុធទម្ងន់រហូតដល់២,៥តោន ។ វាអាចបំពាកា់កាណុងទំហំ៣០មីល្លីម៉ែត្រ DEFA 553 កាណុងទំហំ២៧មីល្លីម៉ែត្រ MAUSER ឬកាំភ្លើងធុន១២,៧មីល្លីម៉ែត្រ២ដើម ។ ម្យ៉ាងទៀត យន្តហោះប្រភេទនេះ មានបំពាក់គ្រាប់បែកទម្លាក់ទម្ងន់៤០០គីឡូក្រាម បណ្តាគ្រាប់បែកឆេះ និងមីស៊ីលទំហំ៧០មីល្លីម៉ែត្រ ។
ចែករំលែកព័តមាននេះ