រាជធានីភ្នំពេញ ៖ អ្នកនាងខាត់ សុឃីម បានស្នើឲ្យម្ចាស់កម្មវិធីទាំងឡាយគួររៀបចំពិធី «បុកល័ក្ត»នៅលើក្នុងមង្គលការ ព្រោះជាប្រពៃណីដើមតាំងពីបុរាណមក ។ ការស្នើសុំពីអ្នកនាងខាត់ សុឃីម…
រាជធានីភ្នំពេញ ៖ អ្នកនាងខាត់ សុឃីម បានស្នើឲ្យម្ចាស់កម្មវិធីទាំងឡាយគួររៀបចំពិធី «បុកល័ក្ត»នៅលើក្នុងមង្គលការ ព្រោះជាប្រពៃណីដើមតាំងពីបុរាណមក ។
ការស្នើសុំពីអ្នកនាងខាត់ សុឃីម ស្របពេលពីធីបុកល័ក្តក្នុងពិធីរៀបអាពាហ៍ពិពាហ៍ខ្មែរ ត្រូវគេកាត់ចោលស្ទើរតែគ្រប់មង្គលការ ។ ការកាត់ពីធីនេះ គឺមានទស្សនៈ ផ្សេងៗគ្នាបានលើកឡើង ដោយក្នុងនោះមានខ្លះយល់ថា ការរៀបចំពិធីគឺត្រូវចំណាយច្រើន និងប្រើពេលវេលាយូរ ណាមួយមិនសូវមានអ្នកជំនាញលើផ្នែកនេះ ។
ទោះជាយ៉ាងណាក្តី ក្នុងនាមជាអ្នកសិល្បៈផ្នែកបុរាណមួយរូបអ្នកនាងខាត់ សុឃីម ស្នើឲ្យម្ចាស់មង្គលការនានា គួររៀបចំពិធីនេះឡើងវិញទៅតាមលទ្ធភាពដែលខ្លួនមាន ព្រោះបើមិនដូច្នោះទេវានឹងអាចបាត់បង់ និងកូនខ្មែរជំនាន់ក្រោយមិនស្គាល់ប្រពៃណីមួយនេះ ។
អ្នកនាងខាត់ សុឃីម អះអាងថា«កម្មវិធីបុកល័ក្ត ជាទម្រង់មួយយ៉ាងសំខាន់ក្នុងពិធីឮមង្គលការ ដែលកេរដំណែលមួយនេះបង្កប់អត្ថន័យអប់រំទូន្មានកូនប្រុសកូនស្រី ចេះទ្រាំអត់ធ្មត់ និងប្រតិបត្តិគោរពស្វាមីភរិយារស់នៅជាមួយគ្នាដោយមានសុភមង្គល ។
សាមីកម្មវិធីដែលបានប្រារព្ធពីធីនេះឡើង ដូចបានចូលរួមលើកតម្លៃ និងថែរក្សាប្រពៃណីវប្បធម៌ជាតិខ្មែរយើងរីកចំរើនបន្ថែមទៀត ដូចពាក្យស្លោកថា វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន »។
ពិធីបុកល័ក្តនៅក្នុងមង្គលការខ្មែរនាពេលបច្ចុប្បន្នគេសង្កេតឃើញមានការរៀបចំតែនៅក្នុងពិធីមង្គលការអ្នកដែលមានបុណ្យសក្តិ និងអ្នកមានទ្រព្យសម្បត្តិស្កុកស្តម្ភប៉ុណ្ណោះ ចំណែកក្នុងពិធីមង្គលការអ្នកសាមញ្ញ គឺមិនឃើញមានរៀបចំទេ ។
តាមប្រពៃណីខ្មែរ ពិធីមង្គលការដែលរៀបចំទៅប្រកបដោយលក្ខណៈពេញលេញ និងត្រឹមត្រូវនោះ គឺត្រូវរៀបចំជាពិធីដូចជា ដង្ហែកូនកំលោះចូលរោងផ្កាស្លា(ផ្ទះខាងស្រី) ការបេះផ្កាស្លា ការលើកកំណត់ ស៊ីស្លា មើលពេលាកូនប្រុស-ស្រី ការហែឡើងអ្នកតា ពិធីកាត់សក់ ការដង្ហែកូនប្រុស-ស្រីទៅងូតទឹក ការសែនក្រុងពលី ការសែនចងដៃទោល ពិធីជុំពេលា ជាវខាន់ស្លា ពិធីបុកល័ក្ត ការរៀបរៀងផ្លែឈើ ការដោតផ្កាស្លា ការសំពះពលី(ជិតភ្លឺ) ការដង្ហែកូនប្រុសទៅកន្លែងផ្ទឹម ការសំពះផ្កាស្លា ការផ្ទឹម(ចងដៃបង្វិលពពិល បាចផ្កាស្លា) ការទប់ទឹកសាកន្ទេល(តោងជាយស្បៃកូនក្រមុំចូលបន្ទប់) ការសែនលាបំណន់ តាដុងយាយជ័យ និងពិធីផ្សំដំណេក ជាដើម ៕
ចែករំលែកព័តមាននេះ