រាជធានីភ្នំពេញ ៖ ក្នុងឆ្នាំ២០១៧ ក្រសួងរៀបចំដែនដី នគរូបនីយកម្ម និងសំណង់ រកចំណូលបានចំនួនជាង៩០លានដុល្លារចាក់បញ្ចូលទៅក្នុងថវិកាជាតិ តាមរយៈការផ្ដល់សេវាផ្នែកសុរិយោដី, សេវាសំណង់, សេវាជួលទីតាំងរោងចក្រ…
រាជធានីភ្នំពេញ ៖ ក្នុងឆ្នាំ២០១៧ ក្រសួងរៀបចំដែនដី នគរូបនីយកម្ម និងសំណង់ រកចំណូលបានចំនួនជាង៩០លានដុល្លារចាក់បញ្ចូលទៅក្នុងថវិកាជាតិ តាមរយៈការផ្ដល់សេវាផ្នែកសុរិយោដី, សេវាសំណង់, សេវាជួលទីតាំងរោងចក្រ សហគ្រាស និងពន្ធលើការផ្ទេរអចលនទ្រព្យ តាមរយៈមន្ទីរក្រោមឱវាទនៅទូទាំងប្រទេស ។ នេះបើតាមរបាយការណ៍បូកសរុបប្រចាំឆ្នាំ២០១៧ របស់ក្រសួង ។ ក្នុងនោះ ខេត្តដែលរកចំណូលបានច្រើនជាងគេមាន ខេត្តព្រះសីហនុ, កណ្ដាល និងខេត្តកំពង់ចាម ។
ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ លោក នួន ប៉ុក បានលើកឡើងថា ក្នុងឆ្នាំ២០១៧កន្លងទៅ មន្ទីរបានចេញលិខិតអនុញ្ញាតសាងសង់លំនៅឋានគ្រប់ប្រភេទត្រឹមថ្នាក់ខេត្ត និងប្លង់មកពីច្រកចេញចូលតែមួយ មានទុនវិនិយោគស្មើនឹងប្រមាណ៦៩លានដុល្លារ ។ លោកថា ៖« មន្ទីរសម្រេចបានការងារប្រមូលសេវាសាធារណៈពីផ្នែកសំណង់, សុរិយោដី និងចំណូលពន្ធប្រថាប់ត្រាបានជាង២៦ពាន់លានរៀល ឬស្មើប្រមាណ៦លានដុល្លារក្នុងឆ្នាំ២០១៧ » ។
ដោយឡែក មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្ដាល បានរកចំណូលជូនរដ្ឋមានទឹកប្រាក់ប្រមាណជាង២ពាន់លានរៀល ស្មើប្រមាណ៥៧ម៉ឺនដុល្លារអាមេរិក។
លោក លឹម ចាន់សូភី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកណ្តាល បានឱ្យដឹងថា មន្ទីរបានពិនិត្យនិងផ្តល់យោបល់លើកសំណើសុំលិខិតអនុញ្ញាតសាងសង់ប្រមាណ៨៩ច្បាប់ បើកការដ្ឋានសាងសង់៣៦ច្បាប់ និងបើកអាជីវកម្មសាងសង់១ច្បាប់។ តាមរយៈច្រកចេញចូលតែមួយរបស់ក្រុងតាខ្មៅ ទទួលបានលិខិតអនុញ្ញាតសាងសង់និងលិខិតអនុញ្ញាតបើកការដ្ឋានចំនួន៣៥ច្បាប់ មានផ្ទៃក្រឡាជាង៤៩ម៉ឺនម៉ែត្រក្រឡា និងមានទុនវិនិយោគជាង២លានដុល្លារ ។
លោកបញ្ជាក់ថា ៖« មន្ទីរប្រមូលចំណូលសេវាសាធារណៈពីវិស័យដីធ្លី និងសំណង់ តាមរយៈច្រកចេញចូលតែបានប្រមាណ២.២៨៨លានរៀល ឬស្មើប្រមាណ៥៧ម៉ឺនដុល្លារក្នុងឆ្នាំ២០១៧ » ។
លោក ធួន ជេដ្ឋា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ចាម បានឱ្យដឹងដែរថា មន្ទីរបានចេញលិខិតអនុញ្ញាតសាងសង់ដោយរដ្ឋបាលខេត្តចំនួន៥៧គម្រោង មានផ្ទៃក្រឡាសំណង់ជាង១,៩ពាន់ម៉ែត្រការ៉េ និងមានទុនវិនិយោគជាង៧លានដុល្លារ ។ ចេញលិខិតអនុញ្ញាតសាងសង់តាមច្រកចេញចូលតែមួយមាន២២គម្រោង ។
លោកបន្តថា ៖« មន្ទីរប្រមូលចំណូលពីផ្នែកសេវាសុរិយោដី សេវាសំណង់ និងពន្ធប្រថាប់ត្រាបានជាង១.១៩១លានរៀល ឬស្មើប្រមាណ២៩ម៉ឺនដុល្លារ »។
លោក ឡៅ ទិព្វសីហា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា នៅឆ្នាំ២០១៨នេះ វិស័យសំណង់កម្ពុជានៅតែដំណើរការល្អ។ តាមការស្រង់ទិន្នន័យពីនាយកដ្ឋានសំណង់ក៏បានបញ្ជាក់ច្បាស់ថា នៅមានគម្រោងធំៗជាច្រើនដែលក្រសួង និងមន្ទីររាជធានី-ខេត្ត កំពុងតែពិនិត្យនៅតាមសាលាក្រុង ស្រុក ខណ្ឌ ដែលទទួលបានប្រតិភូកម្មអំណាច នៅមានគម្រោងប្លង់ កំពុងពិនិត្យ គម្រោងស្នើសុំអាជ្ញាប័ណ្ណសាងសង់ អគារធំៗ និងសំណង់លំនៅឋានប្រជាពលរដ្ឋ ។
លោកបញ្ជាក់ថា ៖« នៅឆ្នាំ២០១៨ ខ្ញុំមើលឃើញគម្រោងធំៗជាច្រើនទៀតដែលត្រូវសាងសង់នៅទីក្រុងភ្នំពេញ ជាពិសេស នៅខេត្តព្រះសីហនុ គម្រោងធំៗមានច្រើននៅទីនោះ។ ខ្ញុំមានសុទិដ្ឋិនិយមខ្ពស់ទៅលើការវិនិយោគវិស័យសំណង់អគារនៅកម្ពុជា ព្រោះការផ្គត់ផ្គង់លំនៅឋាននៅតែមានតម្រូវការ ។ តម្រូវការអគារការិយាល័យនៅតែមាន ព្រោះកំណើនប្រជាជនកាន់តែកើន ហើយភ្ញៀវបរទេសកាន់តែចូលមកច្រើន។ ដូច្នេះ តម្រូវការនៃការស្នាក់នៅ គឺនៅតែមានតម្រូវការដដែល » ។
យោងតាមរបាយការណ៍ប្រចាំឆ្នាំ២០១៧របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ក្នុងឆ្នាំ២០១៧ ក្រសួងបានប្រមូលចំណូលចូលថវិកាជាតិពីផ្នែកសេវាសុរិយោដី, សេវាសំណង់, សេវាជួលទីតាំងរោងចក្រ សហគ្រាស និងពន្ធលើការផ្ទេរអចលនទ្រព្យសរុបជាង៣៧១ពាន់លានរៀល ឬស្មើប្រមាណជាង៩២លានដុល្លារ ៕
ចែករំលែកព័តមាននេះ