រាជធានីភ្នំពេញ ៖ គម្រោងលំនៅឋានសាធារណៈតម្លៃសមរម្យ ក្រោមការវិនិយោគរបស់វិនិយោគិនខ្មែរសហការជាមួយរាជរដ្ឋាភិបាល នឹងប្រកាសទទួលលុយកក់ពីអតិថិជននៅចុងខែមករា ឆ្នាំ២០១៨នេះ ក្រោយពន្យារពេលជិត១ឆ្នាំ ។ គម្រោងលំនៅឋានមួយនេះបានចាប់ផ្ដើមបុកគ្រឹះសាងសង់កាលពីដើមឆ្នាំ២០១៧កន្លងមក ហើយក្នុងអំឡុងពេលនោះ…
រាជធានីភ្នំពេញ ៖ គម្រោងលំនៅឋានសាធារណៈតម្លៃសមរម្យ ក្រោមការវិនិយោគរបស់វិនិយោគិនខ្មែរសហការជាមួយរាជរដ្ឋាភិបាល នឹងប្រកាសទទួលលុយកក់ពីអតិថិជននៅចុងខែមករា ឆ្នាំ២០១៨នេះ ក្រោយពន្យារពេលជិត១ឆ្នាំ ។
គម្រោងលំនៅឋានមួយនេះបានចាប់ផ្ដើមបុកគ្រឹះសាងសង់កាលពីដើមឆ្នាំ២០១៧កន្លងមក ហើយក្នុងអំឡុងពេលនោះ ម្ចាស់គម្រោងថា នឹងទទួលប្រាក់ពីអតិថិជននៅរយៈពេល២-៣ខែក្រោយបុកគ្រឹះ ក៏ប៉ុន្តែរហូតមកដល់ពេលនេះ មិនទាន់ទទួលប្រាក់កក់ចុះឈ្មោះទិញគម្រោងមួយនេះនៅឡើយទេ ។
លោកឧកញ៉ា សៀ ឫទ្ធី ម្ចាស់គម្រោងលំនៅឋានសាធារណៈដំបូងគេនៅកម្ពុជា បាននិយាយតាមទូរស័ព្ទថា ក្រុមហ៊ុននឹងទទួលលុយកក់ពីអតិថិជននៅចុងខែមករា ឆ្នាំ២០១៨នេះ ។ ការយឺតយ៉ាវទទួលលុយពីអតិថិជននេះ ដោយសារតែក្រុមហ៊ុនរង់ចាំលិខិតអនុញ្ញាតពីក្រសួងសេដ្ឋកិច្ចសិន ព្រោះក្រុមហ៊ុនមិនធ្វើអ្វីបំពានច្បាប់ទេ បើទោះបីជាក្រុមហ៊ុនបានសហការជាមួយរដ្ឋាភិបាលក៏ពិតមែន ។ លោកឧកញ៉ាមានប្រសាសន៍ថា ៖« ចាប់តាំងពីគម្រោងបានប្រកាសបុកគ្រឹះសាងសង់មក គឺយើងត្រូវសាងសង់ហេដ្ឋារចនាសម្ព័ន្ធឲ្យរួចរាល់ សិន មុននឹងយើងចាប់ផ្ដើមសង់ផ្ទះ » ។
លោកឧកញ៉ាបន្តថា ក្រុមហ៊ុនបានសន្យាថា គម្រោងនេះនឹងប្រគល់ផ្ទះជូនអតិថិជនដែលបានចុះឈ្មោះ នៅដំណាច់ឆ្នាំ២០១៨ ។ ដូចនេះ ធ្វើយ៉ាងណា ត្រូវតែប្រគល់ផ្ទះជូនពួកគាត់ឲ្យបាននៅចុងឆ្នាំ២០១៨ បើទោះបីជាមិនបានប្រគល់ទាំងអស់ព្រមៗគ្នា ក៏ត្រូវប្រគល់បណ្ដើរៗដែរ ព្រោះអ្វីដែលក្រុមហ៊ុនបានសន្យាហើយត្រូវតែធ្វើឲ្យបាន ។ 
លោកឧកញ៉ាបន្តទៀតថា នៅថ្ងៃទី២៥ មករា ខាងមុខនេះ ក្រុមហ៊ុននឹងចុះហត្ថលេខាជាមួយធនាគារ២ ក្នុងការបង់រំលស់គម្រោងផ្ទះនេះ។ ចំនួនប្រាក់ត្រូវបង់ប៉ុន្មានក្នុង១ខែនោះ មានតែរង់ចាំមើលថា តើធនាគារអាចមានលទ្ធភាពទុករយៈពេលប៉ុន្មានឆ្នាំសម្រាប់អ្នកមានចំណូលទាប និងមធ្យម ក៏ដូចជាមន្ត្រីរាជការបង់រំលស់ប្រចាំខែ ។ លោកឧកញ៉ាថា ៖«បើសិនធនាគារជាដៃគូរបស់យើង គេទុកពេលយូរឲ្យពលរដ្ឋបង់រំលស់ ដូចនេះ ចំនួនប្រាក់ដែលបង់ប្រចាំខែក៏នឹងតិច តែបើសិនជាគេទុកពេលខ្លី ការបង់រំលស់របស់ពលរដ្ឋប្រចាំខែអាចនឹងច្រើនបន្តិច ក៏ប៉ុន្តែយើងបានចរចាជាមួយធនាគារឲ្យទុកពេលយូរបន្តិច ដើម្បីមានលទ្ធភាពបង់រំលស់ប្រចាំខែនៅតិច » ។
លោកឧកញ៉ាបន្ថែមថា ចំពោះតម្លៃផ្ទះដែលបានសន្យានៅចន្លោះពី២ម៉ឺន៥ពាន់ដុល្លារ ទៅ៣ម៉ឺនដុល្លារអាមេរិក នឹងមិនប្រែប្រួលទេ គឺនៅរក្សាដដែល ដូចនេះ ពលរដ្ឋមិនបាច់ភ័យព្រួយពីការឡើងថ្លៃទេ ។
ម្ចាស់គម្រោងនេះបញ្ជាក់ថា ៖«យើងស្វាគមន៍ចំពោះការវិនិយោគគម្រោងលំនៅឋានសាធារណៈពីវិនិយោគិនផ្សេងទៀតនៅក្នុងប្រទេសកម្ពុជា ជាពិសេស នៅរាជធានីភ្នំពេញ ព្រោះក្រុមហ៊ុនយើងតែមួយមិនអាចផ្គត់ផ្គង់បានទេ ហើយគម្រោងរបស់យើងនៅតែមានចំណាប់អារម្មណ៍ពីសំណាក់អ្នកមានចំណូលទាប និងមធ្យម ជាពិសេស មន្ត្រីរាជការ ។ ជាក់ស្ដែង បច្ចុប្បន្ន យើងបានស្រង់ឈ្មោះពីអ្នកចុះឈ្មោះទិញ បានរហូតដល់ជាង៤ពាន់នាក់ ខណៈផ្ទះមានត្រឹមតែជាង២ពាន់ល្វែងប៉ុណ្ណោះ ។ ដូចនេះ យើងនឹងពិនិត្យមើលលក្ខខណ្ឌថា តើអ្នកណាខ្លះនឹងទទួលបានការអនុញ្ញាតឲ្យទិញគម្រោងផ្ទះតម្លៃសមរម្យរបស់យើង ហើយអ្នកគ្មានលក្ខខណ្ឌគ្រប់គ្រាន់ យើងនឹងមិនអនុញ្ញាតឲ្យទិញទេ » ។
គួរបញ្ជាក់ថា រហូតមកដល់ពេលនេះ មានគម្រោងលំនៅឋានសាធារណៈចំនួន៣ ដែលបានប្រកាសសាងសង់ផ្គត់ផ្គង់ជូនអ្នកមានចំណូលទាប និងមធ្យម រួមមាន គម្រោងក្រុមហ៊ុន WorldBride Land របស់លោកឧកញ៉ា សៀ ឫទ្ធី វិនិយោគទឹកប្រាក់៦០លានដុល្លារអាមេរិក, គម្រោងក្រុមហ៊ុន ប៊ុនជេស្ន មិនប្រកាសពីចំនួនទឹកប្រាក់វិនិយោគ និងគម្រោងអារ៉ាខាវ៉ា ដែលសហការជាមួយវិនិយោគិនជប៉ុន បោះទុនវិនិយោគប្រមាណជាង៧០លានដុល្លារអាមេរិក ៕
ចែករំលែកព័តមាននេះ