ខេត្តកំពង់ឆ្នាំង ៖ អាណាព្យាបាលជនរងគ្រោះ រួមទាំងប្រជាពលរដ្ឋក្នុងភូមិត្រពាំងគ ឃុំជ្រៃបាក់ ស្រុករលាប្អៀរជាច្រើននាក់ បានអំពាវនាវដល់សមត្ថកិច្ចនគរបាលក៏ដូចជា ប្រព័ន្ធតុលាការ សូមមេត្តាជួយផ្តល់ភាពយុត្តិធម៌ ដល់កូនប្រុសគាត់ពីរនាក់…
ខេត្តកំពង់ឆ្នាំង ៖ អាណាព្យាបាលជនរងគ្រោះ រួមទាំងប្រជាពលរដ្ឋក្នុងភូមិត្រពាំងគ ឃុំជ្រៃបាក់ ស្រុករលាប្អៀរជាច្រើននាក់ បានអំពាវនាវដល់សមត្ថកិច្ចនគរបាលក៏ដូចជា ប្រព័ន្ធតុលាការ សូមមេត្តាជួយផ្តល់ភាពយុត្តិធម៌ ដល់កូនប្រុសគាត់ពីរនាក់ ដែលត្រូវបានជនដៃដល់មួយក្រុម លើកគ្នាមកបង្ករបួសស្នាមកូនប្រុសគាត់ដល់ផ្ទះ បែរជាជនបង្កប្តឹងទារសំណងពីកូនប្រុសគាត់ដែលជាជនរងគ្រោះទៅវិញ ។
ជនរងគ្រោះម្នាក់ឈ្មោះ សុខ សុធួន អាយុ២៥ឆ្នាំ និងម្នាក់ទៀតឈ្មោះ ស្រស់ មេសា អាយុ២៣ ឆ្នាំ មានទីលំនៅខាងលើ ។
ក្រុមអាព្យាបាលជនរងគ្រោះដូចជាប្រជាពលរដ្ឋបានឲ្យដឹងថា នៅយប់ថ្ងៃកើតហេតុ គឺនៅម៉ោង១១និង៣០នាទីយប់ថ្ងៃទី១៣ ខែមករា ឆ្នាំ២០១៨ ស្រាប់តែមានក្មេង១ក្រុមបានមកវាយរបងផ្ទះពួកគាត់ ហើយបានទាញទ្វាររបងរបើកបម្រុងចូលអុកឡុកក្នុងផ្ទះ ពេលនោះពួកគាត់បានឲ្យកូនៗចុះមើល និងបានទាញទ្វាររបងបិទវិញ ហើយក៍ត្រូវក្រុមបង្កចាក់កូនប្រុសគាត់ បណ្តាលឲ្យរងរបួសភ្លៅខាងស្តាំ ដោយឃើញសភាពមិនស្រួលពួកគាត់បានស្រែកឲ្យប្រជាពលរដ្ឋជួយ និងបានស្រែកថា «ចោរៗ» ភ្លាមៗនោះប្រជាពលរដ្ឋដែលនៅជិតខាងបាននាំគ្នាមកជួយ ចំណែកក្រុមជនបង្កបាននាំគ្នារត់គេចខ្លួន ប៉ុន្តែត្រូវបានប្រជាពលរដ្ឋ និងប្រជាការពារដេញចាប់បានម្នាក់ដែលមានឈ្មោះ សាំង សារឿន ហៅពៅ រស់នៅភូមិគល់គប់ ឃុំស្រែថ្មី ស្រុករលា ប្អៀរ ខណៈពេលចាប់ខ្លួនឈ្មោះខាងលើបានតដៃ ត្រូវប្រជាពលរដ្ឋវាយបណ្តាលឲ្យទ្រោមខ្លួនដែរ ។
ក្រោយមកស្រាប់តែនៅថ្ងៃទី១៥ ខែមករា នេះកូនប្រុសគាត់ត្រូវបានសមត្ថកិច្ចនគរបាលស្រុករលាប្អៀរ កោះហៅកូនប្រុសគាត់ម្នាក់ឈ្មោះ ស្រស់ មេសា ទៅសាកសួរពីបទបង្ករបួសស្នាម ហើយបាននាំមកស្នងការដ្ឋាននគរបាលខេត្ត និងបានឃុំខ្លួនជាង១ម៉ោង និងក្រោយពីការសាកសួរទើបអោយកូនប្រុសគាត់មកផ្ទះវិញ នៅម៉ោងជាង៨យប់ ។
ដំណើររឿងហេតុនៅយប់កើតហេតុ ពួកគេបានទៅលេងបុណ្យក្នុងភូមិ រហូតដល់ម៉ោងជាង១០យប់ បាននាំគ្នាមកផ្ទះវិញ ដោយពុំមានទាស់ពាក្យសម្តី ឬប៉ះពារអ្វីដល់នរណាសោះ ស្រាប់តែនៅវេលាម៉ោង១១និង៣០នាទីយប់ មានក្រុមក្មេង១ក្រុម ដែលគេស្គាល់ឈ្មោះ សាំង សារ៉ន ហៅពៅ រស់នៅភូមិគល់គប់ ឃុំស្រែថ្មី ស្រុករលាប្អៀរ បានចូលអុកឡុក និងទាញទ្វាររបងចូលដល់ក្នុងផ្ទះរបស់ខ្លួន និងបានបង្កឲ្យពួកគេរងគ្រោះរបួសគ្រប់គ្នាទៀត ។
លោក ជូ ផុន មេភូមិត្រពាំងគបានឲ្យដឹងដែរថា នៅយប់ថ្ងៃកើតហេតុម៉ោងជាង១០យប់ មានក្រុមក្មេងមកពីភូមិគល់គប់ មួយក្រុមបានប្រាប់គាត់ថា ពួកគេមិនហ៊ានទៅផ្ទះទេ ហើយបានឲ្យពួកគាត់ជូនទៅផ្ទះ ពេលនោះមានប្រជាការពារភូមិ អនុប្រធានភូមិ និងរូបលោកបានជូនក្រុមក្មេងមកពីភូមិគល់គប់ ចេញដល់ថ្នល់ជាតិលេខ៥៣ ទៅហើយ ពួកគាត់ជាអាជ្ញាធរភូមិប្រជាការពារបានត្រឡប់មកវិញ ។ លុះដល់ម៉ោងជាង១១យប់ស្រាប់តែឮថា មានក្មេងមកអុកឡុកនៅផ្ទះជនរងគ្រោះខាងលើ គាត់បានរត់ត្រឡប់មកវិញ តែរត់មិនទាន់គេទេ ពេលទៅដល់ឃើញប្រជាពលរដ្ឋចាប់បានក្មេងភាគីខាងគល់គប់ម្នាក់ ដោយមានរបួស និងត្រូវបានប្រជាការពារដាក់ខ្នោះដៃផង នៅថ្នល់ជាតិលេខ៥៣ គាត់ក៏ប្រាប់ថា« កុំដាក់ខ្នោះគ្នាអីគ្នាមានរបួសទៅហើយ » ។
ពួកគាត់ជាអាណាព្យាបាលនិយាយថា មកបង្ករឿងចាក់កូនប្រុសគាត់បណ្តាលឲ្យរងរបួសហើយ ប្តឹងកូនប្រុសគាត់ទៀត ហេតុនេះពួកគាត់សូមសំណូមពរដល់សមត្ថកិច្ច និងប្រព័ន្ធតុលាការ សូមមេត្តាជួយផ្តល់ក្តីយុត្តិធម៌ ដល់កូនប្រុសគាត់ផង ។
ជុំវិញវិញបញ្ហានេះ យើងមិនអាចសុំការបំភ្លឺពីឈ្មោះ សាំង សារ៉ន ហៅពៅបានទេ ប៉ុន្តែតាមការឲ្យដឹងពីលោក សំ សុខា នាយប៉ុស្តិ៍នគរបាលរដ្ឋបាលជ្រៃបាក់ បានបញ្ជាក់ដែរថា យប់នោះក្រោយពេលកើតហេតុ លោកបានមកដល់ ឃើញឈ្មោះ សាំង សារ៉ន ហៅពៅ មានរបួសក្បាល ហើយលោកបានឲ្យប្រជាការពារ ដោះខ្នោះដៃ និងបានដឹកឈ្មោះពៅ នេះយកទៅអោយក្រុមគ្រួសារគេ ប៉ុន្តែពេលដឹកចេញមកបានបន្តិច ត្រូវបងប្អូនភាគីខាងភូមិគល់គប់ មកដល់សុំយកឈ្មោះ ពៅ ទៅព្យាលបាលសិន ចាំដោះស្រាយគ្នាជាក្រោយ ។ លោកបានបញ្ជាក់ថា ឈ្មោះ សាំង សារ៉ន ហៅពៅនេះ មានរបួសព្រោះបានតដៃជាមួយប្រជាពលរដ្ឋ ពេលចាប់ខ្លួន ។
តាមមន្ត្រីនគរបាលការិយាល័យព្រហ្មទ័ណ្ឌកម្រិតស្រាលបានឲ្យដឹងថា តាមពិតយប់នោះភាគីខាងភូមិគល់គប់ បានទៅបង្កអុកឡុកនៅផ្ទះភាគីម្ខាងទៀត បណ្តាលឲ្យកូនចៅគេមានរបួសស្នាម ហើយបានស្រែកថា« ចោរៗ »ទើបប្រជាពលរដ្ឋលើកគ្នាដេញចាប់ទើបបង្កឲ្យមានរបួសស្នាម ព្រោះមានការតដៃ ៕
ចែករំលែកព័តមាននេះ