រាជធានីភ្នំពេញ ៖ ទីបំផុត គម្រោងសាងសង់ព្រលានយន្តហោះអន្តរជាតិភ្នំពេញថ្មី ដែលមហាជនទន្ទឹងរង់ចាំដំណឹងពីទីតាំងពិតប្រាកដនោះ ពេលនេះបានកំណត់ច្បាស់លាស់ហើយ ទាំងពេលវេលាសាងសង់ ទំហំ និងទីតាំងជាក់លាក់ ។…
រាជធានីភ្នំពេញ ៖ ទីបំផុត គម្រោងសាងសង់ព្រលានយន្តហោះអន្តរជាតិភ្នំពេញថ្មី ដែលមហាជនទន្ទឹងរង់ចាំដំណឹងពីទីតាំងពិតប្រាកដនោះ ពេលនេះបានកំណត់ច្បាស់លាស់ហើយ ទាំងពេលវេលាសាងសង់ ទំហំ និងទីតាំងជាក់លាក់ ។ នេះបើតាមការអះអាងពីមន្ត្រីរដ្ឋលេខាធិការដ្ឋានអាកាសចរណ៍ស៊ីវិល ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានថ្លែងតាមទូរស័ព្ទនាព្រឹកថ្ងៃទី១៩ មករា ម្សិលមិញថា ការសាងសង់ព្រលានយន្តហោះអន្តរជាតិភ្នំពេញថ្មីនេះ អាចនឹងចាប់ផ្តើមនៅដើមឆ្នាំ២០១៩ខាងមុខ ដោយសារគម្រោងនេះបានអនុម័តរួចហើយ និងមានទីតាំង ព្រមទាំងប្លង់ស្ថាបត្យកម្មរួចហើយដែរ ។ ហេតុនេះ រង់ចាំតែពេលវេលាចរចារវាងរាជរដ្ឋាភិបាល និងក្រុមហ៊ុនវិនិយោគសាងសង់ព្រលាននេះប៉ុណ្ណោះ ។
លោកបន្តថា ៖« ទីតាំងសាងសង់ព្រលានយន្តហោះថ្មីនេះ ស្ថិតនៅតាមបណ្តោយផ្លូវជាតិលេខ២១ ជាតំបន់វាលបឹងកំប្លោកដ៏ធំមួយ (ហៅបឹងរៀន) ដែលស្ថិតក្នុងរង្វង់ផ្លូវក្រវាត់ក្រុងទី៣ នាពេលអនាគត » ។ លោកបញ្ជាក់ថា ៖« បើសិនជាគិតពីកន្ទុយផ្លូវ៦០ម៉ែត្រ ឬផ្លូវសម្តេចតេជោ ហ៊ុន សែន គឺទីតាំងព្រលាននេះ មានចម្ងាយប្រមាណ៩គីឡូម៉ែត្រចេញពីកន្ទុយផ្លូវ នេះឆ្ពោះទៅមុខ » ។
លោកបន្តថា ទីតាំងព្រលានយន្តហោះនេះជាផ្ទៃបឹង ហើយនឹងត្រូវបូមខ្សាច់បំពេញនាពេលខាងមុខ ដើម្បីចាប់ផ្តើមសាងសង់ព្រលានយន្តហោះ និងមជ្ឈមណ្ឌលពាណិជ្ជកម្មជុំវិញនេះ។
គម្រោងសាងសង់ព្រលានយន្តហោះភ្នំពេញអន្តរជាតិនេះ ត្រូវបានចុះហត្ថលេខាក្នុងកំឡុងដំណើរទស្សនកិច្ចរបស់លោក លី ខឺឈាង នាយករដ្ឋមន្ត្រីចិន ដែលបានមកទស្សនកិច្ចនៅកម្ពុជាថ្មីៗនេះ ។ គម្រោងព្រលានយន្តហោះនេះ គ្រោងនឹងវិនិយោគទឹកប្រាក់១.៥០០លានដុល្លារ សហការវិនិយោគដោយក្រុមហ៊ុន OCICនិងក្រុមហ៊ុនមួយដែលមានមូលដ្ឋានមកពីប្រទេសចិន ដោយរួមគ្នាបង្កើតក្រុមហ៊ុនមួយដាក់ឈ្មោះCambodia Airport Investment Co., Ltd ។
លោក ស៊ិន ចាន់សិរីវុត្ថា បានបន្តថា ព្រលានយន្តហោះនេះមានទំហំជាង៧០០ហិកតា ប្រហាក់ប្រហែលនឹងព្រលានយន្តហោះអន្តរជាតិខេត្តសៀមរាបថ្មីដែរ ។ ចំណែកផ្ទៃដីដែលនៅសល់ គឺជាទីតាំងសម្រាប់សាងសង់មជ្ឈមណ្ឌលពាណិជ្ជកម្ម និងលំនៅឋាននានា ព្រោះការវិនិយោគព្រលានយន្តហោះ មិនអាចរកផលចំណេញបានទេ គឺមានតែការរៀបចំសេវាកម្ម និងមជ្ឈមណ្ឌលពាណិជ្ជកម្មគាំទ្រ ទើបអ្នកវិនិយោគអាចរកផលចំណេញបាន ។
លោកបន្តថា ៖« នេះជាគម្រោងវិនិយោគដែលគេឲ្យឈ្មោះថា Airport City ជាគម្រោងវិនិយោគចម្រុះដែលមានទាំងព្រលានយន្តហោះ និងមជ្ឈមណ្ឌលពាណិជ្ជកម្ម » ។
យោងតាមលិខិតទីស្ដីការគណៈរដ្ឋមន្ត្រីជម្រាបជូនលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោករដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល ចុះថ្ងៃទី២១ ធ្នូ ឆ្នាំ២០១៧ បានបញ្ជាក់ពីកម្មវត្ថុសុំគោលការណ៍អនុញ្ញាតបង្កើតក្រុមហ៊ុន «ខេមបូឌា អ៊ែរផត អ៊ិនវេសមិន ខូអិលធីឌី (Cambodia Airport Investment Co., Ltd) ជាក្រុមហ៊ុនដៃគូវិនិយោគរវាងវិស័យសាធារណៈ និងឯកជន(PPP) ដោយយោងតាមលិខិតលេខ១៣៨ រ.ល.អ.ស ចុះថ្ងៃទី១៣ ធ្នូ ឆ្នាំ២០១៧ និងចំណារដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី ចុះថ្ងៃទី១៤ ធ្នូ ឆ្នាំ២០១៧ ។
ក្នុងនោះរាជរដ្ឋាភិបាលបានឯកភាពបង្កើតក្រុមហ៊ុនខាងលើក្នុងគោលបំណងអភិវឌ្ឍន៍សាងសង់អាកាសយានដ្ឋានអន្តរជាតិលំដាប់ 4F ដែលមានទីតាំងនៅក្រុងតាខ្មៅ ស្រុកកណ្ដាលស្ទឹង ខេត្តកណ្ដាល នៅលើទំហំដីចំនួន២.៦០០ហិកតា ក្រោមទុនវិនិយោគសរុប១.៥០០លានដុល្លារ ដែលបានមកពីកម្ចីធនាគារបរទេស១.១០០លានដុល្លារ, កម្ចីពីភាគទុន OCIC ២៨០លានដុល្លារ និងដើមទុនចុះបញ្ជី១២០លានដុល្លារ។ ក្នុងនោះក្រុមហ៊ុន OCIC មាន៩០% និងរដ្ឋលេខាធិការដ្ឋានអាកាសចរស៊ីវិល តំណាងរាជរដ្ឋាភិបាលកម្ពុជាមាន១០% ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានថ្លែងស្វាគមន៍នូវគម្រោងវិនិយោគដ៏ធំមួយនេះ ស្របពេលដែលកម្ពុជាបាននិងកំពុងស្ថិតក្នុងគោលដៅនៃការធ្វើដំណើរកម្សាន្ដរបស់ភ្ញៀវទេសចរទូទាំងពិភពលោក ។ ហេតុនេះ ការសាងសង់ព្រលានយន្តហោះនេះជាការស្វាគមន៍ ប៉ុន្តែព្រលានយន្តហោះនេះគួរមានទំហំធំ ដែលអាចឲ្យយន្តហោះប្រភេទប៊ូអុីង (Boing) ធំៗចុះចតបាន ព្រោះសមត្ថភាពព្រលានយន្តហោះសព្វថ្ងៃនេះ មិនអាចឲ្យយន្តហោះខ្នាតធំចុះចតបានទេ ។
លោកស្រីបន្តថា ៖« ព្រលានយន្តហោះភ្នំពេញសព្វថ្ងៃកំពុងមមាញឹកខ្លាំង ហេតុនេះ យើងត្រូវការព្រលានយន្តហោះថ្មីបែបនេះ ដើម្បីបំពេញតម្រូវការនៃការតភ្ជាប់ផ្លូវអាកាស និងការធ្វើដំណើរ » ។ លោកស្រីថា ៖« ព្រលានយន្តហោះថ្មីនេះត្រូវតែមានសមត្ថភាពខ្ពស់ និងទទួលអ្នកដំណើរបានច្រើន ដើម្បីឆ្លើយតបនឹងកំណើនភ្ញៀវទេសចរអន្តរជាតិមកទស្សនាកម្ពុជា » ។
បច្ចុប្បន្ន កម្ពុជាមានព្រលានយន្តហោះអន្តរជាតិចំនួន៣ គឺព្រលានយន្តហោះអន្តរជាតិភ្នំពេញ, ព្រលានយន្តហោះអន្តរជាតិសៀមរាប និងព្រលានយន្តហោះអន្តរជាតិខេត្តព្រះសីហនុ ។
ក្រៅពីគម្រោងសាងសង់ព្រលានយន្ដហោះអន្តរជាតិនៅភ្នំពេញហើយ កម្ពុជាក៏បាននិងកំពុងសាងសង់ព្រលានយន្ដហោះថ្មីនៅខេត្តកោះកុង និងខេត្តសៀមរាបផងដែរ ។
ក្រោយពីគម្រោងសាងសង់ព្រលានយន្តហោះអន្តរជាតិថ្មីនេះត្រូវបានប្រកាសសាងសង់ នៅតំបន់ក្រុងតាខ្មៅ ក្នុងស្រុកកណ្តាលស្ទឹង ខេត្តកណ្តាល បានធ្វើឱ្យតម្លៃដីនៅតំបន់នោះឡើងខ្ពស់យ៉ាងគំហុក ។ ចំណែកក្រុមអ្នករកស៊ីដីធ្លី និងប្រជាពលរដ្ឋក៏សម្រុកទៅទិញដីនៅតំបន់នោះផងដែរ ។
តាមអ្នកជំនាញខាងអចលនទ្រព្យបានឱ្យដឹងថា បន្ទាប់ពីគម្រោងនេះបានប្រកាស តម្លៃដីនៅតំបន់នោះឡើងថ្លៃស្ទើរស្មានមិនដល់ ដែលកាលពីមុន តម្លៃដីនៅតំបន់កណ្តាលស្ទឹងនេះ ១ម៉ែត្រការ៉េត្រឹមតែ១ដុល្លារទៅ១០ដុល្លារប៉ុណ្ណោះ ហើយទៅទិញកន្លែងណាក៏បានដែរ ប៉ុន្តែដល់បច្ចុប្បន្ននេះ តម្លៃរបស់វាបានហក់ឡើងខ្លាំង ពោលគឺ១ម៉ែត្រការ៉េ ឡើងពីជាង១០ដុល្លារទៅ ជាង៦០ដុល្លារទៅតាមកន្លែងនីមួយៗ ។
ទោះជាបែបនេះក្ដី ដើម្បីកុំឱ្យការជ្រួលជ្រើមនេះខាតបង់នៅពេលក្រោយ ពួកគាត់គួរតែសិក្សាឱ្យបានច្បាស់លាស់ ព្រោះអ្នកជំនាញខាងអចលនទ្រព្យលើកឡើងថា នេះគ្រាន់តែជាតម្លៃខ្យល់ប៉ុណ្ណោះ ដែលប្រជាពលរដ្ឋនៅទីនោះជ្រួលជ្រើមតាមគ្នា ។ បើតាមស្ថានភាព និងទីផ្សារជាក់ស្តែង ដីនៅទីនោះមានតម្លៃត្រឹមតែ១០ដុល្លារចុះក្រោមប៉ុណ្ណោះក្នុង១ម៉ែត្រការ៉េ មិនអាចលើសពីនេះបានឡើយ ។
ណាមួយ នេះអាចជាឱកាសដែលអ្នករកស៊ីដីធ្លីទទួលបានផលចំណេញ ដែលធ្វើឱ្យអ្នកសម្រុកទៅទិញដីនៅតំបន់នោះខាតបង់ពីគម្រោងយក្សដ៏ធំនេះ ។
ទោះជាយ៉ាងណា មុននឹងទៅទិញដីនៅតំបន់នោះ ទាំងប្រជាពលរដ្ឋ និងអ្នកវិនិយោគ គួរគិតពិចារណាឲ្យបានច្បាស់លាស់ផងដែរ ព្រោះថា ជាទូទៅនៅបណ្ដាប្រទេសផ្សេងៗ តំបន់ជុំវិញព្រលានយន្តហោះមិនសូវមានការអភិវឌ្ឍប៉ុន្មានទេ ព្រោះមានច្បាប់កំណត់ពីការអភិវឌ្ឍ។ ជាក់ស្ដែង នៅជុំវិញព្រលានយន្តហោះ មិនអនុញ្ញាតឲ្យសាងសង់អគារខ្ពស់ៗឡើយ ។ បើសិនជាមិនអនុញ្ញាតឲ្យសង់អគារខ្ពស់ តម្លៃដីធ្លីក៏មិនអាចឡើងខ្ពស់បានដែរ គឺឡើងត្រឹមកម្រិតមួយប៉ុណ្ណោះ ៕
ចែករំលែកព័តមាននេះ