រាជធានីភ្នំពេញ ៖ ប្រជាពលរដ្ឋទាំងចាស់ទាំងក្មេងចំនួនជិត១០០នាក់ បានលើកគ្នាទៅកាន់វត្តព្រែកជ្រៃ ដែលមានទីតាំងស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញកាលពីវេលាម៉ោង៩ព្រឹក ថ្ងៃទី២១ ខែមករា ធ្វើការបណ្ដេញព្រះគ្រូចៅអធិការវត្តព្រែកជ្រៃ ចេញពីវត្ត និងបានសំណូមពរសុំឲ្យអាជ្ញាធរតែងតាំងព្រះចៅអធិការវត្តថ្មីជំនួសវិញ ។
ប្រជាពលរដ្ឋទាំងនោះ គឺជាអ្នករស់នៅក្នុងភូមិខាងលើ បានធ្វើការចោទប្រកាន់ព្រះចៅអធិការវត្តអង្គនោះថា ព្រះអង្គបានលួចលក់ដើមឈើរាំងភ្នំដែលជាសម្បត្តិវត្តទៅឲ្យឈ្មួញ និងនិយមបក្សពួកខ្លាំងណាស់ដោយបានយកកូនចៅ និងបងប្អូនសាច់ញាតិរបស់ព្រះអង្គទៅស្នាក់នៅក្នុងវត្តយ៉ាងអនាធិបតេយ្យ ។ សូម្បីតែក្រុមជាងដែលសាងសង់គុដិ ឬព្រះវិហារក៏សុទ្ធតែបងប្អូនកូនក្មួយព្រះអង្គដែរ អ្នកផ្សេងក្រៅពីសាច់ញាតិបងប្អូន ព្រះអង្គចង់ទៅធ្វើ គឺមិនឲ្យធ្វើឡើយ ។
ប្រជាពលរដ្ឋដដែលបាននិយាយថា ព្រះគ្រូចៅអធិការអង្គនោះព្រះនាម នូ សាំង ព្រះជន្ម៧៧វស្សា ដែលកាលពីអតីតព្រះអង្គជាព្រះចៅអធិការវត្តតាំងកសាងខាងត្បូង ភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។
ទាក់ទិនទៅនឹងហេតុការណ៍នោះប្រជាពលរដ្ឋដែលបះបោរបាននាំគ្នាទូងស្គរនៅក្នុងវត្តប្រមូលគ្នាឲ្យទៅចូលរួមកាន់តែច្រើនឡើង ក្នុងការបណ្ដេញព្រះគ្រូចៅអធិការវត្តនោះ ។ ដោយឡែកកោះសន្តិភាពមិនអាចរកការបំភ្លឺពីព្រះគ្រូចៅអធិការវត្តជាប់ចោទបានឡើយ ដោយនៅក្នុងពេលនោះព្រះអង្គមិនបានស្ថិតនៅក្នុងវត្តនោះទេ ។ ប្រភពនានាបានប្រាប់ថា ព្រះអង្គនិមន្តចេញក្រៅបាត់ហើយ និងសង្ស័យថា និមន្តទៅកាន់វត្តស្លែងដើម្បីពិភាក្សាជាមួយព្រះគ្រូអនុគណខណ្ឌដង្កោពីបញ្ហាដែលប្រជាពលរដ្ឋបណ្ដេញព្រះអង្គចេញពីក្នុងវត្តបែបនេះ ។
ចំណែកអាជ្ញាធរខណ្ឌដង្កោរួមជាមួយកម្លាំងប្រដាប់អាវុធទាំង២ភេទ មាននគរបាល និងកងរាជអាវុធហត្ថខណ្ឌបានចុះទៅកាន់វត្តនោះដែរ និងបានធ្វើការសម្របសម្រួលដោះស្រាយជាមួយប្រជាពលរដ្ឋ ។ ក្រោយមកបានបន្តទៅធ្វើការដោះស្រាយនៅក្នុងវត្តស្លែងដែលជាវត្តព្រះអនុគណខណ្ឌនោះទៀត ប៉ុន្តែមិនទាន់ដឹងថា តើត្រូវរ៉ូវគ្នា ឬមិនត្រូវនៅឡើយទេ ៕
ចែករំលែកព័តមាននេះ