ខេត្តសៀមរាប ៖ កម្លាំងការិយាល័យគ្រប់គ្រងអាវុធគ្រឿងផ្ទុះនៃស្នងការដ្ឋាននគរបាលខេត្តបានសហការជាមួយប៉ុស្តិ៍នគរបាលរដ្ឋបាលសង្កាត់សៀមរាប និងកងអនុសេនាធំលេខ៣ខេមរភូមិន្ទប្រចាំនៅភ្នំក្រោមបានចុះទៅយកគ្រាប់យុទ្ធភ័ណ្ឌមិនទាន់ផ្ទុះសំណល់សល់ពីសង្គ្រាមចំនួន៤គ្រាប់នៅកន្លែងផ្សេងគ្នា ដែលប្រជាពលរដ្ឋភ្ជួរស្រែបាន រួចធ្វើការប្រគល់បន្តទៅឱ្យអង្គការស៊ីម៉ាក់ ដើម្បីយកទៅកម្ទេចចោល ។ ហេតុការប្រគល់គ្រាប់មិនទាន់ផ្ទុះនោះធ្វើឡើងនៅថ្ងៃទី១៩ ខែមករា ឆ្នាំ២០១៨ ស្ថិតនៅភូមិភ្នំក្រោម សង្កាត់សៀមរាប ក្រុង-ខេត្តសៀមរាប ។
ប្រភពពីសមត្ថកិច្ចមូលដ្ឋានសង្កាត់សៀមរាបបានប្រាប់នៅរសៀលថ្ងៃទី២០ ខែមករា ឆ្នាំថា មានពលរដ្ឋម្នាក់បានទៅភ្ជួរស្រែ ដើម្បីសាបព្រោះស្រូវក៏បានប្រទះឃើញ
គ្រាប់យុទ្ធភ័ណ្ឌមិនទាន់ផ្ទុះសំណល់សល់ពីសង្គ្រាមចំនួន០៤គ្រាប់ រួចរាយការណ៍មកសមត្ថកិច្ចមូលដ្ឋានឱ្យទៅចុះយក ហើយយកមកប្រគល់បន្តទៅឱ្យខាងអង្គការស៊ីម៉ាក់យកទៅកម្ទេចចោល ។ ប្រភពបានបន្តថា គ្រាប់យុទ្ធភ័ណ្ឌមិនទាន់ផ្ទុះចំនួន០៤គ្រាប់នោះមានប្រភេទ រ៉ូកែត ៧០មីលីម៉ែត្រចំនួន០១គ្រាប់ គ្រាប់ត្បាល់៧០មីលីម៉ែត្រចំនួន០១គ្រាប់ ត្បាល់គ្រាប់៦០មីលីម៉ែត្រចំនួន០២គ្រាប់ ។
សូមបញ្ជាក់ដែរថា សមត្ថកិច្ចសូមអំពាវនាវដល់បងប្អូនប្រជាពលរដ្ឋទាំងអស់ បើប្រទះឃើញ គ្រាប់មិនទាន់ផ្ទុះ ឬឃើញអ្វីមួយគួរឱ្យសង្ស័យនោះត្រូវរាយការណ៍ជាបន្ទាន់ដល់សមត្ថកិច្ចដែលនៅជិត ជៀសវាងមានគ្រោះថ្នាក់ដោយយថាហេតុ ៕
ចែករំលែកព័តមាននេះ