រាជធានីភ្នំពេញ ៖ បុរសម្នាក់ជានិស្សិតឆ្នាំទី៣ បើករថយន្ដវ៉ាជែងជាមួយរថយន្ដផ្សេងទៀត ក្នុងល្បឿនលឿនមិនប្រយ័ត្ន បណ្ដាលឲ្យបុកក្មេងប្រុសម្នាក់ដើរឆ្លងផ្លូវស្លាប់ភ្លាមៗ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី២០ ខែមករា ឆ្នាំ២០៨ នៅចំណុចផ្លូវបេតុងព្រៃស ភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ ។
ក្មេងប្រុសរងគ្រោះមានឈ្មោះ ម៉ុន ប៊ុនហេង អាយុ៩ឆ្នាំ មានទីលំនៅភូមិត្រពាំងចក សង្កាត់ព្រៃវែង ខណ្ឌដង្កោ ។ ឬឯជនបង្កមានឈ្មោះ ស៊ុយ សារ៉ាក់ អាយុ២១ឆ្នាំ មុខរបរនិស្សិតឆ្នាំទី៣ មានទីលំនៅភូមិស្នំប្រាំពី ឃុំម៉ាក់ប្រាង ស្រុកទឹកឈូ ខេត្ដកំពត ។
យោងតាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុ គេបានឃើញរថយន្ដមួយគ្រឿងម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ ២AQ-៧០៨១ បើកបរតែម្នាក់ឯង ក្នុងទិសដៅពីជើងទៅត្បូង ក្នុងល្បឿនលឿនវ៉ាជែងជាមួយរថយន្ដមួយគ្រឿងទៀត មិនចាំម៉ាក ក៏ជ្រុលចង្កូតទៅបុកក្មេងប្រុសដែលដើរឆ្លងផ្លូវ បណ្ដាលឲ្យស្លាប់ភ្លាមៗនៅកន្លែងកើតហេតុតែម្ដង ។
ភ្លាមៗនោះ ម្ចាស់រថយន្ដជាជនបង្កបានចុះពីរថយន្ដរត់គេចខ្លួនបាត់ ប៉ុន្ដែត្រូវបានកម្លាំងសមត្ថកិច្ចប៉ុស្ដិ៍ព្រៃវែងធ្វើការឃាត់ខ្លួនយកមកធ្វើការសាកសួរវិញបាន ។ បច្ចុប្បន្ន ជនបង្កត្រូវសមត្ថកិច្ចប្រគល់ទាំងរថយន្ដទៅឲ្យកម្លាំងសមត្ថកិច្ចចរារណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងបញ្ជូនទៅកាន់តុលាការចាត់ការតាមច្បាប់ ។ ចំណែកក្មេងប្រុសរងគ្រោះត្រូវបានក្រុមគ្រួសារយកទៅតម្កល់វត្ដអង្គមេត្រី ដើម្បីរៀបចំធ្វើបុណ្យតាមប្រពៃណី ៕
https://youtu.be/q341cGjUd1g
ចែករំលែកព័តមាននេះ