ខេត្តបាត់ដំបង ៖ សេចក្តីរាយការណ៍បឋមឱ្យដឹងថា អ្នកបើកបររថយន្តម្នាក់បានស្លាប់ភ្លាមៗ ខណៈកំពុងឈប់ដូយកង់រថយន្តលើចិញ្ចើម ហើយក៏មានរថយន្តដឹកដីធុនធំមួយគ្រឿងបើកដូចហោះ មកបុកពីក្រោយ រថយន្តបន្តបន្ទាប់គ្នារហូតដល់៤គ្រឿង (រួមទាំងរថយន្តជនរងគ្រោះ) ។…
ខេត្តបាត់ដំបង ៖ សេចក្តីរាយការណ៍បឋមឱ្យដឹងថា អ្នកបើកបររថយន្តម្នាក់បានស្លាប់ភ្លាមៗ ខណៈកំពុងឈប់ដូយកង់រថយន្តលើចិញ្ចើម ហើយក៏មានរថយន្តដឹកដីធុនធំមួយគ្រឿងបើកដូចហោះ មកបុកពីក្រោយ
រថយន្តបន្តបន្ទាប់គ្នារហូតដល់៤គ្រឿង (រួមទាំងរថយន្តជនរងគ្រោះ) ។ ហេតុការណ៍នេះ បានកើតឡើងកាលពីវេលាម៉ោង១០ព្រឹកថ្ងៃទី២០ មករា នេះ ស្ថិតតាមបណ្តោយផ្លូវជាតិលេខ៥៧ ត្រង់ចំណុចភូមិគោកពន្លៃ សង្កាត់អូរម៉ាល់ ក្រុងបាត់ដំបង ហើយអ្នកបើកបរបានដាក់មេប្រូចបាត់ ក្រោយបង្កហេតុ ។
សេចក្តីរាយការណ៍បន្តថា ជនរងគ្រោះដែលស្លាប់ខាងលើ មានឈ្មោះថន កុម្ភៈ អាយុ៣៥ឆ្នាំ ជាអ្នកបើកបររថយន្តក្រុមហ៊ុនជប៉ុនធ្វើផ្លូវហាយវ៉េ (ផ្លូវជាតិលេខ៥ វាងក្រុងបាត់ដំបង) មានទីលំនៅក្នុងស្រុកមោងប្ញស្សី ។ ដោយឡែក រថយន្តបង្កមិនត្រូវស្គាល់ឈ្មោះអ្នកបើកនោះទេ ព្រោះរត់បាត់ស្រមោល បន្សល់ទុកតែនៅកន្លែងកើតហេតុ ម៉ាកហ៊ីណូ ពាក់ស្លាកលេខបន្ទាយមានជ័យ 3A-0367 ដែលជារថយន្តដឹកដីរបស់ក្រុមហ៊ុនឯកជនមួយ ហើយរថយន្ត២គ្រឿងទៀត មិនស្គាល់ម្ចាស់នោះទេ។
ទាក់ទិនករណីនេះ ត្រូវបានសមត្ថកិច្ចឱ្យដឹងថា មុនពេលកើតហេតុ គេឃើញជនរងគ្រោះដែលស្លាប់ កំពុងអោនដូយរថយន្ត ។ ក្នុងនោះ ក៏មានរថយន្តមួយគ្រឿងទៀតមកជួយដែរ ។ មួយសន្ទុះ ក្រោយមករថយន្តបង្កធ្វើដំណើរក្នុងទិសដៅពីលិចទៅកើតមានល្បឿនដូចហោះ (ដែលសង្ស័យ អ្នកបើកបរមិនបានបើកភ្នែក) មកដល់ ក៏បុកជាមួយរថយន្តមួយគ្រឿង រហូតរាលទៅដល់ជនរងគ្រោះនិងរថយន្តយ៉ាងទំហឹងតែម្តង ។
ចែករំលែកព័តមាននេះ