ខេត្តបន្ទាយមានជ័យ ៖ រថយន្តដឹកស៊ីទែនសាំងខូចលើចិញ្ចើមផ្លូវ ត្រូវម៉ូតូបុក បណ្ដាលឲ្យអ្នកបើកបរម៉ូតូ ស្លាប់ម្នាក់របួសធ្ងន់ម្នាក់ ទុកជាង៧ខែគ្មានអ្នកចូលដោះស្រាយ ដោយមានការសង្ស័យវះស៊ីទែនមើល ឃើញសុទ្ធតែឈើគ្រញូងពេញស៊ីទែនសាំង ខណៈសមត្ថកិច្ចពិនិត្យនៅល្ងាចថ្ងៃទី១៩ ខែមករា ឆ្នាំ២០១៨នេះ នៅស្នងការដ្ឋាននគរបាលខេត្ត បន្ទាយមានជ័យ។ លោកវរះសេនីយ៍ឯក សន គឹមសួរ នាយការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលខេត្តបន្ទាយមានជ័យបានប្រាប់ថា៖
កាលពីអំឡុងខែឧសភា ឆ្នាំ២០១៧ មានគ្រោះថ្នាក់ចរាចរណ៍បានកើតឡើងបង្កដោយរថយន្ត ដឹកស៊ីទែនសាំង១គ្រឿង ពាក់ស្លាកលេខ ភ្នំពេញ 3C-0213 ខូចហើយចតចោលនឹងចិញ្ចើមផ្លូវពេលយប់ គ្មានដាក់ស្លាកសញ្ញាត្រូវបានអ្នកជិះម៉ូតូ១គ្រឿងគ្នា២នាក់ជិះបុកពីក្រោយបណ្តាលស្លាប់ម្នាក់ នៅនឹងកន្លែង រីឯម្នាក់ទៀតរបួសធ្ងន់ ហើយអ្នកបើកបានរត់គេចខ្លួនបាត់ត្រូវបានកម្លាំងនគរបាល ចរាចរណ៍ជើងគោក ខេត្តបន្ទាយមានជ័យធ្វើការវាស់វែង ហើយយកមករក្សាទុកនៅស្នងការនគរបាល ខេត្តបន្ទាយមានជ័យ។ លោកបានបញ្ជាក់ថា៖ ក្រោយពេលដែលកម្លាំងនគរបាលជំនាញយករថយន្ត ដែលបង្កគ្រោះថ្នាក់ បណ្តាលស្លាប់ម្នាក់ និងរបួសម្នាក់ទុកនៅស្នងការនគរបាលខេត្ត ដើម្បីឲ្យម្ចាស់រថយន្ត ស៊ីទែនសាំងចូលមកដោះស្រាយតែមិនឃើញចូលខ្លួនទុករហូតជាង៧ខែ ដោយសង្ស័យរថយន្តផ្ទុកបទ ល្មើស។
ដោយមានការណែនាំពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត បន្ទាយមានជ័យ បានឲ្យបង្កើតគណៈកម្មការធ្វើការត្រួតពិនិត្យដោយមានវត្តមានលោក តេង សម័យ ព្រះរាជអាជ្ញារងសាលាដំបូងខេត្ត និងមន្ត្រីអយ្យការ និងកម្លាំងនគរបាលជំនាញបានធ្វើការវះ ស៊ីទែនសាំងត្រួតពិនិត្យឃើញសុទ្ធតែឈើគ្រញូងពេញស៊ីទែនសាំង។ លោកវរៈសេនីយ៍ឯក ឆេន សុវត្ថិ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យបានប្រាប់ថា៖ ក្រោយពេលដែលគណៈកម្មាការត្រួតពិនិត្យឃើញឈើគ្រញូងក្នុងស៊ីទែនសាំងពេញ ហើយត្រួតពិនិត្យជំហានដំបូង រកឃើញឈើគ្រញូងចំនួន៣៥៥ដុំ ១ដុំមានទំងន់១គីឡូក្រាមទៅ១គីឡូក្រាមកន្លះ។ ហើយដោយពេលល្ងាចគណៈកម្មាការបានផ្សារបិទស៊ីទែននៅមិនទាន់រើប្រវែង៤ម៉ែត្រទៀត និងបន្តរើនៅថ្ងៃទី២០ ខែមករា ឆ្នាំ២០១៨ ស្អែកនេះ។ ចំណែកឈើរើរួចហើយដឹកទៅរក្សាទុកនៅសាលាដំបូងខេត្តបន្ទាយមានជ័យ៕
ចែករំលែកព័តមាននេះ