រាជធានីភ្នំពេញ ៖ មនុស្ស២ក្រុមឈ្លោះគ្នាពេលយប់ កាប់ច្រឡំគូបដិបក្ខ បណ្តោលឲ្យយុវជនម្នាក់រងរបួស និង២នាក់ត្រូវបានសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញចាប់ខ្លួន។ ហេតុការណ៍នេះ បានកើតឡើងកាលពីវេលាម៉ោង២ រំលងអាធ្រាត្រ ឈានចូលថ្ងៃទី១៨ មករា ២០១៨ នៅចំណុចខាង ក្រោយផ្សារជិនជូរី ផ្លូវ២០០៤ សង្កាត់កាកាប១ ខណ្ឌពោធិសែនជ័យ។ ជនសង្ស័យម្នាក់ឈ្មោះ ហេង ប៊ុនណា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះមិនចាំលេខ ផ្លូវលេខ៦A ភូមិព្រែកអញ្ចាញ ឃុំព្រែកអញ្ចាញ ស្រុកមុខកំពូល ខេត្តកណ្តាល (អ្នកបើកម៉ូតូឌុបជនដៃដល់) និងម្នាក់ទៀតឈ្មោះ សំណាង ម៉ូរ៉ាឌីណុល ភេទប្រុស អាយុ១៨ឆ្នាំ មុខរបរ អ្នករត់តុនៅភោជនីយដ្ឋានង៉ន សង្កាត់ទន្លេបាសាក់ ខណ្ឌចម្ការមន ស្នាក់នៅផ្ទះមិនចាំលេខ ផ្លូវលំ ភូមិតាងួន សង្កាត់កាកាប១ ខណ្ឌពោធិសែនជ័យ (ជាជនដៃដល់កាន់ដាវកាប់ជនរងគ្រោះ)។
ទាក់ទិនករណីខាងលើនេះ លោកវរៈសេនីយ៍ឯក ប៊ុន សន្យា ប្រធានការិល័យនគរបាលព្រហ្មទណ្ឌ កម្រិតស្រាលរាជធានីភ្នំពេញបានឲ្យដឹងថា នៅវេលាថ្ងៃខែខាងលើ មានយុវជន២ក្រុមឈ្លោះប្រកែកគ្នា នៅខាងក្រោយផ្សារជិនជូរី ខណៈនោះត្រូវជនសង្ស័យ២នាក់នេះ បានជិះម៉ូតូទៅជួយបក្ខពួកម្ខាងដែលកំពុងឈ្លោះគ្នា។ ពេលទៅដល់ឈ្មោះ សំណាង ម៉ូរ៉ាឌីណុល បានប្រើដាវកាប់ទៅលើភាគីជម្លោះ ប៉ុន្តែបែរជាកាប់ត្រូវយុវជនម្នាក់ឈ្មោះ ផល សុធា អាយុ២៤ឆ្នាំ មុខរបរ កម្មកររោងចក្រ បណ្តាលឲ្យរងរបួសក្បាល ដេរ៥ថ្នេរ ដែលមិនដឹងអីសោះ (ពោលគឺចាប់ច្រឡំ)។ ស្របពេលនោះដែរកម្លាំងសមត្ថកិច្ចនគរបាលព្រហ្មទណ្ឌ បានចុះទៅបង្ក្រាបជាក់ស្តែង និងឃាត់បាន២នាក់ ហើយត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី។ ចំណែកជនរងគ្រោះត្រូវបានក្រុមគ្រួសារនាំសង្គ្រោះនៅមន្ទីរពេទ្យ៕
ចែករំលែកព័តមាននេះ