សហរដ្ឋអាមេរិក ៖ បច្ចុប្បន្នឪពុកម្តាយដែលបង្ខាំងទុកកូនៗរបស់ពួកគេ១៣នាក់ក្នុងផ្ទះ របស់ពួកគេឯទីក្រុង PERRIS រដ្ឋកាលីហ្វ័រនីញ៉ា ត្រូវបានគេនាំទៅកាន់តុលាការអាមេរិក។
ផ្ទះរបស់ពួកគេនៅក្រុង PERRIS ក្លាយជាគុកមួយសម្រាប់កូនពួកគេ១៣នាក់មានអាយុពី២ឆ្នាំទៅ២៩ឆ្នាំ ។ ឪពុកម្តាយនេះត្រូវជាប់ការចោទប្រកាន់ពីបទបង្ខាំងទុក និងបង្អត់អាហារដល់ពួកកូនៗ ដែលជាទង្វើកម្រមានបំផុតក្នុងលោក ។ ពេលពួកគេត្រូវបានរកឃើញបន្ទប់របស់ពួកគេពោរពេញដោយទឹកនោម ហើយពួកគេត្រូវចងដោយក្រវាត់ជាប់នឹងគ្រែ ។ ពេលនេះពួកកូនទាំងនេះត្រូវបានបញ្ជូនទៅមន្ទីរពេទ្យដោយសារការខ្វះជាតិអាហារធ្ងន់ធ្ងរ ។
ស្ត្រីអ្នកជិតខាងម្នាក់ លោកស្រី KIMBERLY MILLIGAN អះអាងប្រាប់កាសែត LOS ANGELES TIMES កាលពីថ្ងៃទី១៨ មករា ថា គាត់ឃើញពួកគេស្ថិតក្នុងស្ថានភាពយ៉ាងចម្លែកបំផុត ។ គាត់រៀបរាប់ថា ក្មេងៗទាំងនោះមានរាងកាយស្លេកស្លាំង ហើយភ្នែកពួកគេ ព្រោះតែក្នុងទីងងឹតស្ទើរតែមើលពុំឃើញ ។ ពួកគេទទួលការសិក្សាក្នុងផ្ទះ ។ នេះជាព័ត៌មានអះអាងដោយជីដូន ជីតាពួកគេ ដែលថា ពុំបានជួបពួកចៅៗចាប់តាំងពីជិត៥ឆ្នាំមកហើយ ហើយជីដូន និងជីតានោះនិយាយថា ពួកគាត់ពិតជាភ្ញាក់ផ្អើល និងក្តុកក្តួលយ៉ាងខ្លាំង ។ ចៅៗទាំងនេះនៅរស់ពិតជារឿងអស្ចារ្យណាស់ ។
យោងតាមទូរទស្សន៍ NBC NEWS ថា កូនទាំង១៣នាក់របស់គ្រួសារនេះមានសិទ្ធិបរិភោគអាហារតែមួយពេលប៉ុណ្ណោះក្នុងមួយថ្ងៃ ហើយកាន់តែយ៉ាប់ខ្លាំងទៀតនោះ ពួកគេអាចបានងូតទឹកតែ២លើកប៉ុណ្ណោះក្នុង១ឆ្នាំ ។
ឪពុកគ្រួសារនេះ លោក DAVID TURPIN អាយុ៥៧ឆ្នាំ និងភរិយាលោកស្រី LOUISE អាយុ៤៩ឆ្នាំ ត្រូវជាប់ឃុំឃាំងពីបទធ្វើទារុណកម្ម និងធ្វើឱ្យមានគ្រោះថ្នាក់ដល់កុមារ ។ គេកំណត់ប្រាក់ធានាក្នុងម្នាក់៩លានដុល្លារ ដើម្បីអាចបាននៅក្រៅឃុំជាយថាហេតុ ៕
ចែករំលែកព័តមាននេះ