ខេត្តស្ទឹងត្រែង ៖ វិវាទដីធ្លីនៅតែជាបញ្ហាសម្រាប់ការដោះស្រាយទៅតាមផ្លូវច្បាប់ ខណៈម្ចាស់ដីនីមួយៗប្រកាន់ជំហរថា ដីនេះជាកម្មសិទ្ធរបស់ពួកគាត់ ដែលបានកាន់កាប់ជាច្រើនឆ្នាំកន្លងមកហើយ ។
ពាក់ព័ន្ធករណីវិវាទដីធ្លីដដែល ត្រូវបានគេចោទប្រកាន់ថា លោក ប៊ួរ សៃ អតីតប្រធានការិយាល័យរៀបចំដែនដី នគរររូបនីយកម្ម សំណង់ និងភូមិបាល ស្រុកសេសាន បានឃុបឃិតជាមួយឈ្មោះ គង់ សុផល មន្ត្រីនៃមន្ទីរសាធារណៈការ និងដឹកជញ្ជូនខេត្តស្ទឹងត្រែង គូរប្លង់ដីទំហំ៥,០០០ម៉ែត្រការេ ជាន់មកលើដីចំការដូងមួយកន្លែង ស្ថិតនៅចំណុចអូរឃ្លុង ឃុំសាមឃួយ ស្រុកសេសាន ខេត្តស្ទឹងត្រែង ដែលជាដីចំការរបស់ លោក ឡន វណ្ណា អ្នករាយការព័ត៌មានទូរទស្សន៍ PNN ។
ករណីនេះ លោក ឡន វណ្ណា បានឱ្យដឹងថា លោកបានទិញដីខាងលើនេះពីឈ្មោះ ឡង ប៊ុនយ៉ង ជាកូនបង្កើតរបស់លោក ស៊ុន ឡង មេឃុំសាមឃួយ តាំងពីថ្ងៃទី១២ ខែធ្នូ ឆ្នាំ២០០៦ ដោយមានសក្សីជាប់ព្រំទាំង៤ ដឹងឮរហូតមាន មេភូមិ មេឃុំ អភិបាលស្រុក ស៊ីញេបោះត្រា ។
លោកបន្តទៀតថា ក្នុងខណៈពេលទិញដីភ្លាមៗនោះ ក៏បានយកជើងតាងស៊ីម៉ងត៍មកដាំជាព្រំដី ទៅតាមបង្គោលរបងចាស់របស់ម្ចាស់ដើម ឡង ប៊ុនយ៉ង ក្រោយមកក៏បានធ្វើរបងព័ទ្ធជុំវិញតាមទម្រង់ចាស់ ហើយសម្អាតផ្ទៃដីដាំដើមដូងឡើងធំលេចក្បាល ក៏ស្រាប់តែលេចមុខ២នាក់ប្តីប្រពន្ធ មកអុកឡុកថា «ឡន វណ្ណា បំពានយកដីរបស់គេ ដោយមានការវិវាទដូចនេះ លោក ឡន វណ្ណា ក៏បានស្នើសុំទៅ អាជ្ញាធរស្រុកសេសានឱ្យជួយធ្វើការដោះស្រាយ» ទើបបានឃើញថា «លោក ប៊ួរ សៃ ប្រធានការិយាល័យរៀបចំដែនដី នគររូបនីយកម្ម សំណង់ និងភូមិបាល ស្រុកសេសាន ឃុបឃិតជាមួយ លោក គង់ សុផល មន្ត្រីមន្ទីរសាធារណៈការ និងដឹកជញ្ញូនខេត្តស្ទឹងត្រែង លួចគូរប្លង់ជាន់លើកន្ទុយដី ដែលមានលេខប្លង់០២៧ ដនសភ ចុះថ្ងៃទី១៦ ខែកក្កដា ឆ្នាំ២០០៧» ហើយនឹងលួចដាំបង្គោលស៊ីម៉ង់ នៅលើកណ្តាលដី ចំការនោះយកទៅលក់ឱ្យឈ្មោះ បេ គឹមសាន និងប្រពន្ធឈ្មោះ អឿន ណារី នៅភូមិបាក់រនាស់ ឃុំសង្ឃ័រ ស្រុកស្វាយទាប ខេត្តស្វាយរៀង ៕
ចែករំលែកព័តមាននេះ