រាជធានីភ្នំពេញ ៖ អាជ្ញាធរខណ្ឌដូនពេញ បានចុះធ្វើរដ្ឋបាលនិងឃាត់ខ្លួនស្ត្រីរកស៊ីផ្លូវភេទដែលឈរហៅម៉ូយនៅជុំវិញបរិវេណវត្តភ្នំបានសរុបចំនួន១១នាក់និង៤នាក់ទៀតជាអ្នកប្រើប្រាស់ថ្នាំញៀននៅប្លុកបឹងកក់ កាលពីវេលាម៉ោង៨យប់ថ្ងៃទី១៧ មករា នៅតាមបណ្តោយមហាវិថីព្រះនរោត្តមត្រង់ចំណុចរង្វង់មូលវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីមន្ត្រីសាលាខណ្ឌដូនពេញបានឱ្យដឹងថា នៅចំណុចរង្វង់មូលវត្តភ្នំ មានស្រី្តរកស៊ីផ្លូវភេទឈរហៅម៉ូយយ៉ាងរញ៉េរញ៉ៃតាមផ្លូវសាធារណៈ ទើបលោកអភិបាលខណ្ឌដូនពេញឱ្យគណៈបញ្ជាការឯកភាពខណ្ឌចុះរៀបចំសណ្តាប់ធ្នាប់ប្រមូលស្ត្រីទាំងនោះដែលឈរហៅម៉ូយគ្មានសណ្តាប់ធ្នាប់ និងតែងតែបន្លំលួចយករបស់របរភ្ញៀវណាដែលស្រវឹងស្រាមករកសេវាផ្លូវភេទទៀតផង យកទៅអប់រំ កុំឱ្យមានទៀត ។
យុទ្ធនាការនេះ កម្លាំងសមត្ថកិច្ចបានប្រមូលស្ត្រីរកស៊ីផ្លូវភេទនៅវត្តភ្នំបានចំនួន១០នាក់ និងម្នាក់ទៀតនៅក្រោមដើមពោធិ៍មុខបារទន្លេសាប និងបន្តឃាត់ខ្លួនអ្នកប្រើប្រាស់ថ្នាំញៀនចំនួន៤នាក់នៅប្លុកបឹងកក់ ក្នុងនោះមានស្រី២នាក់និងប្រុស២នាក់ដកហូតបានឧបករណ៍សម្រាប់ជក់ថ្នាំញៀនបញ្ជូនទៅសាលាខណ្ឌដូនពេញ ។នារីរកស៊ីផ្លូវភេទទាំងនោះរួមនឹងអ្នកប្រើប្រាស់ថ្នាំញៀនផងត្រូវបានសាលាខណ្ឌដូនពេញបញ្ជូនទៅអប់រំនៅមន្ទីរសង្គមកិច្ចដើម្បីឱ្យពួកគេកែខ្លួនឡើងវិញ ៕
ចែករំលែកព័តមាននេះ