បន្ទាយមានជ័យ ៖ មន្ត្រីអធិការដ្ឋានរដ្ឋបាលជលផលខាងជើងបឹងទន្លេសាប បានបង្ក្រាបបទល្មើសជលផលក្នុងតំបន់អភិរក្សរហាលកំព្រីង លេងកូនត្រីជិត១តោន កាលពីថ្ងៃទី១៨ ខែមករា ឆ្នាំ២០១៨ ស្ថិតភូមិ-ឃុំសំបួ ស្រុកមង្គលបូរី…
បន្ទាយមានជ័យ ៖ មន្ត្រីអធិការដ្ឋានរដ្ឋបាលជលផលខាងជើងបឹងទន្លេសាប បានបង្ក្រាបបទល្មើសជលផលក្នុងតំបន់អភិរក្សរហាលកំព្រីង លេងកូនត្រីជិត១តោន កាលពីថ្ងៃទី១៨ ខែមករា ឆ្នាំ២០១៨ ស្ថិតភូមិ-ឃុំសំបួ ស្រុកមង្គលបូរី ។
លោក ហ៊ី សេងគ្រី មន្ត្រីមន្ត្រីអធិការដ្ឋានរដ្ឋបាលជលផលខាងជើងបឹងទន្លេសាប ប្រចាំខេត្តបន្ទាយមានជ័យបានប្រាប់ថា ដោយមានការណែនាំពីលោក អេង ជាសាន ប្រធានរដ្ឋបាលជលផលកម្ពុជាបានដាក់វិធានការលុបបំបាត់បទល្មើសនេសាទជុំវិញបឹងទន្លេសាប ហើយមន្ត្រីអធិការដ្ឋានប្រចាំខេត្តបន្ទាយមានជ័យបានសហការជាមួយមន្ត្រីខណ្ណរដ្ឋបាលជលផលខេត្តបន្ទាយមានជ័យរួមជាមួយសហគមន៍នេសាទថ្មដបចំនួន១០នាក់ បានចុះបង្ក្រាបបទល្មើសនេសាទក្នុងតំបន់អភិរក្សជលផលរហាលកំព្រីងដែលមានទំហំ១៧១ហិចតា ។
លោកបានបញ្ជាក់ថា ការបង្ក្រាបបទល្មើសជលផលក្នុងតំបន់អភិរក្សជលផលរហាលកំព្រីងរឹបអូស និងបំផ្លាញមាន រុះរើរបាំងសាច់អួន១កន្លែង មានប្រវែង២០០ម៉ែត្រ ឡុក១កន្លែង និងបរចាប់ត្រី១គ្រឿង និងមង្គោលចំនួន៦០ដើម លេងកូនត្រីចម្រុះទម្ងន់ជាង៧០០គីឡូក្រាម ហើយបទល្មើសជលផលដែលបង្ក្រាបត្រូវបានមន្ត្រីជំនាញដុតកំទេចចោលដែរ ។
ក្រោយពេលដែលមន្ត្រីជំនាញបង្ក្រាប់បទល្មើសនេសាទនៅតំបន់អភិរក្សជលផលរហាលកំព្រីង ឃុំសំបួរ ស្រុកមង្គលបូរី ប្រជាពលរដ្ឋបានកោតសសើរចំពោះមន្ត្រីអធិការដ្ឋានរដ្ឋបាលជលផលខាងជើងបឹងទន្លេសាប ហើយសំណូមពរសុំឲ្យមន្ត្រីជំនាញត្រូវមានវិធានការបន្តទៀតជាពិសេសបទល្មើសនេសាទស្រុកព្រះនេត្រ និងស្រុកមង្គលបូរីដែលជាប់បឹងទន្លេងដែលមានបទល្មើសកើតឡើង និងចំណុចអូរគៀនក្រោល និងអូរកំបុតស្ថិតក្នុងឃុំរហាត់ ស្រុកមង្គលបូរីដែលមានបទល្មើសនេសាទកើតឡើងដោយដាក់សម្រាស់អូសអួន ៕
ចែករំលែកព័តមាននេះ