ខេត្តកំពង់ធំ ៖ ករណីរថយន្តហ៊ីយាន់ដាយដឹកត្រីចំណុះ១តោនកន្លះ ពណ៌ខៀវ ស្លាកលេខ កំពង់ចាម ២A -៦២៨៧ បានបុកគោយន្តកន្ត្រៃដឹកអុសពីក្រោយពេញទំហឹងបណ្តាលឱ្យរបួសធ្ងន់៣នាក់បានកើតឡើងកាលពីព្រឹកថ្ងៃទី១៨ ខែមករា ឆ្នាំ២០១៨ តាមបណ្តោយផ្លូវជាតិលេខ៧១ ចំណុចវាលគោលាប់ ស្ថិតក្នុងភូមិតាប្រុក ឃុំឈូកខ្សាច់ ស្រុកបារាយណ៍ ខេត្តកំពង់ធំ ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តហ៊ីយ៉ាន់ដាយដឹកត្រីចេញដំណើរពីជើងទៅត្បូងក្នុងល្បឿនយ៉ាងលឿនចេញពីផ្សារកំពង់ថ្មក្នុងគោលបំណងដឹកត្រីយកទៅលក់នៅខេត្តកំពង់ចាម ហើយគេឃើញអ្នកបើកគោយន្តកន្ត្រៃដឹកអុស ចេញពីជើងទៅត្បូងដូចគ្នាទិសដៅស្របទិសគ្នា លុះមកដល់កន្លែងកើតហេតុខាងលើ ក៏គោយន្តកន្ត្រៃពីក្រោយពេញទំហឹងអូសប្រមាណ៥០ម៉ែតធ្លាក់វាលស្រែបណ្តាលឱ្យរងរបួសធ្ងន់៣នាក់ត្រូវបានបញ្ជូនយកទៅសង្គ្រោះនៅមន្ទីរពេទ្យបង្អែកស្រុកចំការលើ ជនរងគ្រោះដែលម្ចាស់រថយន្តដឹកត្រី២នាក់ប្តីប្រពន្ធប្តីឈ្មោះ ប៊ុត សុឃិន អាយុ៤០ឆ្នាំ របួសធ្ងន់ ប្រពន្ធឈ្មោះ ខៀវ សុផារី អាយុ៣៥ឆ្នាំរបួសធ្ងន់ អ្នកទាំងពីរនាក់មានទីលំនៅភូមិពោធិ៍ពី ឃុំបារាយណ៍ ស្រុកបារាយណ៍ ចំណែកជនរងគ្រោះដែលជាអ្នកបើកគោយន្តកន្ត្រៃឈ្មោះ ថោង ធីម ភេទប្រុស អាយុ៣០ឆ្នាំ របួសធ្ងន់ទីលំនៅភូមិកំពង់ពោន ឃុំបាក់ស្នា ស្រុកបារាយណ៍ ខេត្តកំពង់ធំ ។
បន្ទាប់ពីវាស់វែងរួចវត្ថុតាងរថយន្ត និងគោយន្តកន្ត្រៃត្រូវបានយកទៅរក្សារទុកនៅអធិការដ្ឋាននគរបាលស្រុកបារាយណ៍រងចាំធ្វើការដោះស្រាយតាមផ្លូវច្បាប់ ៕
ចែករំលែកព័តមាននេះ