រាជធានីភ្នំពេញ ៖ កូយ ឡាយ មកពីក្លិបទ័ពពិសេសឆត្រយោង៩១១ និងមាស ច័ន្ទមាន មកពីសមាគមកីឡាប្រដាល់ក្រសួងការពារជាតិត្រូវបានគណៈកម្មការរៀបចំការប្រកួតសម្រេចផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍MyTV នាយប់ថ្ងៃសុក្រ ទី១៩…
រាជធានីភ្នំពេញ ៖ កូយ ឡាយ មកពីក្លិបទ័ពពិសេសឆត្រយោង៩១១ និងមាស ច័ន្ទមាន មកពីសមាគមកីឡាប្រដាល់ក្រសួងការពារជាតិត្រូវបានគណៈកម្មការរៀបចំការប្រកួតសម្រេចផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍MyTV នាយប់ថ្ងៃសុក្រ ទី១៩ មករា នេះ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំងពីររូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានវិជ្ជាគុនខ្លាំងពិបាកផ្ដួលអ៊ីចឹងនោះ។
កូយ ឡាយ ធ្លាប់ប្រកួត៤៤ដង ឈ្នះ៣៨ដង ស្មើ១ដង ចាញ់៥ដង និងធ្លាប់ផ្ដួលគូប្រកួតឱ្យសន្លប់១០ដង ត្រូវជួបប្រកួតជាមួយកីឡាករថៃឈ្មោះវ៉ាត់ឆារ៉ាក់ដេតស.ដានឆ័យ ដែលធ្លាប់ប្រកួត៩៥ដង ឈ្នះ៦៧ដង ស្មើ៥ដង ចាញ់២២ដង និងធ្លាប់ផ្ដួលគូប្រកួតឱ្យសន្លប់២១ដង ។ កូយ ឡាយ ក៏ជាអ្នកប្រដាល់ជើងចាស់មួយរូប ប៉ុន្តែមួយរយៈចុងក្រោយនេះមិនសូវឃើញគេលេចមុខនៅលើសង្វៀនញឹកញាប់ដូចមុនទេ ទើបគេមិនដឹងថាកីឡាកររូបនេះនៅរក្សាវិជ្ជាគុនល្អដូចមុនទៀតឬយ៉ាងណា ។ ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ នរណាខ្លាំងជាងនរណាគង់តែដឹងទេ។
មាស ច័ន្ទមាន ធ្លាប់ប្រកួត១១៨ដង ឈ្នះ៨៧ដង ស្មើ៩ដង ចាញ់២២ដង និងធ្លាប់ផ្ដួលគូប្រកួតឱ្យសន្លប់២១ដង ត្រូវជួបប្រកួតជាមួយកីឡាករថៃឈ្មោះលំណាវ ស.រ៉ាត់តាណារ៉ុងរោទដែលធ្លាប់ប្រកួត៨៨ដង ឈ្នះ៦៦ដង ស្មើ២ដង ចាញ់២០ដង ។ កីឡាករថៃរូបនេះមានវិជ្ជាគុនមិនអន់ទេ ពេលគេមកប្រកួតនៅលើសង្វៀនស្រុកខ្មែរម្ដងៗ ។ ប៉ុន្តែសម្រាប់ការមកជួបមាស ច័ន្ទមាន ដែលជាជើងខ្លាំងមួយរូបនៅក្នុងពិភពប្រដាល់កម្ពុជាលើកនេះមិនទាន់ដឹងថា អាចតស៊ូប្រកួតដល់ទឹកទី៥បានឬអត់ទេបើប្រៀបធៀបទៅលើប្រវត្តិប្រកួតគឺពិតជាមិនអាចទៅរួចមែនហើយ ។
ទោះបីយ៉ាងណាដោយសារតែកីឡាករទាំង២មិនធ្លាប់ជួបគ្នាពីមុនមកទើបគេពិបាកប៉ាន់ស្មានពីលទ្ធផលចុងក្រោយណាស់ ណាមួយថ្វីដ្បិតតែមាស ច័ន្ទមាន ត្រូវបានចាត់
ទុកជាជើងខ្លាំងលំដាប់ជួរមុខនៅក្នុងពិភពប្រដាល់កម្ពុជាមែន ប៉ុន្តែមួយរយៈចុងក្រោយនេះកម្លាំងរបស់គេរាងចុះខ្សោយជាងមុនបន្តិចពោលគឺអាចវាយបានល្អត្រឹមទឹកទី៣ប៉ុណ្ណោះ បើដល់ទឹកទី៤និងទី៥ប្រហែលជាពិបាកបន្តិចហើយ។
ចំណែកគូប្រកួតមិត្តភាពធម្មតាវិញ កីឡាករ ផាន់ សុផាត មកពីក្លិបពុទ្ធសេរីវង្សពោធិសែនជ័យ ប្រកួតជាមួយកីឡាករ ឡេង លីហៀងមកពីក្លិបតាព្រហ្មមានជ័យ និងកីឡាករ ឯក កៃឈៀង មកពីក្លិបមកុដរាជសីហ៍ ប្រកួតជាមួយកីឡាករ ផាន ចំណាន មកពីក្លិបរាជសីហ៍ ខេត្តរតនគិរី៕
ចែករំលែកព័តមាននេះ