ខេត្តកំពង់ឆ្នាំង ៖ ប្រជាពលរដ្ឋប្រមាណជាង៦០នាក់ ត្រូវបានដឹកមកសង្គ្រោះបន្ទាន់នៅក្នុងមន្ទីរពេទ្យខេត្ត បន្ទាប់ពីរងការពុលនំបញ្ចុកដែលពួកគាត់បានទទួលទាន ក្នុងឱកាសចូលរួមក្នុងពិធីបុណ្យសពខួប៧ថ្ងៃ ដែលធ្វើឡើងនៅភូមិចាស់ ឃុំតាំងក្រសាំង ស្រុកទឹកផុស។ ហេតុការណ៍ពុលនោះបានចាប់ផ្តើមនៅម៉ោង១កន្លះរសៀល ប៉ុន្តែពួកគាត់បានដឹកដល់មន្ទីរពេទ្យនៅម៉ោងប្រមាណជាង២រសៀល ថ្ងៃដដែល។ តាមប្រភពពីមន្ទីរពេទ្យជាជំហានដំបូងបានឱ្យដឹងថា រថយន្តសង្គ្រោះរបស់មន្ទីរពេទ្យបានទៅជញ្ជូនជនរងគ្រោះចំនួន៤ជើងដឹកពេញរថយន្ត ហើយគិតត្រឹមម៉ោង៥និង៣០នាទីល្ងាច ដែលតាមការប៉ាន់ប្រមាណជនរងគ្រោះមានប្រមាណជាង៤០នាក់ មានក្មេងចាស់ ប្រុសស្រី និងកុមារតូចៗក្នុងមន្ទីរពេទ្យ។ ចំណែកនៅតាមគ្លីនិកឯកជនមានប្រមាណជាង២០នាក់ទៀត។
តាមប្រភពពីប្រជាពលរដ្ឋដែលមកជួយជនរងគ្រោះបាននិយាយថា នៅផ្ទះម្ចាស់ដើមបុណ្យឈ្មោះប៉ិល យ៉េន អាយុ៥០ឆ្នាំ នៅភូមិខាងលើបានធ្វើបុណ្យសព៧ថ្ងៃ ទទួលភ្ញៀវដោយឱ្យពិសានំបញ្ចុកសំលខ្មែរ និងណាំយ៉ា (ស្លទឹកក្រហម)។ ភ្ញៀវបានពិសានំបញ្ចុកនៅម៉ោង១១ព្រឹក និងបានពុលនៅម៉ោងប្រមាណជាង១រសៀល ជាបន្តបន្ទាប់ ដោយរាក និងក្អួត។ គ្រូពេទ្យមិនទាន់និយាយថា បណ្តាលមកពីអ្វីទេ ប៉ុន្តែបានសង្ស័យលើបន្លែជាល្បោយនំបញ្ចុកច្រើនជាងគេ។ ទោះជាយ៉ាងណា ពុំទាន់មានអ្នករងគ្រោះដល់ជីវិតនៅឡើយទេ គិតត្រឹមម៉ោង៦ល្ងាចថ្ងៃដដែល៕
ចែករំលែកព័តមាននេះ