រាជធានីភ្នំពេញ ៖ មន្ត្រីជំនាញបាននិយាយថា សូចនាករនៅក្នុងក្របខ័ណ្ឌម៉ាក្រូសេដ្ឋកិច្ចកម្ពុជាឆ្នាំ២០១៨នេះ នៅតែបង្ហាញសញ្ញាវិជ្ជមាន ព្រោះវិស័យអាទិភាពសំខាន់ៗនៅតែមានកំណើន និងការរីកចម្រើនយ៉ាងរឹងមាំសម្រាប់រយៈពេលខាងមុខទៀត ។ លោក ហាវ…
រាជធានីភ្នំពេញ ៖ មន្ត្រីជំនាញបាននិយាយថា សូចនាករនៅក្នុងក្របខ័ណ្ឌម៉ាក្រូសេដ្ឋកិច្ចកម្ពុជាឆ្នាំ២០១៨នេះ នៅតែបង្ហាញសញ្ញាវិជ្ជមាន ព្រោះវិស័យអាទិភាពសំខាន់ៗនៅតែមានកំណើន និងការរីកចម្រើនយ៉ាងរឹងមាំសម្រាប់រយៈពេលខាងមុខទៀត ។
លោក ហាវ រតនៈ ប្រតិភូរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានថវិកា ស្តីពីច្បាប់ហិរញ្ញវត្ថុសម្រាប់ការគ្រប់គ្រងថវិកាឆ្នាំ២០១៨ ក្នុងវេទិកាសាធារណៈនៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៥ មករា ថ្លែងថា សូចនាករនៃក្របខ័ណ្ឌម៉ាក្រូសេដ្ឋកិច្ចឆ្នាំ២០១៦-២០១៨ ផលិតផលក្នុងស្រុកសរុប (ផ.ស.ស) តាមការព្យាករនៅក្នុងឆ្នាំ២០១៨នេះ អាចកើនឡើងជិត១០០លានលានរៀល ខណៈឆ្នាំ២០១៧ ត្រូវបានប៉ាន់ស្មានមានជាង៨៩លានលានរៀល ដែលធ្វើឲ្យផលិតផលក្នុងស្រុកសរុបមានកំណើន៧% និងឆ្នាំ២០១៧ សម្រេចបានកំណើនប្រមាណ៦,៩% ហើយនៅឆ្នាំ២០១៨ កម្ពុជានឹងអាចរក្សាបានកំណើនផលិតផលក្នុងស្រុកសរុបក្នុងរង្វង់៦,៩%ផងដែរ ។
វិស័យដែលនៅតែរក្សាកំណើនល្អសម្រាប់ឆ្នាំ២០១៨ រួមមាន វិស័យកសិកម្មអាចនឹងមានកំណើននៅក្នុងរង្វង់២,៣% ខណៈឆ្នាំ២០១៧ ត្រូវបានប៉ាន់ស្មានថាស្មើ២,០%, វិស័យឧស្សាហកម្មនឹងមានកំណើន៨,៦% ខណៈឆ្នាំ២០១៧ ត្រូវបានប៉ាន់ស្មានមានកំណើន៩,២% និងវិស័យសេវាកម្មមានកំណើនប្រមាណ៧,៦% ខណៈឆ្នាំ២០១៧ ត្រូវបានប៉ាន់ស្មានស្មើ៧,២%ផងដែរ ។
លោក ហាវ រតនៈ បានបន្តថា ប្រាក់ចំណូលប្រជាពលរដ្ឋម្នាក់ៗកាលពីក្នុងឆ្នាំ២០១៦បានកើនឡើង១.៣០២ដុល្លារ ។ ឆ្នាំ២០១៧ត្រូវបានប៉ាន់ស្មានកើនដល់១.៤៣៥ដុល្លារ និងឆ្នាំ២០១៨នេះ ត្រូវព្យាករថា កើនឡើងដល់១.៥៦៨ដុល្លារអាមេរិកក្នុង១ឆ្នាំ ។ ចំណែកអតិផរណាជាប្រាក់រៀល មានកំណើន៣%នៅឆ្នាំ២០១៦ និងឆ្នាំ២០១៧ ឡើងដល់៣,៨% និងនៅឆ្នាំ២០១៨ តាមការព្យាករ អត្រាអតិផរណាមានកំណើនប្រមាណ៣,៥% ។
របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ចំណែកទុនបម្រុងអន្តរជាតិនៅក្នុងឆ្នាំ២០១៦ មានចំនួន៦.៧៣១លានដុល្លារ ក្នុងនោះចំនួននាំចូលទំនិញ និងសេវាស្ថិតក្នុងរង្វង់៥,៤% ។ នៅឆ្នាំ២០១៧ ត្រូវបានប៉ាន់ស្មានមាន៩.០៥០លានដុល្លារ ហើយចំនួននាំចូលទំនិញ និងសេវាក្នុងរង្វង់៦,០% ។ ដោយឡែក នៅក្នុងឆ្នាំ២០១៨ តាមការព្យាករទុនបម្រុងអន្តរជាតិ អាចឡើងដល់១០.៥១៨លានដុល្លារ រួមជាមួយចំនួននាំចូលទំនិញ និងសេវាស្ថិតក្នុងរង្វង់៦,៥%ផងដែរ ។
លោក ហាវ រតនៈ បន្ថែមថា ទោះបីជាសូចនាករនៃក្របខ័ណ្ឌម៉ាក្រូសេដ្ឋកិច្ចមានភាពល្អប្រសើរក៏ដោយ ប៉ុន្តែបរិការណ៍រួមនៃការរៀបចំថវិកាឆ្នាំ២០១៨ នៅតែមានបញ្ហាប្រឈម និងហានិភ័យផងដែរ ដូចជា សម្ពោធចំណាយថវិកា បន្ទុកបុគ្គល ខណៈចំណូលថវិកាកៀកនឹងពិដាននៃសក្តានុពល និន្នាការកើនឡើងនៃថ្លៃប្រេង និងសម្ពោធនៃថ្លៃម្ហូបអាហារ ដែលធ្វើឲ្យមានបញ្ហាប្រឈមផ្សេងៗទៀត រួមមាន ថ្លៃអគ្គិសនីខ្ពស់ ប្រព័ន្ធដឹកជញ្ជូន និងឡូជីស្ទិកនៅទន់ខ្សោយ កំណើនប្រាក់ឈ្នួលអប្បបរមា, ផលិតភាពទាប កង្វះជំនាញ, ភាពស្មុគស្មាញ, និងតម្លៃខ្ពស់នៃនីតិវិធីធុរកិច្ចផងដែរ ។
លោក ង៉ែត ជូ ទីប្រឹក្សាផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា វិស័យសំខាន់ៗដែលជាកម្លាំងចលករជួយជំរុញកំណើនសេដ្ឋកិច្ចកម្ពុជានៅតែមានភាពល្អប្រសើរ ហើយសេដ្ឋកិច្ចកម្ពុជារីកចម្រើនក្នុងរង្វង់៧% សុទ្ធតែជាសញ្ញាវិជ្ជមាន ដែលនាំឲ្យកម្ពុជាអាចសម្រេចបានគោលដៅរបស់ខ្លួន ក្នុងការនាំប្រទេសទៅកាន់ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ខាងមុខ ។
លោកបន្តថា ៖« ផ្អែកលើមូលដ្ឋាន និងគោលនយោបាយត្រឹមត្រូវរបស់រដ្ឋាភិបាល សេដ្ឋកិច្ចកម្ពុជានឹងបន្តរីកចម្រើនរយៈពេលមធ្យមខាងមុខបន្ថែមទៀត » ៕
ចែករំលែកព័តមាននេះ