ខេត្តត្បូងឃ្មុំ ៖ ពិតជាគួរឲ្យរន្ធត់ដោយមនុស្សម្នាក់បានស្លាប់ភ្លាមៗ និង៥នាក់ទៀតបានរងរបួសធ្ងន់នៅក្នុងហេតុការណ៏គ្រោះថ្នាក់ចរាចរណ៏ដែលបានកើតឡើងនៅវេលាម៉ោង៩និង៣០នាទីយប់ ថ្ងៃទី១៨ ខែមករា ឆ្នាំ២០១៨ រវាងរថយន្តនឹងរថយន្តនៅលើកំណាត់ផ្លូវជាតិលេខ៧ត្រង់ចំណុចភូមិទួលវិហារ ឃុំជីរោទ៏ទី២ ស្រុកត្បូងឃ្មុំ ។
លោកវរសេនីយ៏ត្រី គង់ សីហុង អធិការរងនគរបាលទទួលផែនសណ្តាប់ធ្នាប់ស្រុកត្បូងឃ្មុំឲ្យដឹងថា រថយន្តម៉ាកតូយូតាហ៊ីលុច ពណ៌ទឹកមាស ពាក់ស្លាកលេខ ភ្នំពេញ ២W-៥៦៩៧ បើកបរដោយឈ្មោះ យី វឌ្ឍនៈ ភេទប្រុស អាយុ៣៦ឆ្នាំ នៅភូមិស្រែសៀម ឃុំជីរោទ៏ទី២ ស្រុកត្បូងឃ្មុំ ដឹកមនុស្សចំនួន២នាក់ក្នុងនោះមានឈ្មោះ គា គឹមសែ ភេទប្រុស អាយុ៤៦ឆ្នាំ ជាមន្ត្រីពន្ធនាគារខេត្ត, ទី២-ឈ្មោះ រ័ត្ន ភេទប្រុស អាយុ៤៥ឆ្នាំ នៅភូមិទួលសំបូរ ឃុំជប់ ស្រុកត្បូងឃ្មុំ បានបើកបរក្នុងទិសដៅពីលិចទៅកើតតាមបណ្តោយផ្លូវជាតិដោយបានប្រើប្រាស់ល្បឿនលឿនផងដែរ ។
លោកវរសេនីយ៏ត្រី គង់ សីហុង អធិការរងនគរបាលស្រុកត្បូងឃ្មុំទទួលផែនសណ្តាប់ធ្នាប់ប្រាប់បន្តថា ស្របពេលដែលជិះមកដល់ត្រង់ចំណុចផ្លូវកោងខ្លាំងហើយក៏ជាទីតាំងកន្លែងជើងកបក៏បានបុកជាមួយនឹងរថយន្ត១គ្រឿងម៉ាកសាំងយ៉ុង ពណ៌បៃតងចាស់ ពាក់ស្លាកលេខ ភ្នំពេញ ២O-៧២៨៧ បើកបរដោយឈ្មោះ យ៉ា ភេទប្រុស អាយុ២៨ឆ្នាំ នៅភូមិបឹងកុកទី២ សង្កាត់បឹងកុក ក្រុងកំពង់ចាម មានដឹកមនុស្សចំនួន២នាក់ក្នុងនោះមានទី១-ឈ្មោះ ណាន់ ភេទប្រុស អាយុ២៥ឆ្នាំ នៅភូមិជ្រោយថ្ម សង្កាត់បឹងកុក, ទី២-ឈ្មោះ វណ្ណា ភេទប្រុស អាយុ២០ឆ្នាំ នៅភូមិសង្កាត់ជាមួយនឹងអ្នកទី២ ដែលបានបើកបរក្នុងទិសដៅផ្ទុយគ្នានោះ ។
លោកវរសេនីយ៏ត្រី គង់ សីហុង អធិការរងនគរបាលស្រុកត្បូងឃ្មុំបញ្ជាក់ថា កម្លាំងបុករបស់រថយន្តទាំងពីរគ្រឿងនេះខ្លាំងបណ្តាលឲ្យរថយន្តរងការខូចខាតជាដំណំក្នុងនោះអ្នកជិះក្នុងរថយន្តតូយូតាហ៊ីលុចឈ្មោះ រ័ត្ន បានស្លាប់ភ្លាមៗនៅនឹងកន្លែងកើតហេតុ ចំណែកក្រៅពីនេះបានរងរបួសធ្ងន់រហូតដល់ទៅ៥នាក់ក្នុងនោះមានមានម្នាក់មិនស្គាល់ឈ្មោះ ។
ត្រង់កន្លែងគ្រោះថ្នាក់ខាងលើជាទីកន្លែងជើងកបដោយកន្លងមកបណ្តាលឲ្យមនុស្សស្លាប់បន្តបន្ទាប់ជាង១០នាក់មកហើយ សូម្បីតែដើមក្ងោកដែលដាំនៅចញ្ចើមថ្នល់ក៏ត្រូវរថយន្តបុករលើងខ្ទេចផងដែរ ។ ប្រសិនបើការធ្វើដំណើរមិនបានប្រុងប្រយ័ត្ននោះគ្រោះថ្នាក់ចរាចរណ៏នឹងកើតឡើងអ្នកធ្វើដំណើរតាមមធ្យោបាយយានយន្តគ្រប់ប្រភេទមិនថាថ្ងៃឬយប់នោះទេពេលបើកបរមកដល់ត្រង់កន្លែងផ្លូវកោងខ្លាំងត្រូវតែបន្ថយល្បឿនដើម្បីសុវត្ថិភាព ៕
ចែករំលែកព័តមាននេះ