ខេត្តរតនគិរី ៖ ភ្ញៀវទេសចរណ៍ជាតិ និងអន្តរជាតិត្អូញត្អែរថា ពិបាកធ្វើដំណើរទៅលេងរមណីដ្ឋានទឹកធ្លាក់ចាអ៊ុងលើដងផ្លូវក្រាលគ្រួសក្រហមរបស់មន្ទីរអភិវឌ្ឍន៍ជនបទ គាត់សង្ស័យកសាងលូជ្រុងខ្វះបច្ចេកទេស ខុសមុខទឹកហូរបណ្តាលឲ្យដាច់ផ្លូវតាំងពីខែកក្កដា ឆ្នាំ២០១៧ រហូតមកដល់ពេលនេះនៅមិនទាន់មានចំណាត់ការ ។
ប្រជាពលរដ្ឋ និងអ្នកធ្វើដំណើរលើដងផ្លូវដែលសាងសង់ដោយមន្ទីរអភិវឌ្ឍន៍ខេត្តបានឲ្យដឹងថា លូជ្រុងមុខពីរមួយកន្លែងនេះ សាងសង់ដោយមន្ទីរអភិវឌ្ឍន៍ជនបទខេត្ត ឆ្លងកាត់អូរកញ្ចន់នៅខាងលើតំបន់ទេសចរណ៍ទឹកជ្រោះចាអ៊ុងតភ្ជាប់ពីភូមិចាអ៊ុងក្រៅ ឃុំចាអ៊ុង ស្រុកអូរជុំ ភ្ជាប់ពីភូមិចាអ៊ុង ឃុំហាតប៉ក់ ស្រុកវ៉ើនសៃ ហើយលូជ្រុងភ្លោះមួយកន្លែងនេះ ត្រូវមន្ទីរអភិវឌ្ឍន៍ខេត្តកសាងឡើង តែសង្ស័យកង្វះបច្ចេកទេសសាងសង់លូខុស មុខទឹកហូរ មុខកាត់លូតូចពេកមិនអាចទប់ទល់នឹងលំហូរនៅរដូវវស្សាធ្វើឲ្យទឹកហូរខ្លាំងបុកបណ្តាលឲ្យដាច់ ផ្លូវជាប់ជញ្ជាំងលូពីខាងត្បូង គឺចាប់តាំងពីខែកក្កដា ឆ្នាំ២០១៧ រហូតមកដល់សព្វថ្ងៃនេះរយៈពេលជាង៥ខែហើយ អាជ្ញាធរ និងប្រធានមន្ទីរអភិវឌ្ឍន៍ជនបទខេត្តនៅមិនទាន់មានវិធានការនៅឡើយ ហើយដោយសារតែផ្លូវនេះមានផ្លូវដាច់ គ្មានផ្លូវវាងផង ប្រជាពលរដ្ឋសំណូមពរដល់អាជ្ញាធរ និងមន្ទីរអភិវឌ្ឍន៍ខេត្តមេតា្តជួយកសាងផ្លូវដែលទឹកហូរដាច់នេះឲកយបានលឿន ព្រោះកន្លែងនេះជាតំបន់ទេសចរណ៍ធម្មជាតិទឹកជ្រោះចាអ៊ុង ដើម្បីកុំឲ្យភ្ញៀវទេសចរណ៍ជាតិ និងអន្តរជាតិគេវាយតម្លៃ ។
លោកង៉ែត វិទូ ប្រធានមន្ទីរទេសចរណ៍ខេត្តបានឲ្យដឹងកាលពីរសៀលថ្ងៃទី១៨ ខែមករា ឆ្នាំ២០១៨ ថារមណីដ្ឋានទឹកជ្រោះចាអ៊ុងមានចម្ងាយ៩គីឡូម៉ែត្រ ចេញពីទីរួមខេត្តរតនគិ រី(ក្រុងបានលុង) ក្នុងរយៈពេល១ឆ្នាំកន្លងមកហើយផ្លូវទៅលេងរមណីដ្ឋាននេះ ចាប់ផ្តើមខូចជាអន្លើៗហើយភ្ញៀវទេសចរណ៍ក៏បានថយចុះបន្តិចម្តងៗដោយសារផ្លូវ ។ លោកបានបន្តទៀតថា ភ្ញៀវទៅលេងរមណីដ្ឋានខាងលើនៅរដូវបុណ្យទានតាមស្ថិតិមន្ទីរទេសចរណ៍ចាប់ពី២០០០នាក់ឡើងទៅ តែបច្ចុប្បន្នបានតែ២០០០នាក់ទេក្នុងឆ្នាំ២០១៦ ហើយឆ្នាំ២០១៧នេះសរុបភ្ញៀវជាតិ អន្តរជាតិ មកលេងរមណីដ្ឋានខេត្តរតនគិរីមានចំនួន១៨ម៉ឺននាក់ ៕
ចែករំលែកព័តមាននេះ