រាជធានីភ្នំពេញ ៖ ក្នុងរយៈពេលចុងក្រោយ គេស្ទើរតែមិនឃើញកីឡាករជើងខ្លាំង កែវ រំចង់ ឡើងប្រកួតនៅលើសង្វៀនតែម្ដង ខណៈដែលមួយរយៈមុនកីឡាកររូបនេះត្រូវគេកត់សម្គាល់ថាល្បីល្បាញនិងមានមុខឡើងរេញនៅក្នុងព្រឹត្តិការណ៍សំខាន់ៗ ។
មានការអះអាងថា ការបាត់មុខកីឡាកររូបនេះពីសង្វៀនប្រដាល់មិនមានន័យថា ជើងខ្លាំងរូបនេះដកខ្លួនដូចគ្នានឹងកីឡាករល្បីមួយចំនួននោះទេ គឺលោកនៅតែទទួលប្រកួតនៅក្នុងព្រឹត្តិការណ៍ក្រៅស្រុក ដោយគ្រាន់តែមិនសូវញឹកញាប់ដូចមុនប៉ុណ្ណោះ ។ អ្វីដែលគេកត់សម្គាល់ពាក់ព័ន្ធនឹងកែវ រំចង់ ពេលនេះគឺជាក្មួយស្រីរបស់លោកឈ្មោះSamontha Stephenson ដែលកំពុងរស់នៅអាមេរិកធ្វើជាអ្នកប្រដាល់ទាំងវ័យក្មេងធ្វើឱ្យអ្នកណាៗក៏ចាប់អារម្មណ៍មិនខុសគ្នា ។
នៅក្នុងពិភពប្រដាល់ដាក់ទ្រុង គេចាប់អារម្មណ៍កីឡាការិនីវ័យ១៦ឆ្នាំ នាង Samontha Stephenson ខ្លាំងគួរសម បន្ទាប់ពីនាងបានបង្ហាញខ្លួននៅកម្ពុជា ហើយបានលេចមុខហ្វឹកហាត់នៅក្នុងក្លិបប្រដាល់យ៉ាងសកម្មថែមទាំងមានគម្រោងចេញប្រកួតនៅក្រៅប្រទេសទៀតផង ។ នាងជាតរុណីដែលបានចាប់កំណើត និងធំធាត់នៅលើទឹកដីអាមេរិក ដោយមានឪពុកជាជនជាតិអាមេរិក និងមានម្ដាយជាជនជាតិខ្មែរត្រូវជាបងស្រីរបស់លោកកែវ រំចង់ ។
ប្រភពភាគច្រើនបានលើកឡើងថា កញ្ញា Samontha Stephenson ស្រឡាញ់ពេញចិត្តការប្រដាល់តាំងពីធំដឹងក្ដីម៉្លេះ ដោយនាងត្រូវបានបញ្ជូនឱ្យហ្វឹកហាត់នៅក្នុងទឹកដីអាមេរិកយ៉ាងថ្នឹកមុនពេលមានឈ្មោះឡើងប្រដាល់ និងត្រូវបញ្ជូនឱ្យទៅហ្វឹកហាត់ជាមួយនឹងគ្រូថៃ និងបរទេសច្រើនឆ្នាំមកហើយនោះផង មុនពេលនាងមកលេងស្រុកកំណើតខាងម្ដាយ ដើម្បីមកសិក្សាស្វែងយល់ពីក្បាច់គុនខ្មែរ ។ ក្នុងពេលបង្ហាញខ្លួន លោក កែវ រំចង់ បានកំដរនាងហ្វឹកហាត់ ធ្វើឱ្យនាងទទួលបានបទពិសោធន៍និងយល់ដឹងពីក្បាច់គុនរបស់ខ្មែរច្រើនណាស់ដែរ បើទោះជានាងមិនមែនជាកីឡាការិនីផ្នែកប្រដាល់សេរី ឬប្រដាល់ក្បាច់គុនបុរាណខ្មែរ ដែលត្រូវស្វែងយល់កាន់តែច្រើនពីទម្រង់ក្បាច់គុនបុរាណខ្មែរក្ដី ។
នៅក្នុងទឹកដីអាមេរិក នាងប្រកួតទាំងប្រដាល់សេរី យូរៗម្ដងប្រដាល់សាកល និងភាគច្រើនគឺប្រដាល់ដាក់ទ្រុងតែម្ដង តែកញ្ញាត្រូវបានអះអាងថា គឺមានជំនាញលើផ្នែកប្រដាល់គ្រប់ទម្រង់ច្បាស់លាស់ ដោយឪពុកម្ដាយរបស់កញ្ញា ក៏ជំរុញទឹកចិត្តឱ្យនាងចូលប្រឡូកក្នុងការប្រដាល់ឱ្យសស្រាក់សស្រាំផងដែរ ទើបនាងវ័យក្មេងប៉ុន្តែទាំងរាងកាយ និងបទពិសោធន៍ក្នុងការប្រកួតគឺត្រូវគេអះអាងថាល្អមើល បើទោះជាការប្រកួតរបស់នាងមិនត្រូវបានគេស្គាល់ភាគច្រើននៅស្រុកខ្មែរក្ដី។ នាង និងគ្រួសារគឺជាពលរដ្ឋរស់នៅក្នុងក្រុង Stockton រដ្ឋកាលីហ្វ័រនីញ៉ា សហរដ្ឋអាមេរិក ហើយការសិក្សារបស់នាងក៏ល្អផងដែរ គឺមិនមែនប្រឡូកតែប្រដាល់ ហើយមើលរំលងនូវការសិក្សានោះទេ។
ការលេចមុខក្មួយស្រីរបស់កែវ រំចង់ នៅក្នុងពិភពប្រដាល់ បានធ្វើឱ្យមានការចាប់អារម្មណ៍យ៉ាងខ្លាំង ដោយសារតែលោកគឺជាកីឡាករល្បីហើយបែរជាមានក្មួយស្រីស្រស់ស្អាត និងមានជំនាញផ្នែកប្រដាល់ច្បាស់លាស់ ។ កែវ រំចង់ បានបង្ហាញមោទនភាពយ៉ាងខ្លាំងដែលលោកមានអ្នកស្នងតំណែងនៅក្នុងពិភពប្រដាល់ បើទោះជាមិនទាន់ដឹងថាតើក្មួយស្រីលោកនឹងបន្តចាប់អាជីពនេះបានដល់ពេលណា ។ នាងត្រូវឡើងប្រកួតក្នុងពិភពប្រដាល់នៅស្រុកខ្មែរក្នុងពេលបង្ហាញខ្លួន ប៉ុន្តែដោយសារតែមានការបន្ទាន់ត្រូវចេញទៅថៃ ក៏មិនទទួលប្រកួតវិញ ។ តាមរយៈវីដេអូការប្រកួតនៅលើហ្វេស
ប៊ុកឯកជនរបស់នាង គឺនាងជាកីឡាការិនីដែលមានសមត្ថភាព និងមានប្រវត្តិប្រកួតច្រើនគួរសម ។
លោក Mattsophi Stephenson ជាជនជាតិអាមេរិក និងជាឪពុកនាង Samontha ធ្លាប់បានបញ្ជាក់ប្រាប់បណ្ដាញសារព័ត៌មានក្នុងស្រុកឲ្យដឹងថា កូនស្រីរបស់លោកស្រឡាញ់ការប្រដាល់ខ្លាំងណាស់ ហើយលោកមិនគិតថាកូនស្រីមិនគួរនឹងចាប់អាជីពប្រដាល់នោះដែរ ទើបលោកជំរុញចាប់តាំងពីដឹងថានាងមាននិស្ស័យ មានចំណូលចិត្ត និងចង់ឱ្យនាងយកគំរូតាមប្អូនថ្លៃ កែវ រំចង់ ផង ។ ក្នុងនោះសូម្បីតែភរិយារបស់លោកដែលជាម្ដាយរបស់នាងដែលភាគច្រើនគឺមិនចង់ឱ្យកូនស្រីប្រឡូកការប្រដាល់នោះ ក៏បានជំរុញដែរទើបធ្វើឱ្យកូនស្រីលោក Samontha បានឡើងប្រកួតជាមួយកីឡាករបរទេសខ្លាំងៗ តំណាងឱ្យកម្ពុជានាពេលកន្លងមក ។
កីឡាការិនីរូបនេះនិងឪពុករបស់នាងបានមកដល់កម្ពុជាតាំងពីថ្ងៃទី៦ ខែមករា ម្ល៉េះ និងបានហ្វឹកហាត់មួយរយៈពេលកន្លងទៅនេះដែរជាមួយ កែវ រំចង់ នៅក្លិបប្រដាល់ក្រសួងការពារជាតិ នៅក្លិប Cambodia Top Team និងនៅឯបាត់ដំបង តែនាងគ្រោងចេញទៅអាមេរិកវិញក្នុងពេលឆាប់ៗ បន្ទាប់ពីនាងបញ្ចប់បេសកកម្មនៅលើទឹកដីប្រទេសថៃ ។
កែវ រំចង់ បានអះអាងថា ដោយមានក្មួយស្រីជាអ្នកប្រដាល់ដែលយកគំរូតាមលោក ធ្វើឱ្យលោកកាន់តែមានកម្លាំងចិត្តលើសង្វៀន តែលោកទទួលប្រកួតតែក្នុងព្រឹត្តការណ៍ធំៗដែលមានតម្លៃខ្លួនខ្ពស់ប៉ុណ្ណោះ៕
ចែករំលែកព័តមាននេះ