រាជធានីភ្នំពេញ ៖មន្ត្រីក្រសួងប្រៃសណីយ៍ និងទូរគមនាគមន៍បានឲ្យដឹងថាកិច្ចសម្របសម្រួលបច្ចេកទេស ស្ដីពី គម្រោងបាញ់បង្ហោះផ្កាយរណប(តេជោ១) ដែលបានចុះកិច្ចព្រមព្រៀងក្នុងកិច្ចប្រជុំកំពូល«មេគង្គ-ឡានឆាង» កាលពីពេលថ្មីៗនេះ ក្រសួងគ្រោងនឹងរៀបចំកិច្ចប្រជុំមួយជាមួយភាគីពាក់ព័ន្ធ ដែលតាមផែនការ នឹងគ្រោងធ្វើនៅខែកុម្ភៈ ខាងមុខនេះ ។
ថ្លែងតាមទូរស័ព្ទនារសៀលថ្ងៃទី១៧ មករា មន្ត្រីអ្នកនាំពាក្យក្រសួងប្រៃសណីយ៍ និងទូរគមនាគមន៍ បានឲ្យដឹងថា ក្រសួងនឹងរៀបចំកិច្ចប្រជុំមួយដើម្បីសម្របសម្រួលជាមួយក្រុមហ៊ុនពាក់ព័ន្ធទៅលើផ្នែកបច្ចេកទេសនៅខែកុម្ភៈ ដើម្បីកំណត់ផែនការបន្ទាប់ និងសារប្រយោជន៍ដែលទទួលបានពីគម្រោងមួយនេះ ។ ទោះបីយ៉ាងណា លោកមិនបានបញ្ជាក់ពីពេលវេលាច្បាស់លាស់នៅឡើយទេ ។
លោកបណ្ឌិត ខូវ មករា មន្ត្រីរូបនេះបានបន្ដថា ៖« គម្រោងបាញ់បង្ហោះផ្កាយរណប «តេជោ១» មិនទាន់កំណាត់ថាអាចបង្ហោះបាននៅឆ្នាំណាឱ្យប្រាកដបានទេ ដោយត្រូវឆ្លងកាត់កិច្ចសម្របសម្រួលជាមុនសិន ដែលគ្រោងធ្វើឡើងនៅខែកុម្ភៈ ព្រោះវាមានរឿងត្រូវពិភាក្សាគ្នាច្រើនដើម្បីកំណត់ពីតម្រូវការបច្ចេកទេស ដែលយ៉ាងហោចណាស់ ត្រូវការពេលវេលារៀបចំពី២ទៅ៣ឆ្នាំ » ។
គម្រោងបាញ់បង្ហោះផ្កាយរណបនេះ ជាសមិទ្ធផលប្រវត្តិសាស្ត្រមួយទៀត បន្ទាប់ពីប្រមុខរាជរដ្ឋាភិបាលបានថ្លែងកាលពីចុងឆ្នាំ២០១៦ ក្នុងឱកាសសម្ពោធអគារទីស្ដីការក្រសួងប្រៃសណីយ៍ និងទូរគមនាគមន៍ ដែលមានទីតាំងនៅជាប់សាលារាជធានីភ្នំពេញ ។
ប្រសិនបើគម្រោងនេះ បានទទួលជោគជ័យនោះ កម្ពុជានឹងមានផ្កាយរណបប្រើប្រាស់ផ្ទាល់ខ្លួនសម្រាប់បម្រើឲ្យផលប្រយោជន៍ប្រទេសជាតិ សន្ដិសុខ និងសេដ្ឋកិច្ចក្នុងសង្គម ។ ជាមួយគ្នានេះ នៅទូទាំងប្រទេសនឹងគ្របដណ្ដប់ដោយសេវាអ៊ីនធើរណេត ខណៈបច្ចុប្បន្ននេះ ការប្រើប្រាស់ពុំទាន់មានវិសាលភាពទូលំទូលាយនៅឡើយ ពិសេសនៅតំបន់ជនបទ ។
លោកបណ្ឌិត ខូវ មករា ថ្លែងថា គម្រោងនេះមានសារសំខាន់ណាស់សម្រាប់កម្ពុជា ទាំងផ្នែកសេដ្ឋកិច្ច និងសន្តិសុខជាតិ ។ លោកថា ៖« ក្នុងផ្នែកសេដ្ឋកិច្ច យើងអាចប្រើប្រាស់ផ្កាយរណបក្នុងការផ្សព្វផ្សាយសោតទស្សន៍, យើងអាចប្រើប្រាស់ផ្កាយរណបដើម្បីតភ្ជាប់នឹងតំបន់ដាច់ស្រយាលមួយចំនួន ដែលត្រូវការតភ្ជាប់បណ្តាញទូរគមនាគមន៍ ។ លើសពីនេះ ប្រព័ន្ធផ្កាយរណបនឹងដើរតួនាទីជំនួសនៅពេលបណ្តាញទូរគមនាគមន៍នៅលើដីត្រូវបានកាត់ផ្តាច់ដោយសារគ្រោះធម្មជាតិ » ។
គួររំឭកថា ក្នុងកិច្ចព្រមព្រៀងក្របខ័ណ្ឌ ស្តីពីគម្រោងបាញ់បង្ហោះផ្កាយរណបដំបូងគេបំផុតរបស់កម្ពុជា ត្រូវបានចុះហត្ថលេខាកាលពីព្រឹកថ្ងៃទី១១ ខែមករា ឆ្នាំ២០១៨នេះ នៅវិមានសន្តិភាព ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក លី ខឺឈាង នាយករដ្ឋមន្ត្រីចិន ។
គម្រោងនេះ ក្រោមការវិនិយោគរួមគ្នារវាង ក្រុមហ៊ុនរ៉ូយ៉ាល់គ្រុប និងសាជីវកម្មឧស្សាហកម្មមហាកំពែងចិន ដែលមានទឹកប្រាក់វិនិយោគប្រមាណ១៥០លានដុល្លារ ។
ថ្លែងប្រាប់អ្នកយកព័ត៌មាន លោក ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានឲ្យដឹងថា នេះគឺជាសមិទ្ធផលថ្មីមួយទៀតរបស់កម្ពុជា ក្នុងការធ្វើទំនើបកម្មវិស័យគមនាគមន៍ និងមានសារសំខាន់យ៉ាងខ្លាំងចំពោះវិស័យនេះ ។ បន្ទាប់ពីចុះហត្ថលេខានេះ ក្រុមការងារមួយក្រុមដែលបង្កើតឡើងរួចរាល់ហើយ នឹងធ្វើការសិក្សាវាយតម្លៃអំពីកិច្ចដំណើរការនៃការបាញ់បង្ហោះផ្កាយរណបទៅអវកាស ។
លោករដ្ឋមន្ត្រីថ្លែងថា ៖« ក្រុមការងារនេះ នឹងត្រូវប្រើប្រាស់ពេលវេលា២ឆ្នាំកន្លះដើម្បីកំណត់ទីតាំង និងរៀបចំឧបករណ៍ឈានដល់ការបាញ់បង្ហោះផ្កាយរណបទៅលើអវកាស ហើយផ្កាយរណបនោះមានអាយុកាលប្រើប្រាស់រយៈពេល១៥ឆ្នាំ » ៕
ចែករំលែកព័តមាននេះ