ខេត្តតាកែវ ៖ ការដឹកជញ្ជូនឈើខុសច្បាប់ ដែលឈ្មួញនាំទៅលក់នៅស្រុកយួនរហូតមកដល់បច្ចុប្បន្ននេះ នៅតែបន្តរហូតដោយមានការត្រូវរូវគ្នាជាខ្សែចង្វាក់រវាងអាជ្ញាធរនឹងសមត្ថកិច្ចធំៗនៅក្នុងខេត្ត ទើបធ្វើឲ្យជំនួញឈើខុសច្បាប់មួយនៅតែបន្តដឹកជញ្ជូនយកទៅលក់នៅស្រុកយួនបានយ៉ាងរលូន និងមិនបានរំខានដល់ថ្នាក់ដឹកនាំធំៗក្នុងខេត្តឡើយ ហើយនៅពេលដែលសមត្ថកិច្ចចាប់វិញជាប្រភេទឈើដែលអ្នករកស៊ីនោះអត់មានខ្សែរយៈតែប៉ុណ្ណោះ ។
ជាក់ស្តែងកម្លាំងកងរាជអាវុធហត្ថខេត្តតាកែវ បានធ្វើការឆ្មក់ព័ទ្ធចាប់បានឈើគ្រញូងបានប្រមាណជាង២ម៉ែត្រគូប នៅក្នុងផ្ទះខ្ទមមួយកន្លែង ដែលមិនមនុស្សរស់នៅស្ថិតនៅក្នុងភូមិបន្ទាយធ្លាយ ឃុំព្រែខ្លា ស្រុកកោះអណ្តែត ខេត្តតាកែវ វេលាម៉ោង០៩និង១០នាទីយប់ ថ្ងៃទី១៧ ខែមករា ។
មន្ត្រីរកងរាជអាវុធហត្ថខេត្តម្នាក់ បានឲ្យដឹងថា ក្រោមការស្រាវជ្រាវរបស់កម្លាំងជំនាញយើងទៅឃើញថា ឈើគ្រញូងខុសច្បាប់នេះជារបស់ឈ្មោះ ហ៊ឹម ផែន មានតួនាទីជានាយរងផ្នៃកព្រហ្មទណ្ឌនគរបាលស្រុកកោះអណ្តែត ហើយក៏ជាមនុស្សជំនិតរបស់លោកវរសេនីទោ ជា សុផាត អធិការនគរបាលស្រុកកោះអណ្តែត ហើយនាយរងផ្នែករូបនេះ បានរកស៊ីឈើខុសច្បាប់យូហើយដែរ ។
មន្ត្រីរកងរាជអាវុតហត្ថដដែលបានបន្តទៀតថា ក្រោយពេលចាប់ហើយនោះ ឈើត្រូវបានជួលរថយន្តដឹកយកមករាប់នៅទីបញ្ជាការដ្ឋានកងរាជអាវុធហត្ថខេត្ត ដោយមានកម្លាំងរបស់មេព្រែចូលរួមផងដែរ នាឱកាសនោះលោក ជីវ ចាន់តារា ព្រះរាជអាជ្ញាអមសាលាដំបូងខេត្តជាអ្នកសម្រប់សម្រួលក្នុងការរាប់ចំនួនឈើក្រញូងនេះ ដោយជាលទ្ធផលឃើញមានចំនួន៨០បាវ ស្មើនឹង២,១០០គីឡូក្រាម ហើយលោកព្រះរាជអាជ្ញាអមសាលាដំបូងខេត្ត បានប្រគល់ឈើខុសច្បាប់នេះ ទៅឲ្យមេព្រែជាអ្នករក្សាទុក ។
លោកវរសេនីទោ ជា សុផាត អធិការនគរបាលស្រុកោះអណ្តែត បានប្រាប់កោះសន្តិភាពយើងតាមទូរស័ព្ទថា នាយរងផ្នៃកព្រហ្មទណ្ឌមិនជាមនុស្សជំនិតរបស់លោកទេ គ្រាន់តែជាកូនចៅរបស់លោក ហើយករណីឈើនេះ លោកមិនមានអ្វីពាក់ពាន់ដែរ និយាយទៅយប់មិញ (យប់ថ្ងៃទី១៦) ហ៊ឹម ផែន នៅប្រចាំការក្នុងអធិការដ្ឋានជាមួយលោក១យប់ លុះព្រឹកឡើងទើបបែកគ្នា ៕
ចែករំលែកព័តមាននេះ