ខេត្តប៉ៃលិន ៖ អ្នកទោសគ្រឿងញៀនម្នាក់ ខណៈមានជំងឺប្រចាំកាយ អនុរក្សពន្ធនាគារបានបញ្ជូន ទៅសម្រាកនៅមន្ទីរពេទ្យបង្អែកខេត្ត លុះស្ងាត់មនុស្សក៏រត់គេចខ្លួន។ តែបន្ទាប់ពីផ្អើលឆោឡោ សមត្ថកិច្ចនគរបាលក៏តាមរកជនសង្ស័យ ស្រាប់តែឃើញដើរនៅខាងក្រោយផ្សារយ៉ាងរំភើយទៅវិញ ហើយក៏ចាប់បញ្ជូនយកទៅពន្ធនាគារនៅព្រឹកថ្ងៃដដែលវិញ។ ហេតុការណ៍រត់គេចខ្លួននេះ បានកើតឡើងនៅវេលាម៉ោង៨ និង៥០នាទីព្រឹក ថ្ងៃទី១៧ ខែមករា ឆ្នាំ២០១៨ ស្ថិតនៅក្នុងមន្ទីរពេទ្យបង្អែកខេត្តប៉ៃលិន ក្នុងភូមិអូរតាប្រាង សង្កាត់ប៉ៃលិន ក្រុងប៉ៃលិន ដោយតាមរកឃើញឃាត់ខ្លួនកាលពីវេលាម៉ោង១១ និង៤០នាទីព្រឹកថ្ងៃដដែល ត្រង់ចំណុច ខាងក្រោយផ្សារសាមគ្គីហៅប៉ាហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន។
ប្រភពព័ត៌មានបានឱ្យដឹងថា ជនជាប់ចោទខាងលើមាន ឈ្មោះ នៅ តាប់ ភេទប្រុស អាយុ៥២ឆ្នាំ ជាប់ចោទពីបទជួញដូរ និងចែកចាយគ្រឿងញៀនខុសច្បាប់ កាលពីថ្ងៃទី០២ ខែមករា ឆ្នាំ២០១៧ នៅចំណុចមុខផ្លូវចូលទៅភូមិពេជ្រគីរី ស្ថិតនៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ប្រភពព័ត៌មានបានបន្តទៀតថា ក្រោយពីទទួលដំណឹងថាជនសង្ស័យដែលកំពុងដេកសម្រា កនៅក្នុងមន្ទីរពេទ្យបាត់ខ្លួន ភ្លាមៗនោះ លោកវរសេនីយ៍ត្រី យ៉ែម សារិទ្ធ អធិការ នៃអធិការដ្ឋាននគរបាលក្រុងប៉ៃលិន បានបញ្ជាកម្លាំងផ្ទាល់ ឱ្យសហការជាមួយមន្ត្រីអនុរក្សពន្ធនាគារខេត្ត ដើម្បីស្វែងរកជនសង្ស័យដែលបានរត់គេចខ្លួនបន្ទាប់ពីមានជំងឺសម្រាកព្យាបាលនៅក្នុងមន្ទីរពេទ្យបង្អែកខេត្ត។
ប្រភពដដែលបន្តថា ក្រោយមកសមត្ថកិច្ច ក៏បានឃាត់ខ្លួនបាននៅចំណុចក្រោយផ្សារសាមគ្គី ហៅប៉ាហ៊ី កាលពីវេលាម៉ោង១១ និង៤០នាទីថ្ងៃដដែល ហើយក៏ប្រញាប់ដឹកតាមម៉ូតូយកទៅអធិការក្រុង ដើម្បីធ្វើកំណត់ហេតុ ប្រគល់ទទួល និងបញ្ជូនជនជាប់ចោទរូបនោះទៅពន្ធនាគារខេត្តប៉ៃលិនវិញ។ សូមបញ្ជាក់ថា នេះជាលើកដំបូងហើយដែលលេចធ្លាយរឿងអ្នកទោសកំពុងសម្រាកព្យាបា លនៅក្នុងមន្ទីរពេទ្យលួចរត់គេចខ្លួន តែត្រូវនគរបាលក្របួចបានវិញទាន់ពេលវេលា៕
ចែករំលែកព័តមាននេះ