អតីតប៉ូលិសម្នាក់ត្រូវសម្លា.ប់
ប្រទេសវេណេស៊ុយអេឡា ៖ អាជ្ញាធរមូលដ្ឋានអះអាងកាលពីថ្ងៃទី១៦ មករា ថា អតីតប៉ូលិសឧទ្ទាមវេណេស៊ុយអេឡា លោក OSCAR PEREZ ដែលធ្លាប់វាយប្រហារតាមឧទ្ធម្ភាគចក្រលើបណ្តាអគាររដ្ឋ…
ប្រទេសវេណេស៊ុយអេឡា ៖ អាជ្ញាធរមូលដ្ឋានអះអាងកាលពីថ្ងៃទី១៦ មករា ថា អតីតប៉ូលិសឧទ្ទាមវេណេស៊ុយអេឡា លោក OSCAR PEREZ ដែលធ្លាប់វាយប្រហារតាមឧទ្ធម្ភាគចក្រលើបណ្តាអគាររដ្ឋ ក្នុងនោះរួមមានតុលាការកំពូលកាលពីខែមិថុនា កន្លងទៅ ត្រូវបានសម្លាប់ហើយក្នុងឱកាសនៃប្រតិបត្តិការធំមួយតាមចាប់ខ្លួនគេ ។
រដ្ឋមន្ត្រីមហាផ្ទៃវេណេស៊ុយអេឡាឧត្តមសេនីយ៍ NESTOR REVEROL ប្រកាសក្នុងសង្កថាមួយតាមទូរទស្សន៍ថា ជាង២៤ម៉ោងក្រោយអន្តរាគមន៍របស់ប៉ូលិស OSCAR PEREZ អាយុ៣៦ឆ្នាំ ស្ថិតក្នុងចំណោមភេរវករ៧នាក់ ដែលត្រូវសម្លាប់ ក្នុងនោះមាននារីម្នាក់ផងនាឱកាសនៃអន្តរាគមន៍ ។ រដ្ឋមន្ត្រីរូបនេះដែលបង្ហាញបណ្តារូបថតពួកជនត្រូវសម្លាប់បន្តថា សមាជិក៦នាក់ទៀតរបស់ក្រុមនេះដែលមានបុរស៤នាក់ និងនារី២នាក់បានត្រូវចាប់ខ្លួន ហើយកំពុងនាំមកកាន់តុលាការ ។
OSCAR PEREZ ក្រោយការវាយប្រហាររបស់គេក្លាយជាមនុស្សដែលគេតាមរកចាប់ខ្លួនបំផុតនៅវេណេស៊ុយអេឡា ។ កាលពីថ្ងៃទី២៧ មិថុនា ២០១៧ រូបគេស្ថិតក្នុងឧទ្ធម្ភាគចក្រ១គ្រឿងប្លន់ពីប៉ូលិសបានហោះហើរពីលើក្រុងការ៉ាកាស់ ។ ជាមួយជនប្រដាប់អាវុធឯទៀតៗ ពួកគេបានទម្លាក់គ្រាប់បែកដៃ៤គ្រាប់លើតុលាការកំពូល ហើយបាញ់ប្រហារមកលើក្រសួងមហាផ្ទៃ តែពុំបណ្តាលឱ្យមានជនរងគ្រោះឡើយ ។
ការវាយប្រហារគួរឱ្យភ្ញាក់ផ្អើលនេះកើតមានពេលផ្ទុះបាតុកម្មនានាទាមទារឱ្យប្រធានាធិបតីសង្គមនិយមលាលែងចេញពីតំណែង ដោយក្នុងរលកបាតុកម្មហិង្សានេះបណ្តាលឱ្យមនុស្សស្លាប់១២៥នាក់ រវាងពីខែមេសាមកខែកក្កដា ។ OSCAR PEREZ ផ្គើនរដ្ឋអំណាចយ៉ាងខ្លាំងដោយគេតែងបង្ហាញមុខក្នុងក្បួនបាតុកម្ម ឬតាមបណ្តាញសង្គម ហើយគេរស់លាក់ខ្លួន ។
៧ខែក្រោយមក កងកុំម៉ង់ដូយោធា និងកងកម្លាំងពិសេសរបស់ប៉ូលិសរកឃើញកន្លែងលាក់ខ្លួនរបស់គេ និងបណ្តាមនុស្សរបស់គេ រួចឡោមព័ទ្ធនៅភាគពាយ័ព្យក្រុងការ៉ាកាស៉។ រួចនាថ្ងៃទី១៥ មករា ក្នុងប្រតិបត្តិការមួយហៅ GEDEON ប៉ូលិស២នាក់បានត្រូវស្លាប់ និង៨នាក់ទៀតរងរបួសដោយការតដៃមុនពេលស្វែងរកដំណោះស្រាយដោយសន្តិវិធី ៕
ចែករំលែកព័តមាននេះ