សហរដ្ឋអាមេរិក-កូរ៉េខាងជើង ៖ ពេលដែលកូរ៉េខាងជើងជំរុញឱ្យមានភាពធូរស្រាលជាមួយកូរ៉េខាងត្បូង កាលពីថ្ងៃទី១៦ មករា សហរដ្ឋអាមេរិកប៉ុនប៉ងរក្សាទុកការគាបសង្កត់ខ្លាំងប្រឆាំងមហិច្ឆតានុយក្លេអ៊ែររបស់ប្រទេសនេះ ក្នុងឱកាសនៃកិច្ចប្រជុំមួយជាមួយបណ្តាសម្ព័ន្ធមិត្តនៅទីក្រុង VANCOUVER កាណាដា ដែលកិច្ចប្រជុំនេះរងការរិះគន់យ៉ាងខ្លាំងពីសំណាក់ប្រទេសចិន ។
រដ្ឋមន្ត្រីការបរទេសអាមេរិក លោក REX TILLERSON ពេលបើកកិច្ចប្រជុំនេះជាមួយបណ្តាសមភាគីនៃប្រទេសចំនួន២០ជាសម្ព័ន្ធមិត្ត ខណៈលោកជាសហដឹកនាំកិច្ចប្រជុំជាមួយរដ្ឋមន្ត្រីការបរទេសកាណាដា លោកស្រី CHRYSTIA FREELAND ថ្លែងថា គេត្រូវមានការគាបសង្កត់ថ្មីៗលើរបបកូរ៉េខាងជើងពេលមានការរំលោភបំពានថ្មីមួយលើកៗ ។ លោកក៏ស្នើផងដែរដល់រុស្ស៊ី និងចិនដែលអវត្តមានក្នុងកិច្ចប្រជុំឱ្យអនុវត្តទាំងស្រុងការដាក់ទណ្ឌកម្មដែលអនុម័តដោយ អ.ស.ប ហើយលោកចង់ឱ្យមានការកែលម្អប្រតិបត្តិការហាមឃាត់តាមសមុទ្រ ដើម្បីរារាំងការផ្គត់ផ្គង់ប្រេងដល់ក្រុងព្យុងយ៉ាងដោយពង្វាងបណ្តាវិធានការអន្តរជាតិ ។ រឿងនេះបន្ទាប់មកជាកម្មវត្ថុនៃការពិភាក្សាគ្នាជាសម្ងាត់ ។
ប្រមុខការទូតអាមេរិកបន្តថា យើងត្រូវបង្កើនការគាបសង្កត់លើរបបនេះរហូតទាល់តែកូរ៉េខាងជើងព្រមវិលមករកតុចរចាគួរឱ្យជឿជាក់ ។
ចំណែកលោកស្រី CHRYSTIA FREELAND បន្ថែមថា យើងនឹងពុំយល់ព្រមឱ្យកូរ៉េខាងជើងជាអ្នកគំរាមកំហែងនុយក្លេអ៊ែរប្រឆាំងពិភពលោកឡើយ ។ ប្រមុខការទូតកាណាដាទទួលស្គាល់ថា ភាពម៉ឺងម៉ាត់នេះប្រកាន់យកក្រោយភាពធូរស្រាលមួយចំនួនលើសំណុំរឿងកូរ៉េខាងជើងដោយសារការសម្រេចរបស់ប្រទេសនេះចូលរួមក្នុងការប្រកួតកីឡាអូឡាំពិករដូវរងានៅកូរ៉េខាងត្បូងពីថ្ងៃទី៩ ដល់២៥ កុម្ភៈ និងការចរចាគ្នាឡើងវិញ រវាងក្រុងសេអ៊ូល និងក្រុងព្យុងយ៉ាង ។ លោកស្រីថា នេះជាសញ្ញាគួរឱ្យលើកទឹកចិត្តមួយ ។
ចំណែករដ្ឋមន្ត្រីការបរទេសកូរ៉េខាងត្បូង លោកស្រី KANG KYUNG WHA សម្តែងសុទិដ្ឋិនិយមថា «ឧបករណ៍ទាំង២» គឺទណ្ឌកម្មម៉ឺងម៉ាត់ និងការឈោងចាប់ដៃគ្នាត្រូវដើរទន្ទឹមគ្នា ។ លោកស្រីយល់ថា យុទ្ធសាស្ត្រនេះចាប់ផ្តើមទទួលបានផ្លែផ្កាដូចជាការយល់ព្រមចូលរួមរបស់កូរ៉េខាងជើងក្នុងការប្រកួតកីឡាអូឡាំពិកនៅ PYEONGCHANG។
ដោយគាំទ្រការអំពាវនាវនានារបស់អាេមរិក រដ្ឋមន្ត្រីការបរទេសជប៉ុន លោកតារ៉ូ កូណូ បានព្រមានប្រឆាំងរាល់ការប៉ុនប៉ងបន្ធូរដៃ ។ លោកថាមនុស្សមួយចំនួនអះអាងថា គេត្រូវផ្តល់ការលើកទឹកចិត្តដល់កូរ៉េខាងជើង ព្រោះតែការចូលរួមរបស់គេក្នុងការចរចាអន្តរកូរ៉េតាមរយៈការលុបចោលទណ្ឌកម្ម ហើយផ្តល់ជំនួយមួយចំនួន ។ លោកថា នេះជាការយល់ឃើញឆ្កួតបំផុត ។ កូរ៉េខាងជើងចង់បានការចំណេញពេល ដើម្បីបន្តកម្មវិធីនុយក្លេអ៊ែរ និងបាលីស្ទិករបស់ខ្លួន ។
មុនពេលចាប់ផ្តើមកិច្ចប្រជុំនៅក្រុង VANCOUVER ចិន និងរុស្ស៊ីផ្ទុះកំហឹង ព្រោះប្រទេស
ទាំង២ជាសមាជិកអចិន្ត្រៃយ៍ក្រុមប្រឹក្សាសន្តិសុខ អ.ស.ប ព្រមទាំងជាតួអង្គគន្លឹះនៃការចរចាជាមួយក្រុងព្យុងយ៉ាងបែរជាមិនត្រូវគេអញ្ជើញចូលរួមក្នុងកិច្ចប្រជុំនេះ ។
អ្នកនាំពាក្យក្រសួងការបរទេសចិន លោក LU KANG អះអាងកាលពីថ្ងៃទី១៦ មករា ថា កិច្ចប្រជុំនេះគឺជាកិច្ចប្រជុំទាំងមិនត្រឹមត្រូវទាំងពុំមានលក្ខណៈតំណាង ។ ចំណែកប្រមុខការទូតរុស្ស៊ី លោកស័រហ្គេយឡាវរ៉ូវ កាលពីថ្ងៃទី១៥ មករា រិះគន់ថា ពួកអាមេរិក និងសម្ព័ន្ធមិត្តចង់បញ្ចេញទស្សនៈពួកគេផ្អែកតែទៅលើការចាប់បង្ខំ និងឱសានវាទ ហើយពុំទទួលស្គាល់ការពិតនៃពិភពលោកពហុប៉ូលមួយ ។
ទាក់ទងគ្នាតាមទូរស័ព្ទកាលពីថ្ងៃទី១៦ មករា ជាមួយប្រធានាធិបតីអាមេរិក លោកដូណាល់ ត្រាំ ប្រធានាធិបតីចិន លោកស៊ី ជីនពីង រំលឹកថា សភាពការណ៍នៅឧបទ្វីបកូរ៉េបច្ចុប្បន្នកំពុងមានការវិវត្តន៍ជាវិជ្ជមាននានា ៕
ចែករំលែកព័តមាននេះ