ថ្លើមគឺជាផ្នែកមួយដ៏សំខាន់សម្រាប់ខ្លួនប្រាណមនុស្សយើង ។ ប្រសិនបើថ្លើមមានកើតជំងឺធ្ងន់ដែលមិនអាចព្យាបាលបានដូចជាជំងឺថ្លើមប្រភេទB នោះវាពិតជាធ្វើឱ្យលោកអ្នកមានក្តីកង្វល់យ៉ាងខ្លាំងព្រោះថាជំងឺនេះអាចឆក់យកអាយុជីវិតរបស់លោកអ្នកបានគ្រប់ពេលវេលា បើទោះបីជាជំងឺនេះមានថ្នាំពន្យារអាយុជីវិតក៏ពិតមែន ប៉ុន្តែវានៅតែជាជំងឺដែលដើរតួសំខាន់ដដែលចំពោះពាក្យថា កាចសាហាវ ។
ជួបជាមួយលោកវេជ្ជបណ្ឌិតអ៊ុង ចក្រាវុធ ប្រធានផ្នែកជំងឺថ្លើម ក្រពះ ពោះវៀន និងជំងឺឫសដូងបាត នៃមន្ទីរពេទ្យកាល់ម៉ែត បានមានប្រសាសន៍ប្រាប់កោះសន្តិភាពឱ្យដឹងថា ជំងឺថ្លើមមានប្រាំប្រភេទគឺA.,B.,C .,D និងE ។ ចំណែកឯជំងឺថ្លើមប្រភេទB គឺជាជំងឺដែលបង្កឡើងដោយវីរុសប្រទេសB ។
ជំងឺថ្លើមប្រភេទB គឺជាជំងឺឆ្លងយ៉ាងសកម្មបំផុតនៅក្នុងពិភពលោកដែលកំពុងតែធ្វើឱ្យមានការព្រួយបារម្ភយ៉ាងខ្លាំង ក្នុងបញ្ហាសុខភាពសាធារណៈ ជាពិសេសនៅក្នុងតំបន់អាស៊ីអាគ្នេយ៍ដែលរួមមានប្រទេសកម្ពុជាផងដែរ ។ជំងឺថ្លើមប្រភេទ B មានបង្កប់នៅក្នុងឈាម ក្នុងទឹកមាត់ ទឹកដោះម្តាយ និងទឹករំអិលផ្សេងៗនៅក្នុងខ្លួនរបស់មនុស្ស ហើយក៏អាចឆ្លងដោយងាយផងដែរ ស្រដៀងគ្នានឹងការឆ្លងមេរោគអេដស៍ដែរ ដោយការឆ្លងរបស់វាមានដូចជា ៖
-ឆ្លងតាមរយៈឈាម ដូចជាការរួមភេទ ពេលសម្រាលកូន ការប្រើប្រាស់សម្ភាររួមគ្នា ដូចជាច្រាសដុសធ្មេញ កន្ត្រៃកាត់ក្រចក ម្ជុលចាក់ថ្នាំរួមគ្នាជាដើម ។
-ឆ្លងតាមការរស់នៅក្នុងផ្ទះជាមួយគ្នា។ ជំងឺថ្លើមប្រភេទBក៏អាចឆ្លងតាមរយៈការរស់នៅក្រោមដំបូលផ្ទះជាមួយគ្នាផងដែរ ។ បើសិនជាសមាជិកណាម្នាក់ដែលរស់នៅក្នុងផ្ទះជាមួយគ្នា ហើយកើតមានជំងឺថ្លើមប្រភេទBនោះសមាជិកផ្សេងៗទៀតក៏អាចកើតមានជំងឺថ្លើមប្រភេទB ដូចគ្នាផងដែរ ដោយវាអាចឆ្លងតាមរយៈកត្តាមួយចំនួនដូចជាទឹកមាត់ ញើស ការប្រើប្រាស់របស់របររួមគ្នា ។ល។
លោកវេជ្ជបណ្ឌិតអ៊ុង ចក្រាវុធ បានមានប្រសាសន៍ឱ្យដឹងទៀតថា ជំងឺថ្លើមប្រភេទB ចាប់ផ្តើមកើតមានដំបូងនោះគឺមិនមានរោគសញ្ញាអ្វីឱ្យអ្នកជំងឺបានដឹងទេ តែអ្នកជំងឺអាចដឹងតាមរយៈការពិនិត្យឈាម ។ ក្នុងករណីខ្លះជំងឺនេះក៏អាចលេចចេញនូវរោគសញ្ញាមួយចំនួនឱ្យអ្នកជំងឺបានដឹងផងដែរ ដូចជាអ្នកជំងឺមានការក្តៅខ្លួន ផ្តាសាយ ភ្នែកឡើងលឿង ទឹកនោមលឿងជាដើម ។ តែ៩០%ចំពោះអ្នកដែលកើតមានជំងឺនេះមិនមានរោគសញ្ញាអ្វីទេ ដែលភាគច្រើនអ្នកជំងឺអាចដឹងថា រូបគេកើតមានជំងឺថ្លើមប្រភេទB នេះច្រើនតែហួសពេល ដែលរហូតអ្នកជំងឺកើតមានអាការធ្ងន់ ដែលអាចឈានទៅដល់ការកើតមានជំងឺក្រិនថ្លើម មហារីកថ្លើមទើបវាលេចចេញនូវរោគសញ្ញានេះឱ្យអ្នកជំងឺបានដឹង ។ ជំងឺថ្លើមប្រភេទB អាចឆ្លងគ្រប់វ័យ ហើយនៅទ្វីបអាស៊ីយើងនេះភាគច្រើនឆ្លងតាំងពីទារកទើបនឹងកើតមកម្ល៉េះ ជាពិសេសគឺប្រទេសកម្ពុជាយើងនេះគឺអាចឆ្លងតាមរយៈការសម្រាលកូន ដែលអាចកើតមានលើសពី៥០% ។
ជំងឺថ្លើមប្រភេទB អាចបណ្តាលឱ្យមានផលប៉ះពាល់យ៉ាងខ្លាំង ដែលកត្តាជាចម្បងនោះគឺអាចធ្វើឱ្យបាត់បង់ជីវិត ហើយមកដល់សព្វនេះ មិនទាន់មានថ្នាំព្យាបាលសម្លាប់មេរោគនេះឱ្យអស់នៅឡើយទេ ដូចជាជំងឺអេដស៍គ្រាន់តែអាចពន្យារអាយុជីវិតបានប៉ុណ្ណោះ ។ តែជាភ័ព្វសំណាងព្រោះជំងឺនេះ មានវ៉ាក់សំាងចាក់បង្ការកុំឱ្យកើតមានបាន១០០ភាគរយ ។
លោកវេជ្ជបណ្ឌិតអ៊ុង ចក្រាវុធ បានបន្ថែមទៀតថា ជំងឺថ្លើមប្រភេទB មិនមែនជាជំងឺតំណពូជទេ តែវាជាជំងឺឆ្លង ។ នៅក្នុងប្រទេសកម្ពុជាដែលកើតមានជំងឺថ្លើមប្រភេទB គឺអាចទៅដល់១០ភាគរយឯណោះ ហើយអត្រាដែលអ្នកស្លាប់ដោយសារជំងឺនេះមិនទាន់មានតួលេខច្បាស់លាស់នៅឡើយទេ ។
ដូចនេះដើម្បីកាត់បន្ថយអត្រាឆ្លងនៃជំងឺថ្លើមពីកំណើតក្រសួងសុខាភិបាលបានអនុវត្តកម្មវិធីចាក់ថ្នាំបង្ការសម្រាប់ទារកដោយឥតគិតថ្លៃ ។ ចំពោះអ្នកដែលមិនទាន់បានចាក់វ៉ាក់សាំង ការពារជំងឺថ្លើមប្រភេទBត្រូវតែទៅធ្វើតេស្តឈាម ស្វែងរកជំងឺថ្លើមប្រភេទB ដើម្បីរកវិធានការការពារទើបជាការប្រសើរ ។ ចំណែកឯអ្នកដែលកើតមានជំងឺថ្លើមប្រភេទBមិនត្រូវទទួលទានស្រាទេ ព្រោះការទទួលទានស្រា ចំពោះអ្នកដែលកើតមានជំងឺថ្លើមប្រភេទB ប្រៀបដូចជាយកសាំងទៅចាក់ពីលើភ្លើង ។
ចំពោះគ្រួសារដែលមានសមាជិកណាម្នាក់កើតមានជំងឺថ្លើមប្រភេទBនោះ សមាជិកមិនត្រូវរើសអើងរហូតដល់ទទួលទានអាហារផ្សេង ឬក៏ដាក់អ្នកដែលកើតមានជំងឺថ្លើមប្រភេទB ឱ្យរស់នៅដាច់ដោយឡែកពីគេនោះទេ។ ការធ្វើបែបនេះគឺអាចធ្វើឱ្យអ្នកជំងឺមានបញ្ហាផ្លូវចិត្ត ដូច្នេះសមាជិកគ្រួសារអ្នកដែលកើតមានជំងឺនេះត្រូវតែទៅចាក់វា៉ក់សាំងការពារកុំឱ្យកើតមានជំងឺនេះទើបជាការប្រសើរ ៕
ចែករំលែកព័តមាននេះ