ខេត្តព្រះវិហារ ៖ ក្រុមវេជ្ជបណ្ឌិតជំនាញវះកាត់អន្តរជាតិ ចម្រុះជាតិសាសន៍មកពីសហរដ្ឋអាមេរិក កូរ៉េ ឥណ្ឌា អេស៊ីប និងវៀតណាម បានជួយធ្វើការពិនិត្យព្យាបាល និងវះកាត់ទៅលើជំងឺមួយចំនួននៅក្នុងមន្ទីរពេទ្យបង្អែក១៦មករា ក្រុងព្រះវិហារ ដោយមិនគិតថ្លៃដល់ប្រជាពលរដ្ឋក្រីក្រនៅខេត្តព្រះវិហារ ដែលកំពុងជួបការខ្វះខាតទីទ័លក្រ ក្នុងគោលបំណងជួយលើកកម្ពស់សុខុមាលភាព និងកាត់បន្ថយការចំណាយរបស់ប្រជាជនក្រីក្រនៅខេត្តព្រះវិហារ ។
នៅថ្ងៃទី១៧ ខែមករា ឆ្នាំ២០១៨ នេះ លោកវេជ្ជបណ្ឌិត សុក វាសនា ប្រធានមន្ទីរពេទ្យ១៦មករា ក្រុងព្រះវិហារ បានមានប្រសាសន៍ប្រាប់អ្នកសារព័ត៌មានថា ជាលើកទីមួយហើយដែលក្រុមគ្រូពេទ្យឯកទេសវះកាត់អន្តរជាតិ ចម្រុះជាតិសាសន៍មានដូចជា អាមេរិក កូរ៉េ ឥណ្ឌា វៀតណាម និងអេស៊ីប បានចុះមកជួយពិនិត្យព្យាបាល វះកាត់ជំងឺដល់ប្រជាពលរដ្ឋខេត្តព្រះវិហារ ដែលមានបទពិសោធន៍ បច្ចេកទេសខ្ពស់ក្នុងការងារវះកាត់ប្រកបដោយជំនាញស្តង់ដារអន្តរជាតិ ។
លោកវេជ្ជបណ្ឌិតបន្តថា ការពិនិត្យព្យាបាល វះកាត់ព្យាបាលជំងឺនេះ មានជាច្រើនប្រភេទ ប៉ុន្តែអ្នកជំងៃដែលមកពិនិត្យព្យាលបាលវះកាត់ភាគច្រើនមានប្រភេទជំងឺក្លន ដុំខ្លាញ់ និងដុំពកលើសាច់ ។ ប្រធានមន្ទីរពេទ្យបញ្ជាក់ទៀតថា ចាប់តាំងពីថ្ងៃទី១៣ ដល់ថ្ងៃទី១៧ ខែមករា ឆ្នាំ២០១៨ នេះ អ្នកជំងឺដែលទទួលបានការវះកាត់បានទទួលជោគជ័យ ពុំមានបញ្ហាអ្វីឡើយ ហើយបច្ចុប្បន្ននេះ ក្រុមគ្រូពេទ្យបរទេសទាំងអស់នេះ កំពុងបន្តវះកាត់ព្យបាលជំងឺរហូតដល់ថ្ងៃទី១៩ ខែមករា ឆ្នាំ២០១៨ ខាងមុខ ។
ជាមួយគ្នានេះ លោកវេជ្ជបណ្ឌិត ថូម៉ាស ហ្វ្លូដ (Thomas Flood) ជាជនជាតិអាមេរិក ប្រធានក្រុមគ្រូពេទ្យ ឯកទេសវះកាត់អន្តរជាតិ លើកឡើងថា បន្ទាប់ពីរូបលោកបានមកដល់ទឹកដីខេត្តព្រះវិហារ ប្រទេសកម្ពុជា និងបានជួបជាមួយអ្នកជំងឺ ឃើញថា អ្នកជំងឺទាំងអស់នោះ មានជំងឺជាច្រើនត្រូវធ្វើការវះកាត់ ប៉ុន្តែពុំទាន់ទទួលបាននូវសេវាវះកាត់ ។ លោកថា ប្រភេទជំងឺដូចជា ជំងឺក្លន ដែលកើតមានទាំងនៅលើក្មេង និងមនុស្សចាស់ ដោយឡែកជំងឺផ្សេងទៀតមានដូចជាជំងឺជាប់ម្រាមដៃជាដើម ដែលតម្រូវឲ្យវះកាត់ តែដោយសារតែពលរដ្ឋខ្លះពុំមានលទ្ធភាពធ្វើការវះកាត់ ព្រោះតែពួកគាត់ទីទ័លក្រ ដូច្នេះហើយទើបលោកបានដឹកនាំក្រុមគ្រូពេទ្យឯកទេសដែលមានជំនាញជាច្រើនឆ្នាំ ដែលធ្វើការនៅតាមបណ្តាប្រទេសផ្សេងៗ ដើម្បីមកជួយធ្វើការវះកាត់ជូនប្រជាពលរដ្ឋនៅខេត្តព្រះវិហារ ក្រីក្រគ្មានលទ្ធភាពព្យាបាលជំងឺ និងវះកាត់ដោយមិនគិតថ្លៃ ។
លោក ប៉ិច ភារ៉ូ រស់នៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ បានលើកឡើងថា រូបលោកបាននាំកូនប្រុសរបស់លោកដែលមានជំងឺធ្លាក់សរសៃពង ដែលហៅម្យ៉ាងទៀតជា ជំងឺក្លន មកធ្វើការពិនិត្យ និងវះកាត់ព្យាបាលពីក្រុមគ្រូពេទ្យបរទេស ដែលមានជំនាញខ្ពស់ និងបានធ្វើការវះកាត់ជូនកូនរបស់លោកបានជោគជ័យ ។ លោកក៏បានសម្តែងនូវការសប្បាយរីករាយយ៉ាងខ្លាំង បន្ទាប់ពីទទួលបាននូវសេវាព្យាបាលនេះ រួមជាមួយនឹងការរួសរាយរាក់ទាក់ និងយកចិត្តទុកដាក់ខ្ពស់រវាងក្រុមគ្រូពេទ្យទាំងអស់ ជាមួយនឹងអ្នកជំងឺ ។
គួររំឭកថា កាលពីចុងឆ្នាំ២០១៧កន្លងទៅនេះ ខេត្តព្រះវិហារក៏មានក្រុមគ្រូពេទ្យអន្តរជាតិមកពីប្រទេសអាមេរិកមួយក្រុមបានចុះមកជួយធ្វើការវះកាត់ជំងឺជូនដល់ប្រជាពលរដ្ឋនៅខេត្តព្រះវិហារចំនួន២ថ្ងៃផងដែរ ។
សូមបញ្ជាក់ថា គិតមកដល់ថ្ងៃទី១៧ ខែមករា ឆ្នាំ២០១៨ នេះ អ្នកជំងឺដែលទទួលនូវសេវាព្យបាល វះកាត់ជំងឺ នៅមន្ទីរពេទ្យបង្អែក១៦មករា ក្រុងព្រះវិហារ ដោយក្រុមគ្រូពេទ្យអន្តរជាតិមកពីបណ្តាប្រទេសចម្រុះជាតិសាសន៍នេះ មានប្រមាណជា១២០នាក់ ដែលកំពុងទទួលការពិនិត្យ និងព្យាបាលជាបន្តបន្ទាប់ ៕
ចែករំលែកព័តមាននេះ