រាជធានីភ្នំពេញ ៖ កម្ពុជា-វៀតណាមបានបើកទំព័រសករាជថ្មីមួយទៀត ដោយចាប់ផ្ដើមសហការគ្នាបង្កើតផ្សារគំរូព្រំដែនមួយដែលមានឈ្មោះថា «ផ្សារដា» មានទីតាំងនៅឃុំដា ស្រុកមេមត់ ខេត្តត្បូងឃ្មុំ លើផ្ទៃដីទំហំជិត២ម៉ឺនម៉ែត្រការ៉េ ដោយគ្រោងនឹងចំណាយទឹកប្រាក់ប្រមាណជិត២លានដុល្លារ ដែលជាជំនួយរបស់រដ្ឋាភិបាលវៀតណាម ។
ការសាងសង់ផ្សារនេះ នឹងជួយបង្កើតការងារ និងចំណូលដល់ប្រជាពលរដ្ឋនៃប្រទេសទាំងពីរ ដើម្បីលើកកម្ពស់ជីវភាពរបស់ពលរដ្ឋនៅតាមព្រំដែន ក៏ដូចជាបង្កើនកិច្ចសហប្រតិបត្តិការពាណិជ្ជកម្មឲ្យកាន់តែកើនឡើងថែមទៀត ជាពិសេស នឹងជួយឱ្យទំហំពាណិជ្ជកម្មប្រទេសទាំងពីរកើនដល់៥ពាន់លានដុល្លារ តាមការគ្រោងទុកនាពេលអនាគត ។ នេះបើតាមរដ្ឋមន្ត្រីក្រសួងពាណិជ្ជកម្ម ។
ថ្លែងក្នុងពិធីបញ្ចុះបឋមសីលា និងបើកការដ្ឋានសាងសង់ កាលពីថ្ងៃទី១៦ មករា ម្សិលមិញ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ផ្សារគំរូព្រំដែននេះនឹងជួយបង្កើនទំហំពាណិជ្ជកម្មនៅតាមព្រំដែន និងលើកកម្ពស់ជីវភាពប្រជាពលរដ្ឋកម្ពុជា-វៀតណាម ហើយក៏ជាការចាប់ផ្តើមទំព័រសករាជថ្មីមួយទៀត
នៃការពង្រឹងកិច្ចសហការ និងសម្រួលពាណិជ្ជកម្មនៅតាមព្រំដែននៃប្រទេសទាំងពីរឱ្យកាន់តែមានភាពងាយស្រួល និងជិតប្រជាពលរដ្ឋ ជាពិសេសឈានទៅសម្រេចឲ្យបាននូវទំហំពាណិជ្ជកម្មចំនួន៥ពាន់លានដុល្លារ តាមផែនការមេដែលបានគ្រោងទុកក្នុងពេលអនាគត ។
«ខ្ញុំសង្ឃឹមថា ផ្សារនេះនឹងបម្រើអត្ថប្រយោជន៍ប្រជាពលរដ្ឋកម្ពុជា និងសម្រាប់ដាក់លក់ទំនិញរបស់ប្រជាជននៃប្រទេសទាំងពីរ ជាពិសេស រួមចំណែកដោះស្រាយបញ្ហាប្រឈម និងរបាំងពាណិជ្ជកម្មនានា ដែលតែងតែរាំងស្ទះដល់ការធ្វើចរាចរណ៍ទំនិញ និងផលិតផលនៅតាមព្រំដែនកម្ពុជា និងវៀតណាម » ។ នេះជាការគូសបញ្ជាក់ពីលោករដ្ឋមន្ត្រីក្រសួងពាណិជ្ជកម្មកម្ពុជា ។
ឯកអគ្គរដ្ឋទូតវៀតណាម លោក វ៉ូ ហ្គុងមិញ បានលើកឡើងថា ការសាងសង់ផ្សារដាថ្ងៃនេះ គឺដើម្បីអបអរខួបលើកទី៥០ នៃថ្ងៃបង្កើតទំនាក់ទំនងការទូតរវាងកម្ពុជា-វៀតណាម ហើយព្រឹត្តិការណ៍នេះ នឹងរួមចំណែកពង្រឹងមិត្តភាពប្រពៃណី និងកិច្ចសហប្រតិបត្តិការគ្រប់វិស័យនៃប្រទេសទាំងពីរថែមទៀត ។
លោកសង្ឃឹមថា ៖« ការសាងសង់ផ្សារនេះ នឹងនាំមកនូវក្តីសង្ឃឹមថ្មីសម្រាប់ប្រជាជនកម្ពុជា និងវៀតណាម ហើយនឹងក្លាយជាគំរូនៃការអភិវឌ្ឍ និងការពង្រីកកិច្ចសហការសេដ្ឋកិច្ច និងពាណិជ្ជកម្មនៅតាមព្រំដែននៃប្រទេសទាំងពីរនៅថ្ងៃអនាគត ប្រកបដោយជោគជ័យ » ។
បើតាមក្រសួងពាណិជ្ជកម្ម គម្រោងសាងសង់ផ្សារនេះ ត្រូវបានអនុម័តលើកដំបូងកាលពីឆ្នាំ២០១៣ ហើយត្រូវបានបន្តអនុវត្តឡើងវិញនៅឆ្នាំ២០១៦ នៅលើផ្ទៃដីទំហំ១៩.៦២៨ម៉ែត្រការ៉េ ស្ថិតក្នុងតំបន់សេដ្ឋកិច្ចពិសេសថារីត្បូងឃ្មុំ ជាមួយទុនវិនិយោគសរុបចំនួន៤៤ពាន់លានដុង ឬប្រមាណជិត២លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម ។
របាយការណ៍ក្រសួងបានឲ្យដឹងថា ទំហំពាណិជ្ជកម្មទ្វេភាគីរវាងកម្ពុជា-វៀតណាម មានការកើនឡើងគួរឲ្យកត់សម្គាល់ ។ គិតត្រឹមរយៈពេល១១ខែឆ្នាំ២០១៧ ប្រទេសទាំងពីរសម្រេចបានទំហំពាណិជ្ជកម្មចំនួន៣.៤៣៨លានដុល្លារ បើធៀបនឹងរយៈពេលដូចគ្នាឆ្នាំ២០១៦ មានចំនួនត្រឹមតែ២.៩២៦លានដុល្លារប៉ុណ្ណោះ ។
ក្នុងជំនួបជាមួយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោក ង្វៀន សួនហ្វុក នាយករដ្ឋមន្ត្រីនៃវៀតណាម បានជម្រាបជូនសម្ដេចថា ទំហំពាណិជ្ជកម្មរបស់ប្រទេសទាំងពីរកម្ពុជា-វៀតណាម បានកើនឡើង រហូតដល់៣.៨០០លានដុល្លារអាមេរិក បើធៀបទៅនឹងឆ្នាំកន្លងទៅ គឺកើនឡើង២៥% ក្នុងនោះវៀតណាមបាននាំទំនិញកសិផលរបស់កម្ពុជា ចូលទៅកាន់ប្រទេសវៀតណាម ក្នុងឆ្នាំ២០១៧ មានទំហំទឹកប្រាក់ប្រមាណ១ពាន់លានដុល្លារ ។
របាយការណ៍របស់ក្រសួងពាណិជ្ជកម្មកម្ពុជាបង្ហាញថា ក្នុងឆ្នាំ២០១៧ កម្ពុជាបាននាំចេញផលិតផលសរុបប្រមាណ៩ពាន់លានដុល្លារអាមេរិក ក្នុងនោះផលិតផលវាយនភ័ណ្ឌនាំមុខគេដែលមានទីផ្សារសហភាពអឺរ៉ុប និងសហរដ្ឋអាមេរិក ជាទីផ្សារធំ ។
យុទ្ធសាស្ត្ររបស់រាជរដ្ឋាភិបាលកម្ពុជាដែលមានក្រសួងពាណិជ្ជកម្មជាសេនារីយ៉ូ ក្នុងការជំរុញទំហំពាណិជ្ជកម្មជាមួយបណ្ដាប្រទេសជិតខាង ដោយនឹងបន្ដបង្កើតមជ្ឈមណ្ឌលដោះដូរទំនិញ ឬមជ្ឈមណ្ឌលពាណិជ្ជកម្មនៅតាមខេត្តជាប់ព្រំដែន ជាពិសេសប្រទេសវៀតណាម។ជាក់ស្ដែង ផ្សារគំនូរមួយនេះ នឹងក្លាយជាមជ្ឈមណ្ឌលពាណិជ្ជកម្មដ៏សំខាន់រវាងកម្ពុជា និងវៀតណាម។ កម្ពុជាក៏បាននិងកំពុងសិក្សាលទ្ធភាពបន្ថែមក្នុងការសាងសង់ផ្សារគំរូមួយទៀតនៅខេត្តកំពត ដើម្បីសម្រួលដល់ការដោះដូរទំនិញរវាងកម្ពុជា និងវៀតណាមផងដែរ ។
ក្រៅពីនេះ ក្រសួងពាណិជ្ជកម្មគ្រោងនឹងរៀបចំឲ្យមានការជួបប្រជុំរវាងពាណិជ្ជករកម្ពុជា និងពាណិជ្ជករនៃប្រទេសថៃ វៀតណាម ចិន កាណាដា ជប៉ុន កូរ៉េខាងត្បូង ឥណ្ឌា និងពាណិជ្ជករមកពីអឺរ៉ុប ដើម្បីជជែកបង្កើនការវិនិយោគរួមគ្នា ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ