ខេត្រក្រចេះ ៖ ក្រុមមន្ត្រីជំនាញបានអះអាងថា ចំពោះការរកឃើញមិនប្រក្រតីនៅតាមស្ថានីយ៍ប្រេងឥន្ធនៈទាំងចំនួន៦ សុទ្ធសឹងតែមានយីហោល្បីឈ្មោះក្នុងខេត្ត ដូចជាការផ្តល់ជូនមិនគ្រប់បរិមាណ និងគុណភាពនោះ គឺក្រុមមន្ត្រីបានអប់រំធ្វើកិច្ចសន្យាជាមួយអ្នកទទួលខុសត្រូវ ក៏ដូចជាម្ចាស់អាជីវកម្មទាំងអស់ខាងលើ ឲ្យធ្វើការកែតម្រូវឡើងវិញនូវចំនុចខ្វះខាតឲ្យបានត្រឹមត្រូវ សំដៅឆ្លើយតបការការពារផលប្រយោជន៍អ្នកប្រើប្រាស់ឲ្យមានភាពប្រសើរឡើង ។
ការរកឃើញពីភាពមិនប្រក្រតីនៅតាមស្ថានីយ៍ប្រេងឥន្ធនៈធំៗនេះ បានធ្វើឡើងនៅពេលដែលក្រុមមន្ត្រីជំនាញ នៃអគ្គនាយដ្ឋានកាំកុងត្រូលផ្នែកមន្ទីរពិសោធន៍ចល័ត-ប្រេងឥន្ធនៈ បានចុះត្រួតពិនិត្យតាមបណ្ដាស្ថានីយ៍ប្រេងសាំងក្នុងក្រុងក្រចេះ មួយថ្ងៃពេញនៅថ្ងៃទី១៥ ខែមករា ឆ្នាំ២០១៨ ក្រោមការដឹកនាំពីលោក វ៉ា ថន អភិបាលរងខេត្តក្រចេះ ។
ក្រុមមន្ត្រីជំនាញបានបញ្ជាក់ថា ជាមួយនឹងប្រតិបត្តិការណ៍ពេញមួយថ្ងៃនោះ ជំនាញបានរកឃើញកំហុសគុណភាណ និងកំហុសបរិមាណលីត្រនៅតាមស្ថានីយ៍ប្រេងចំនួន៦ទីតាំង ដែលមិនមានភាពស្មោះត្រង់ជាមួយអតិថិជនរបស់ខ្លួន នេះបើតាមលទ្ធផលពិនិត្យលើស្ថានីយ៍ប្រេងចំនួន៧កន្លែង ដោយបានធ្វើតេស្តជាមួយឧបករណ៍បច្ចេកទេសទំនើប សុក្រឹតយុត្តិធម៌បំផុត ។
មជ្ឈដ្ឋានទូទៅបានគាំទ្រទៅនឹងសកម្មភាពរបស់អាជ្ញាធរនេះ និងអំពាវនាវឲ្យក្រុមអាជ្ញារបង្កើនការចុះត្រួតពិនិត្យឲ្យជាប់ជាប្រចាំនៅតាមស្ថានីយ៍លក់ប្រេងនានាក្នុងខេត្តទាំងរបស់ឯកជន និងរបស់ក្រុមហ៊ុន ។
ទន្ទឹមនឹងការចុះត្រួតពិនិត្យវិភាគយ៉ាងល្អន់ដោយឧបករណ៍ទំនើបបែបបច្ចេកវិទ្យា ពីក្រុមមន្ត្រីជំនាញដែលការចុះអនុវត្ត ក៏មិនត្រូវបានប្រាប់ឲ្យម្ចាស់ស្ថានីយ៍គោលដៅទាំងអស់ ដឹងជាទុកមុននោះ ជាលទ្ឋផលបានបង្ហាញលទ្ធផលឲ្យដឹងថា បណ្តាស្ថានីយ៍ប្រេងឥន្ឋនៈទាំង៧ទីតាំង ដែលកំពុងតែបើកអាជីវកម្មលក់ដូរ ក្នុងនោះមាន៦ទីតាំងបាន ប្រព្រឹត្តខុសលើទាំង បរិមាណលីត្រ និងគុណភាព ។ បញ្ហាទាំងនោះ មន្ត្រីជំនាញបានធ្វើការកំណែទម្រង់ជាមួយនឹងម្ចាស់ស្ថានីយ៍ទាំងអស់នោះ សំដៅឆ្លើយតបការពារផលប្រយោជន៍អ្នកប្រើប្រាស់ និងការប្រកួតប្រជែងដោយភាពស្មោះត្រង់ ។
ក្នុងសកម្មភាពការចុះត្រួតពិនិត្យនេះដែរ លោកអភិបាលរងខេត្ត វ៉ា ថន បានជំរុញដល់ម្ចាស់ស្ថានីយ៍ប្រេងឥន្ធនៈ ដែលកំពុងតែធ្វើអាជីវកម្មទាំងអស់ មិនថាជារបស់កក្រុមហ៊ុន ឬឯកជន ត្រូវចូលរួមអនុវត្តច្បាប់ទាំងអស់គ្នា ការធ្វើអាជីវកម្មប្រកាន់ខ្ជាប់នូវភាពស្មោះត្រង់ ដើម្បីចូលរួមផលប្រយោជន៍សង្គម និងការប្រកួតប្រជែងក្នុងតំបន់ពិភពលោក ព្រោះប្រទេសកម្ពុជាបានចូលជាសមាជិកពេញសិទ្ធិ នៃអង្គការពាណិជ្ជកម្មពិភពលោក ៕
ចែករំលែកព័តមាននេះ