រាជធានីភ្នំពេញ ៖ រថយន្តដឹកបំពង់ខ្យល់អុកស៊ីសែន១គ្រឿងបានរេចង្កូតជ្រុលធ្លាក់ផ្លូវចូលវាលស្រែ បណ្ដាលឲ្យក្រឡាប់បះជើងផ្ទប់បង្គោលភ្លើង១ដើម ខណៈពេលដែលអ្នកបើកបររវល់តែងាកជជែកគ្នាសើចលេងជាមួយព្រូអត់បានមើលទៅមុខ ។
លុះពេលងាកមកវិញស្រាប់តែរថយន្តរេចង្កូតធ្លាក់ផ្លូវចូលទៅក្នុងស្រែ និងក្រឡាប់តែម្ដង ប៉ុន្តែខណៈនោះ មិនបានបណ្ដាលឲ្យអ្នកបើកបររូបនោះ និងព្រូរងរបួសនោះឡើយ ។ ចំណែករថយន្តក៏មិនបានរងការខូចខាតធ្ងន់ធ្ងរដែរ ព្រោះស្រែនោះទើបគោកទឹកអស់ ហើយដីនៅទន់ៗនៅឡើយ បន្ទាប់មកពួកគេបានហៅរចយន្តស្ទូចដែលស្ថិតនៅជិតនោះស្ទូចឡើងមកលើផ្លូវវិញភ្លាមៗដែរ ។
ឧប្បត្តិហេតុនោះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី១៦ ខែមករា ឆ្នាំ២០១៨ នៅលើកំណាត់ផ្លូវលំ ស្ថិតនៅក្នុងភូមិរំដួលខាងត្បូង សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ ។
រថយន្តដែលក្រឡាប់នោះម៉ាកគា ពណ៌ខៀវ ពាក់ស្លាកលេខ ភ្នំពេញ ២AN-៣០៧៥ ដឹកបំពង់ខ្យល់អុកស៊ីសែនជាង២០បំពង់ ចំណែកអ្នកបើកបរ និងព្រូមិនត្រូវបានគេស្គាល់អត្តសញ្ញាណនោះឡើយ ។ អ្នកបើកបររថយន្តខាងលើមិនបានប្រាប់ពីអត្តសញ្ញាណរបស់ខ្លួននោះទេ ប៉ុន្តែបាននិយាយថា បំពង់ខ្យល់អុកស៊ីសែននេះ នាំចូលពីប្រទេសថៃ ហើយបានយកទៅស្តុកទុកនៅទីតាំងមួយស្ថិតនៅក្នុងភូមិអន្លុងក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ដើម្បីចែកចាយទៅតាមតំបន់នានាផ្សេងៗទៀត ។
ដោយឡែកនៅមុនពេលកើតហេតុ ខ្លួន និងព្រូត្រូវបានថៅកែឲ្យដឹកចំនួន២១បំពង់ក្នុងបំណងយកទៅដាក់នៅក្នុងតំបន់សេដ្ឋកិច្ចពិសេសភ្នំពេញ ស្ថិតនៅក្នុងសង្កាត់កំបូល ខណ្ឌពោធិ៍សែនជ័យ ។
ប្រភពដដែលបានបន្តទៀតថា ខណៈនោះបានបើបរធ្វើដំណើរក្នុងទិសដៅពីជើងទៅត្បូង ដោយបើកបរបណ្ដើរជជែកគ្នាសើចលេងជាមួយព្រូបណ្ដើរ ។ លុះពេលទៅដល់ត្រង់ចំណុចកើតហេតុ ខណៈពេលកំពុងងាកជជែកសើចៗជាមួយគ្នាភ្លេចខ្លួន ស្រាប់តែរេចង្កូតជ្រុលធ្លាក់ចូលវាលស្រែ និងក្រឡាប់ទាំងកំរោលតែម្ដង ។
ប្រជាពលរដ្ឋបាននិយាយថា ពេលនោះពួកគាត់បានឃើញរថយន្តខាងលើបើកមិនលឿននោះទេ គឺយឺតៗប៉ុណ្ណោះ ហើយពេលទៅដល់ត្រង់ចំណុចកើតហេតុ ស្រាប់តែធ្លាក់ចូលទៅក្នុងវាលស្រែ និងក្រឡាប់បះជើង ។ ប៉ុន្តែសំណាងណាស់ដែលបំពង់ខ្យល់អុកស៊ីសែននោះមិនបានផ្ទុះឡើង បណ្ដាលឲ្យមានគ្រោះថ្នាក់កើតឡើង ។
មិនតែប៉ុណ្ណោះបង្គោលភ្លើងត្រូវបានរថយន្តក្រឡាប់សង្កត់លើដែរ ប៉ុន្តែមិនបានបាក់រលំ ចំណែកស្រែទើបគោកទឹកដីនៅទន់ ទើបមិនបានបណ្ដាលឲ្យរថយន្តទទួលរងនូវការខូចខាតឡើយ ។ ក្រោយពេលកើតហេតុអ្នកបើកបរបានហៅរថយន្តស្ទូចដែលមានទីតាំងស្ថិតនៅជិតនោះស្ទូចឡើងមកលើថ្នល់ និងលើកបំពង់ខ្យល់នោះដឹកបន្តទៅកាន់តំបន់សេដ្ឋកិច្ចពិសេសភ្នំពេញបន្តទៀត ៕
ចែករំលែកព័តមាននេះ