ទីក្រុងបាងកក ៖ រដ្ឋមន្ត្រីឧស្សាហកម្ម Uttama Savanayana បានថ្លែងថា រដ្ឋាភិបាលថៃមានគម្រោងពិភាក្សាពន្លឿនការវិនិយោគក្នុងច្រករបៀងសេដ្ឋកិច្ចខាងកើត (EEC) ដើម្បីឲ្យស្របនឹងគំនិតផ្តួចផ្តើមខ្សែក្រវាត់១ វិថី១…
ទីក្រុងបាងកក ៖ រដ្ឋមន្ត្រីឧស្សាហកម្ម Uttama Savanayana បានថ្លែងថា រដ្ឋាភិបាលថៃមានគម្រោងពិភាក្សាពន្លឿនការវិនិយោគក្នុងច្រករបៀងសេដ្ឋកិច្ចខាងកើត (EEC) ដើម្បីឲ្យស្របនឹងគំនិតផ្តួចផ្តើមខ្សែក្រវាត់១ វិថី១ របស់ប្រទេសចិន ។
លោកឧបនាយករដ្ឋមន្ត្រី Somkid Jatusripitak បានជួបជាមួយថ្នាក់ដឹកនាំជាន់ខ្ពស់ក្នុងក្រសួងឧស្សាហកម្មកាលពីថ្ងៃចន្ទ ដើម្បីពិភាក្សាពីវិធីទាក់ទាញការវិនិយោគបន្ថែមនៅក្នុងតំបន់ EEC ។ លោកថា ៖« ពួកយើងជឿជាក់ថា EEC នឹងដើរតួនាទីជាស្ពានទាក់ទាញវិនិយោគិនចិន នាពេលអនាគត » ។
រដ្ឋមន្ត្រីឧស្សាហកម្ម លោក Uttama បន្តថា ក្រសួងឧស្សាហកម្មមានជំនឿចិត្តថា ការអនុម័តច្បាប់ EEC នឹងចាប់ផ្តើមក្នុងខែនេះ ដែលអាចជួយធានាដល់វិនិយោគិនថា រដ្ឋាភិបាលថៃមានផែនការយ៉ាងច្បាស់លាស់សម្រាប់ការអភិវឌ្ឍ ។
លោកបន្ថែមថា ច្បាប់នេះកំពុងតែឆ្លងកាត់ការពិចារណាក្នុងក្រុមប្រឹក្សារដ្ឋ ប៉ុន្តែការពិចារណានេះបានពន្យារពេលអស់១ឆ្នាំមកហើយ ។
រដ្ឋាភិបាលថៃចង់ជំរុញឲ្យសេដ្ឋកិច្ចជាតិផ្តោតសំខាន់លើការប្រើប្រាស់បច្ចេកវិទ្យាទំនើបៗក្នុងវិស័យឧស្សាហកម្ម ។
លោក Chen Namchaisiri ប្រធានសហព័ន្ធឧស្សាហកម្ម និយាយថា ការវិនិយោគក្នុងគម្រោង EEC នឹងកើនឡើងខ្ពស់ជាងគេក្នុងត្រីមាសទី២ឆ្នាំនេះ ព្រោះតែច្បាប់ EEC ។
រដ្ឋាភិបាលគិតថា ការវិនិយោគក្នុងបណ្តាខេត្តនៅតំបន់ EEC នឹងជួយជំរុញដល់ GDP របស់ប្រទេសប្រមាណ៥%ក្នុង១ឆ្នាំ ឬ៤៧ប៊ីលានដុល្លារក្នុងរយៈពេល៥ឆ្នាំ ។
គោលដៅរបស់រដ្ឋាភិបាល គឺបង្កើនប្រាក់ចំណូលរបស់ប្រជាពលរដ្ឋ ដើម្បីធ្វើឲ្យថៃចាកចេញពីឈ្មោះជាប្រទេសមានប្រាក់ចំណូលមធ្យម ៕
ចែករំលែកព័តមាននេះ