រាជធានីភ្នំពេញ ៖ ធនាគារពិភពលោកបានព្យាករកំណើនសេដ្ឋកិច្ចកម្ពុជាឆ្នាំ២០១៨ នៅតែមានភាពរឹងមាំ គឺ៦,៩% ដោយសារវិស័យមួយចំនួនដូចជា កាត់ដេរសម្លៀកបំពាក់ សំណង់ និងទេសចរណ៍ ។ ក៏ប៉ុន្តែបើតាមប្រសាសន៍របស់លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ គឺកំណើនសេដ្ឋកិច្ចកម្ពុជានឹងល្អប្រសើរ ហើយមានតួលេខខ្ពស់ជាងការព្យាករទៅទៀត ពោលគឺលោករំពឹងថា នឹងទទួលបាន៧%នៅក្នុងឆ្នាំ២០១៨នេះ ។
ថ្លែងក្នុងវេទិកាសាធារណៈ ស្ដីពី «ថវិកាឆ្នាំ២០១៨» ដែលរៀបចំឡើងកាលពីព្រឹកថ្ងៃទី១៥ មករា នៅក្រសួងសេដ្ឋកិច្ច និងហិរញ្ញវត្ថុ លោកមានប្រសាសន៍បន្តថា បើមើលទៅលើស្ថានភាពជាក់ស្ដែងនៅពេលបច្ចុប្បន្ននេះ នៅឆ្នាំ២០១៨ សេដ្ឋកិច្ចកម្ពុជានឹងសម្រេចបានលើសពីការព្យាករកន្លងមក ដែលកំណត់ត្រឹម៦,៩% ព្រោះវិស័យចម្បងដែលជំរុញកំណើនសេដ្ឋកិច្ចកម្ពុជា នៅតែរីកចម្រើន និងរឹងមាំ ។
លោកថា ៖« វិស័យមួយចំនួនដែលយើងបានព្យាករហើយរំពឹងថា ថមថយនោះបែរជាមិនថមថយ មិនតែប៉ុណ្ណោះ វារឹតតែកើនឡើងទៅទៀត។ ជាក់ស្ដែង វិស័យសំណង់ ដែលយើងគិតថា វាអាចថមថយនៅក្នុងឆ្នាំ២០១៧ និងឆ្នាំ២០១៨ ក៏ប៉ុន្តែរហូតមកដល់ពេលនេះ វានៅតែដំណើរការល្អ និងមានការវិនិយោគជាបន្តបន្ទាប់ » ។
លោកបន្តថា ក្រៅពីសំណង់ជាវិស័យរឹងមាំមួយក្នុងកំណើនសេដ្ឋកិច្ចកម្ពុជា វិស័យកសិកម្ម ដែលនៅឆ្នាំកន្លងមកបានរួមចំណែកតិចតួចនោះ បច្ចុប្បន្ន វាហាក់ដូចជាមានកំណើនជាងឆ្នាំមុនៗ ព្រោះហេដ្ឋារចនាសម្ព័ន្ធនៅក្នុងវិស័យកសិកម្ម ក៏បានគ្រប់គ្រាន់សម្រាប់បណ្ដាខេត្តមួយចំនួន ហើយមួយចំនួនទៀតក៏បាននិងកំពុងបន្តអភិវឌ្ឍន៍ ដើម្បីឲ្យការស្រោចស្រពដំណាំកសិកម្មបានកាន់តែច្រើន ។ ម្យ៉ាងទៀត ទេសចរណ៍របស់កម្ពុជា ក៏ហាក់មានកំណើនខ្ពស់ជាងឆ្នាំមុនៗ ដែលជាហេតុធ្វើឲ្យចំណូលពីវិស័យនេះកើនឡើងខ្ពស់ ។
លោកបន្ថែមថា ថ្វីត្បិតតែកាត់ដេរជាវិស័យសំខាន់មួយរួមចំណែកក្នុងសេដ្ឋកិច្ចកម្ពុជា មានការថមថយកំណើន ក៏ប៉ុន្តែបានជំនួសមកវិញនូវវិស័យឧស្សាហកម្ម ដែលអាចផលិតនូវរបស់មានតម្លៃខ្ពស់សម្រាប់លក់ចេញ ។
លោកបញ្ជាក់ថា សរុបមក មានវិស័យខ្លះមានកំណើនថមថយ ប៉ុន្តែវិស័យខ្លះនៅតែរឹងមាំ និងខ្លះទៀតមានកំណើនខ្ពស់ខ្លាំង ។ ទាំងនោះហើយដែលលោកអះអាងថា កំណើនសេដ្ឋកិច្ចកម្ពុជាឆ្នាំ២០១៨ នឹងទទួលបានលើសពីការព្យាករ ។
របាយការណ៍របស់ធនាគារពិភពលោក បានចេញផ្សាយកាលពីពេលកន្លងទៅនេះឲ្យដឹងថា ឆ្នាំ២០១៨ កំណើនសេដ្ឋកិច្ចកម្ពុជានឹងស្មើ៦,៩% ក៏ប៉ុន្តែហានិភ័យចំពោះសេដ្ឋកិច្ចកម្ពុជា ក៏អាចនឹងកើតមានឡើងផងដែរលើការថយចុះនៃសេដ្ឋកិច្ចចិន ដោយបច្ចុប្បន្ន វិនិយោគិនធំជាងគេនៅក្នុងប្រទេសកម្ពុជា គឺវិនិយោគិនចិន ហើយភ្ញៀវទេសចរដែលឈរលំដាប់ថ្នាក់លេខ១នៅកម្ពុជា ក៏ជាភ្ញៀវចិនដែរ ។
គួរបញ្ជាក់ថា កាលពីឆ្នាំ២០១៧កន្លងទៅនេះ ធនាគារពិភពលោកក៏បានព្យាករថា កំណើនសេដ្ឋកិច្ចកម្ពុជានឹងសម្រេចបាន៦,៨% ក៏ប៉ុន្តែតាមរបាយការណ៍របស់ធនាគារជាតិនៃកម្ពុជា ចេញផ្សាយនាពេលថ្មីៗនេះថា កម្ពុជាសម្រេចបានកំណើនសេដ្ឋកិច្ច៦,៩% ដែលគាំទ្រដោយវិស័យសំណង់ កាត់ដេរ ទេសចរណ៍ និងធនាគារ ៕
ចែករំលែកព័តមាននេះ